"ءتىلدى مەڭگەرۋ قيىن، ارنايى كۋرستارعا جازىلۋ كەرەك" دەگەن سىلتاۋدى ايتاتىن جۇرتقا الماتىلىق 18 جاستاعى ارايلىم مەلدەشوۆانىڭ ءوز جاۋابى بار. تۇرىك ءتىلىن ارنايى كۋرستارعا بارماي-اق، سەريال كورۋ ارقىلى جەتىك مەڭگەرىپ العان ارايلىم ءتىپتى قازاقستان مەن تۇركيا ەلدەرى اراسىندا وتكەن قۇرىلتايدا رەسمي اۋدارماشى بولىپ تا ۇلگەرگەن. وسى رەتتە تengrinews.kz ءتىلشىسى ەكى ەل اراسىندا اۋدارماشى بولعان، ءتىلدى ساۋاتتى جازۋدى سەريال ارقىلى ۇيرەنگەن ارايلىممەن تىلدەسىپ قايتقان ەدى.
ونىڭ ايتۋىنشا، العاشىندا تىلگە دەگەن قىزىعۋشىلىعى مۇلدەم بولماپتى. موتيۆاسيا رەتىندە ءوزىنىڭ سۇيىكتى ەلى تۇركيا مەن سول ەلدە مەكەندەيتىن ازاماتتار بولىپتى. "مەن الماتىداعى № 173 مەكتەپ-ليسەيدە وقىدىم. ول جەردە تىلگە دەگەن تالاپ قاتال بولدى. ءبىلىم جاعى دا، ءتىل جاعى دا جاقسى بولۋى باستى شارت. تۇركيا ەلىنە، ولاردىڭ سالت-داستۇرىنە، تىلىنە دەگەن قىزىعۋشىلىق بالا كەزىمنەن باستالدى. كىشكەنتاي كەزىمدە تەلەديداردان سولاردىڭ سەريالى مەن فيلمدەرىن كورىپ ءوستىم. كەشكە وتباسىمىزبەن جينالا قالىپ، تۇرىك سەريالدارىن تاماشالايتىنبىز. كەيدە داۋىستاپ جاتقان ادامداردىڭ اۋدارماسى ەستىلمەي قالىپ، ءوزىم نە دەپ ايتقاندارىن تۇسىنە قوياتىنمىن. سول ەلدىڭ ءتىلىن ءبىلۋ كەرەك دەگەن ماقسات ەشقاشان قويماپپىن. تۇركيا ەلىنە قىزىققانىم سونشالىق، ءتىلىن قالاي ۇيرەنىپ العانىمدى بىلمەي دە قالدىم"، - دەيدى ول. ارايلىم قازاقتار مەن تۇرىكتەردىڭ بەت-الپەتى، ءتىلى، ءتىپتى سالت-داستۇرلەرى ۇقساس بولعاندىقتان مەڭگەرۋ وڭاي بولعانىن ايتادى. 
"ءتىلدى مەڭگەرۋ تولىقتاي ءوز تاراپىمنان بولدى. اتا-انام يا بولماسا مۇعالىمدەرىم ماجبۇرلەگەن جوق. قوناقجايلىعى قازاقتان كەم تۇسپەيتىن، كەلگەن قوناقتى جوق دەگەندە ءبىر كەسە شاي ىشكىزبەي جىبەرمەيتىنى، العىس ايتۋ، كەشىرىم سۇراۋ سەكىلدى تۇرىك ۇلتىنا ءتان قاسيەتتى مەن قازاقتارعا ۇقساتتىم. ءتىلدى بىلاي قويعاندا، ءتىپتى سالت-داستۇرلەرىنە دەيىن ۇقساس بۇل ۇلتتىڭ ءتىلىن مەڭگەرۋ اسا قيىن بولعان جوق. ءاربىر قىز سەكىلدى بوس ۋاقىتىمدا سەريال كورگەنىمدى ۇناتامىن. اسىرەسە تۇرىك سەريالدارىن. ۋاقىتىمدى قۇرى سەريال كورىپ ەمەس، ءتىل ۇيرەنىپ وتكىزدىم دەسە بولادى. باستاپقىدا اۋدارمامەن، كەيىن سۋبتيترلارمەن، ءقازىر تەك تۇرىك تىلىندە كورىپ ءجۇرمىن"، - دەيدى ارايلىم. 
