شىلدە سۋىنىڭ قانداي قاسيەتى بار؟
ۋنيۆەرسيتەتتىڭ سوڭعى كۋرسىندا وقىپ جۇرگەنىمدە ءوزىم ۇناتقان جىگىتكە كۇيەۋگە شىقتىم. كۇيەۋىم ول كەزدە قاراعاندىدا جۇمىس ىستەيتىن. وقۋىمدى ءبىتىرىپ، ديپلوم العان سوڭ مەن دە سوندا كەتتىم. تۇڭعىش پەرزەنتىم دە قاراعاندىدا ومىرگە كەلدى. اتا-انام دا، اتا-ەنەم دە وڭتۇستىك قازاقستان وبلىسىندا تۇرادى. ول كىسىلەر مەنىڭ اۋىلعا كەلىپ بوسانعانىمدى دۇرىس كورگەن بولاتىن. ءبىراق مەن كۇيەۋىمنىڭ جانىندا بولعىم كەلىپ، قاراعاندىدا قالدىم. ءسويتىپ قاقاعان قاڭتار ايىندا تۇڭعىشىمدى دۇنيەگە اكەلدىم. مەنىڭ بوسانعانىمدى ەستىگەن انام ون-شاقتى كۇننەن كەيىن كەلدى.
ول كەزدە مەن پەرزەنتحانادان ۇيگە شىعىپ قويعان بولاتىنمىن. ەش يكەمىم كەلمەسە دە بىرنارسە ەتىپ بالانى شومىلدىرىپ، قۇنداقتاپ قويعانمىن. انام كەلگەن سوڭ ءوزى اكەلگەن بەسىككە سالىپ بەردى. ءبىراز كۇننەن كەيىن ۇلىمنىڭ ەكى قولتىعىنىڭ استى مەن موينى قىزارىپ جاراعا اينالدى. دارىگەرگە كورسەتىپ، جازىپ بەرگەن ءدارىسىن جاققانىمىزبەن كەتە قويعان جوق. اۋا بارماعاننان كەيىن قىزارىپ تۇر ما دەپ ويلاپ، شومىلدىرىپ بولعاننان كەيىن قۇرعاتىپ ءسۇرتىپ، ءبىراز ۋاقىت اشىپ قويامىز. الايدا ونىڭ دا پايداسى بولمادى. كۇن سايىن تەلەفون ارقىلى حابارلاسىپ وتىرعان ەنەم توپىراقتى ابدەن ورتەپ كەپتىرىپ، سونى جاقساق كەتەتىنىن ايتتى. ونى دا جاساپ كوردىك. ءبىراق ناتيجەسى بولعان جوق. سونىمەن نە كەرەك انام ەكەۋمىز كوپتەگەن ەم تۇرلەرىن جاساعانىمىزبەن بالانىڭ قىزارعان جاراسىن كەتىرە الماي-اق قويدىق. ءبىر ايدان كەيىن انام اۋىلعا قايتىپ كەتتى. ال بالامنىڭ جاراسى سول كۇيىنشە جازىلمادى. جاز شىعا كۇيەۋىم كەزەكتى ەڭبەك دەمالىسىنا شىعىپ، اۋىلعا كەلدىك. ۇيگە كەلىسىمەن ەنەم بالامنىڭ دەنەسىن اشىپ كورىپ: «مىنا بالانىڭ دەنەسىنە شىلدە سۋىن دۇرىس تيگىزبەپسىڭ. قولتىعىنىڭ استى مەن موينى سودان قىزارىپ كەتكەن. بەيشارا بالانى ءشىرىتىپ جىبەرۋگە اينالىپسىڭ عوي. شىلدە سۋىن الىپ قالىپ پا ەدىڭ؟» – دەپ سۇرادى. ەنەمنىڭ ءسوزىن تۇسىنبەگەندىكتەن: «شىلدە سۋى دەگەن نە، اپا؟» – دەپ سۇرادىم. «شىلدە سۋى دەپ بالانى ەڭ ءبىرىنشى شومىلدىرعان سۋدى ايتادى. سول سۋدى بالانىڭ دەنەسىنە تۇگەلدەي تيگىزىپ شىعۋ كەرەك. ەگەر ولاي ەتپەسە، بالانىڭ دەنەسى وسىلايشا قىزارىپ، ول وڭايلىقپەن جازىلمايدى. شىلدە سۋىن تۇگەلدەي توگىپ تاستاماستان، كىشىلەۋ ءبىر ىدىسقا قۇيىپ الىپ قالىپ، كەيىن قىزارعان جەرىنە جاقسا وپ-وڭاي كەتىپ قالادى»، – دەدى. مەن ونداي سۋدى توگىپ تاستاعانىمدى ايتتىم. سول كۇنى ەنەم كەلىنى جاقىندا بوسانعان ۇيلەردى ارالاپ ءجۇرىپ، ءبىر كەسە شىلدە سۋىن تاۋىپ اكەلدى. سول سۋمەن بالامنىڭ قىزارعان جەرلەرىن جۋدىق. كوپ ۇزاماي-اق بالانىڭ دەنەسىنىڭ قىزارعان جەرلەرى جازىلىپ كەتتى. شىلدە سۋىنىڭ وسىنداي قاسيەتى بارىنا سوندا عانا كوزىم جەتتى. سوندىقتان مەن جاس كەلىنشەكتەرگە بالانى العاش رەت سۋعا تۇسىرگەندە تاجىريبەلى، كوپتى كورگەن انالارعا شومىلدىرتقان دۇرىس ەكەن دەگەن كەڭەس ايتقىم كەلەدى.
ح. سابەنوۆا، جەتىساي قالاسى.
«اۋىرماڭىز!» گازەتىنەن.
