Qamshy.kz اقپارات اگەنتتىگىنە مادينا ابدەت ەسىمدى ازاماتشا جاقىندا تۋىسىنىڭ باسىنان وتكەرگەن جاعدايىن بايانداپ حابارلاستى. تۋىسىنىڭ ءسابيى تۇركىستان وبلىسى كەلەس اۋدانى اباي اۋىلدىق اۋرۋحانانىڭ پەرزەنتحاناسىندا  ءولى تۋعان. ونىڭ ايتۋىنشا، 9 ايدا بالانىڭ دەنساۋلىعىندا كىنارات بولماعان. پەرزەنتحاناعا بوسانۋعا كەلگەندە دە بالا ءتىرى بولعان، ياعني جۇرەگى سوعىپ تۇرعان. اباي اۋىلىنداعى اۋرۋحانادا بوسانعان نۇرجامال قونىسبايدىڭ تۋىستارى "بالانىڭ ءولى تۋعانى دارىگەرلەردىڭ سالعىرتتىعىنان" دەگەن ويدا.

- نۇرجامال 9 اي بويى دارىگەرلەرگە تەكسەرىلىپ تۇردى. ەشقانداي ينفەكسيا تاپپادى. ءوزىنىڭ دە، ءسابيدىڭ دە دەنساۋلىعىندا كىنارات بولمادى. پەرزەنتحانادا ونى بوسانۋعا قابىلداعاندا دا ءبارى جاقسى ەدى. جەرگىلىكتى ۋچاسكەلىك دارىگەرگە كورىنگەندە ءبارى دۇرىس ەكەنىن ايتقان. نۇرجامالدى اۋرۋحانا قىزمەتكەرلەرى 2018 جىلدىڭ 27 قازانىندا ساعات 14.00-دە قابىلداپ الدى. 17.00-دە نۇرجامالدىڭ جانىنا پارتنەر رەتىندە كىرگىزىلدىم. سول ۋاقىتتا بالانىڭ جۇرەگى توقتاپ قالعانىن ايتتى. "كارديولوگقا كورىنىپ، ۋدز-گە تۇسەيىك" دەسەك، ەكى دارىگەر دە ورنىندا جوق. ۋزد مامانىنا حابارلاسسا، تەلەفونمەن «بارمايمىن» دەپ ايقايلادى. ول ەكى ساعاتتان كەيىن ءبىر-اق كەلدى. دارىگەرلەر «كەساريەۆو جاسايىق، بالا مۇمكىن ءتىرى شىعار» دەيدى. وزدەرى بىلمەيدى، - دەيدى اشىنعان مادينا ابدەت.

نۇرجامال قونىسبايدىڭ - جاسى 20-دا. بۇل ونىڭ تۇڭعىشى ەدى. سوندىقتان وپەراسيا جاساۋعا كەلىسپەگەن. «ءوزىم بوسانامىن» دەپ شەشكەن. نۇرجامال ساعات 20.00-دە بوسانعان، ءسابيى ءولى تۋعان.

-دەنى ساۋ ايەل دۇنيەگە اكەلگەن دەنى ساۋ ءسابيدىڭ جۇرەگى قالاي وزىنەن ء-وزى توقتاپ قالادى؟! دارىگەرلەردەن سۇراساق ناقتى جاۋاپ بەرە الماي وتىر. «ونداي جاعدايلار بولىپ تۇرادى»،- دەپ قىسقا قايىرادى. ءالى ناقتى دياگنوز دا قويىلماعان، - دەيدى مادينا ابدەت.

كەشە نۇرجامال قونىسباي پەرزەنتحانادان شىقتى. 

نۇرجامال قونىسبايدىڭ تۋىستارى ماسەلەنىڭ انىق-قانىعىنا كوز جەتكىزۋ ءۇشىن مەديسينالىق ساراپتاما جاساتىپ جاتىر. ونىڭ قورىتىندىسى 10 كۇننەن كەيىن دايىن بولادى.

نۇرجامال قونىسبايدىڭ  تۋىستارى جان اۋىرتقان وسى وقيعاعا قاتىستى پروكۋراتۋراعا ارىز ءتۇسىردى. ولار بۇل ءىستى اياعىنا دەيىن جەتكىزبەك ويدا. بۇل تەك ءبىر ءسابيدىڭ عانا وكىنىشتى تاعدىرى ەمەس، وسى پەرزەنتحانادا دۇنيەگە كەلەتىن بارلىق سابيلەردىڭ دەنساۋلىعى مەن ءومىرى ءۇشىن جاسالىپ جاتقان ءىس ەكەنىن ايتادى.

