لوس-اندجەلەس قالاسىندا قازاننىڭ 23ء-ى مەن 28ء-ى ارالىعىندا وتەتىن حالىقارالىق Hollywood Film Festival كينوفەستيۆالىنىڭ ءبىرىنشى كەزەڭىندە «امىرە» ءفيلمى Silver Screen Award جۇلدەسىنە يە بولدى. قازاقتىڭ تەنور داۋىستى ءبىرتۋار ءانشىcءى امىرە قاشاۋبايەۆتىڭ عۇمىرىن باياندايتىن ءفيلمدى ق ر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق «Dar Play» كومپانياسىمەن بىرلەسە تۇسىرگەن.

ايتا كەتسەك، فەستيۆالدىڭ العاشقى كەزەڭىندە Silver Screen Award جۇلدەسىنە ۇمىتكەرلەر قاتارىنا بايقاۋعا قاتىساتىن ءار ەلدىڭ بىرنەشە فيلمدەرى ۇسىنىلعان بولاتىن. 

بۇل كەزەڭدە قازاقستان اتىنان التى بىردەي كينوتۋىندى – ءۇش تولىقمەتراجدى جانە ءۇش قىسقامەتراجدى فيلمدەر قاراستىرىلعان.  «امىرە» كارتيناسىمەن قاتار ش.ايمانوۆ اتىنداعى «قازاقفيلم» كينوستۋدياسى جارىققا شىعارعان ءۇش فيلم ب ا ق سىنادى، ولار: تولىقمەتراجدى فيلمدەر بايقاۋىندا تولەگەن بايتوكەنوۆتىڭ «ساتاش» ءفيلمى جانە ەلجاس راقىمبەكوۆتىڭ «ەل فريمان» كارتيناسى، ال قىسقامەتراجدى فيلمدەر بولىمىنە بەرىك جاحانوۆتىڭ «اسان» ءفيلمى قاتىستى.

ءبىرىنشى كەزەڭنىڭ جەڭىمپازى Silver Screen Award جۇلدەسىنىڭ يەگەرى «امىرە» ءفيلمى ەندى  فرانسيا، گەرمانيا، چيلي، جاپونيا مەن شۆەسيا سىندى باسقا دا 16 مەملەكەتتەن قاتىساتىن فيلمدەرمەن بىرگە فەستيۆالدىڭ باستى جۇلدەسى ءۇشىن كۇرەسكە تۇسەدى. بۇل فەستيۆالدە ءفيلمدى رەجيسسەر دجەفف ۆەسپا تانىستىراتىن بولادى.  

جاڭا تالانتتاردى اشاتىن جانە تاۋەلسىز كينونى ناسيحاتتايتىن گولليۆۋدتىق كينوفەستيۆال 1997 جىلدان باستاپ وتكىزىلىپ كەلەدى. «ۇلكەن وقيعالار الەمدى وزگەرتەتىنىن جانە الەمىمىز وزگەرىستەردى كۇتەتىنىن بىلەمىز. سونىمەن قاتار، گولليۆۋد – الەمدىك مادەنيەتتى جىرلايتىن تاۋەلسىز كينو سۋرەتكەرلەر قاتارى جينالاتىن ءتيىمدى ءارى بەدەلدى ورتا»،- دەيدى Hollywood Film Festival كينوفەستيۆالىنىڭ ۇيىمداستىرۋشىلارى. 

سونداي-اق، «امىرە» كارتيناسى نيۋ-يوركتە قازاننىڭ 10 مەن 14 ارالىعىندا وتكەن «ۆۋدستوك» حالىقارالىق كينوفەستيۆالىنە قاتىستى. ءفيلمدى كورەرمەنگە باستى رولدە وينايتىن اكتەر سانجار ءمادي ۇسىندى. اكتەردىڭ ايتۋىنشا، «امىرە» فيلمىنە امەريكالىق كورەرمەن تاراپىنان ۇلكەن قىزىعۋشىلىق تۋىنداپ، بيلەتتەر تۇگەل الدىن-الا ساتىلىپ كەتكەن جانە زال كورەرمەنگە تولى بولعان.  

"كارتينانى كورسەتتىك، حالىقارالىق دەڭگەيگە شىعاردىق. ەڭ باستىسى فيلم كورەرمەننىڭ كوڭىلىنەن شىقتى"، - دەدى ۆۋدستوكتىك كينوفەستيۆال تۋرالى سانجار ءمادي.