باقىتىنا وراي كەيىپكەرىمىزدىڭ ارمانى ورىندالىپ تۇرىك ەلىنە بارۋدى بۇيىرىپ، ءتىپتى رەسمي اۋارماشى بولىپ بارعان ەكەن. "العاش رەت 2015 جىلى ىستامبۇلدا بولدىم. ول كەزدە ءتىلدى شامالى تۇسىنەتىنمىن. ءتىلىمنىڭ دەڭگەيى ىمعا كەلىپ، ەندى ۇيرەنىپ جۇرگەن كەزىم. اكەمدى قازاقستان مەملەكەتى مەن تۇركيا ەلى قۇرىلتايىنىڭ باسپا ءسوز كونفەرەنسياسىنا شاقىرعان. اكەم بۇل جاڭالىقتى ەستي سالا، مەنىڭ ءتىلدى ۇيرەنىپ جۇرگەنىمدى ءبىلىپ وزىمەن بىرگە اۋدارماشى بولىپ اپاردى. بۇل ءىس-شارا ماعان ۇلكەن تاجىريبە بولدى. ايتادى عوي، ءتىلدى مەڭگەرگىڭ كەلسە سول ورتادا ءجۇرىپ، تەك سول تىلدە سويلەسۋگە تىرىس دەپ. سەريالدان كورگەن بولەك، شىنايى ومىردە جۇزبە-جۇز كەزدەسىپ سويلەسكەن مۇلدەم بولەك ەكەن"، - دەيدى ول. ارايلىم تاعى ەكى رەت تۇركيا ەلىندە بولعانىن جانە ءار بارعان سايىن مۇلدەم باسقا جاڭا كوزقاراسپەن قارايتىنىن، تۇلعا رەتىندە ءوزى وزگەرىپ وتىرعانىن ايتتى. 
"باقىتىما قاراي تۇركيا مەملەكەتىندە تاعى ەكى رەت بولدىم. باسىندا قىسىلىپ، سويلەسۋگە ۇيالاتىنمىن. ەكىنشى، ءۇشىنشى رەت بارعانىمدا اڭگىمەگە ءوزىم قولقا سالىپ، ءلاززات الاتىن بولدىم. ءتىپتى ءبىر كەزدە دۇكەنشى مەن تۋريستكە كومەكتەسكەنمىن بار. تۋريست نە كەرەكتىگىن ىممەن ءتۇسىندىرىپ جاتسا دا، دۇكەنشى تۇسىنبەي مەن كەلىپ نە قالايتىنىن سۇراپ، كەيىن ەكەۋى ءبىرىن-بىرى تۇسىنە الماعانىنا كۇلىپ، ماعان العىسىن ايتىپ تارقاعان. وسىنداي كەزدەردە ءتىل ءبىلۋدىڭ ارتىقشىلىعى بار"، - دەيدى ول. "بوس ۋاقىت بارىندە بار، تەك ونى ءتيىمدى جۇمساۋ ءار ادامنىڭ ءوز قولىندا" دەگەن ارايلىم ءتىلدى ءالى كۇنگە دەيىن مەڭگەرە الماي جۇرگەندەرگە كەڭەس بەردى.
"قاي سالاعا بەت بۇرماساڭ دا، قانداي ىسپەن اينالىسپاساڭ دا بارلىق جەردە ءتوزىمدى بولۋ كەرەك. ۇستانىمىم باستاعان ءىستى اياعىنا دەيىن جەتكىزۋ. جاڭادان ءتىل ۇيرەنىپ جۇرگەندەرگە سول ءتىلدى جازىپ ەمەس، ەڭ ءبىرىنشى كوپ تىڭداپ، كوپ سويلەۋ كەرەكتىگىن ايتقىم كەلدى. ءتىلدى ءبىلىپ ءجۇرۋ باسقا، سول تىلدە سويلەسۋ مۇلدەم باسقا. مىسالعا، ءتىل بىلسە دە سويلەسۋگە قىسىلاتىندار بار. سوندىقتان ۇيرەنىپ جۇرگەنىڭىزدە سول تىلدە سويلەسۋگە تىرىسىڭىز. باستاپقىدا "مەن دۇكەنگە بارا جاتىرمىن" ، "ساعات كەشكى التى بولدى" دەپ باستاپ، كەيىن ۇلكەن ماتىنمەن سويلەۋگە ءوزىڭىزدى يكەمدەپ الساڭىز وڭاي بولادى"، - دەيدى ول. 
ارايلىمنىڭ ايتۋىنشا، بولاشاقتا بيزنەس سالاسىنا بەت بۇرعىسى كەلەدى ەكەن. ءتىل مەن بيزنەستى بايلانىستىرىپ ءوزى سۇيەتىن ىسپەن اينالىسقىسى كەلەتىنىن ايتتى. "قولىما ارمانداعان قىزىل ديپلومىمدى العاننان كەيىن بيزنەس سالاسىن باعىندىرسام دەيمىن. بيزنەستى شەتەلدىكتەرمەن بايلانىستىرعىم كەلەتىندىكتەن، تاعى فرانسۋز، يتاليان تىلدەرىن مەڭگەرۋىم كەرەك. ءتىلدى بىلگەن كەزدە ادامنىڭ ومىرگە دەگەن كوزقاراسى وزگەرەتىنىن ايتقىم كەلەدى. باسقا ۇلت وكىلدەرىنىڭ سالتىن، ادەت-عۇرپىن، تۇرمىس-تىرشىلىگىن، ءتىلىن ءبىلۋ ارقىلى سەن تۇلعا رەتىندە وسەتىن بولاسىڭ"، - دەيدى ارايلىم مەلدەشوۆا.
دەرەككوز: tengrinews.kz