-  ولارعا مەملەكەتتەن اپپاراتتارعا ءتيىستى قارجى بولىنگەنىمەن جاڭالانباعان. 30 جىلدان بەرى كەلە جاتقان ەسكى اپپاراتتار. وندا دا تەك ۋدز عانا بار. باسقا اپپاراتتار جوق. ادىلەتسىزدىك ەمەس پە؟! كارديولوگ بىلاي تۇرسىن، ۋدز جاسايتىن مامان جۇمىس ورنىندا ەمەس. ءبىز ءبىر بالانىڭ ءولى تۋىلعانىنا قادالىپ تۇرعان جوقپىز. قانشاما بالا دۇنيەگە كەلىپ جاتىر ول جەردە. سابيلەر شەتىنەپ جاتىر، - دەيدى مادينا ابدەت.

ءبىز اتالعان وقيعاعا بايلانىستى پەرزەنتحانانىڭ باس دارىگەرى نۇرالى جاقىپوۆقا حابارلاستىق، الايدا ول كىسى ورنىندا بولماعاندىقتان، حاتشىسىمەن تىلدەستىك. حاتشىنىڭ ايتۋىنشا، باس دارىگەردىڭ قىزمەت كورسەتۋ ساپاسى بويىنشا جانە ەمدەۋ ءىسى بويىنشا ەكى ورىنباسارى بار.

قىزمەت كورسەتۋ ساپاسىنا جاۋاپ بەرەتىن عاني باحتيار ۇلى ۋدز مەن كورديولوگتىڭ جۇمىس ورنىندا بولماعانىن جۇمىس ۋاقىتىنىڭ اياقتالۋىمەن ءتۇسىندىردى.

- ۋدز جاسايتىن مامان دا، كارديولوگ تا ساعات 16.00-گە دەيىن جۇمىس ىستەيدى. قاجەت بولعان جاعدايدا ولاردى ۇيىنەن شاقىرتامىز، - دەيدى.

ەمدەۋ ىسىنە جاۋاپتى ورىنباسار ءابدۋعاپپار مومينوۆ تە ارىپتەسىنىڭ ءسوزىن قايتالادى. 2018 جىلعا ارنالعان پەرزەنتحاناداعى ءولى تۋعان سابيلەر مەن ءتىرى تۋعان سابيلەردىڭ ستاتيستيكاسىن سۇراپ ەدىك، اقپاراتتى ناقتىلاپ، جارتى ساعاتتان كەيىن حابارلاسۋىمىزدى ءوتىندى. الايدا، جارتى ساعاتتان كەيىن دە، ءبىر ساعاتتان كەيىن دە ەشقايسىسى تەلەفون تۇتقاسىن كوتەرمەدى.

مادينا ابدەتتىڭ "اپپاراتتاردىڭ ەسكىلىگى جانە ۇكىمەتتەن قاجەتتى جابدىققا اقشا بولىنگەنى، ءبىراق ونىڭ دوكەيلەردىڭ قالتاسىنا كەتىپ جاتقانى تۋرالى" اقپاراتىن ناقتىلاۋ ءۇشىن ءبىز باس دارىگەر نۇرالى جاقىپوۆ ەكى كۇن بويى حابارلاسقانىمىزبەن، ەش تىلدەسە المادىق. دەمەك، باس دارىگەر جۋرناليستەردىڭ سۇراقتارىنا جاۋاپ بەرۋدەن قاشىپ وتىر. حاتشى قىزدىڭ ايتۋى بويىنشا، ەكى كۇن بويى باس دارىگەر جۇمىس ورنىندا بولمادى، جەكە تەلەفونى ارقىلى دا تىلدەسۋدەن  باس تارتتى.

بۇل ماسەلە Qamshy.kz اقپارات اگەنتتىگىنىڭ ۇدايى نازارىندا بولادى. اتالعان وقيعاعا قاتىستى الداعى ۋاقىتتا قازاقستان رەسپۋبليكاسى دەنساۋلىق ساقتاۋ مينيسترلىگىنە حات جولدايتىنىمىزدى ەسكەرتكىمىز كەلەدى.