اقتوبەدە وقۋشى قىزدىڭ ولىمىنە قاتىستى اقپارات الەۋمەتتىك جەلى ارقىلى تاراپ جاتىر. ۇيىندە قىزۋى كوتەرىلىپ، ەس-تۇسسىز قۇلاعان ءبۇلدىرشىن جەدەل جاردەم قىزمەتكەرلەرى جەتكەنشە قايتىس بولعان. Qamshy.kz اقپارات اگەنتتىگى اتالمىش ۆيدەونى جاريالاماۋدى ءجون كوردى.

جانتۇرشىگەرلىك وقيعا 3 قاراشا كۇنى «نۇر اقتوبە» اۋدانىنداعى تۇرعىن ۇيلەردىڭ بىرىندە تىركەلدى دەپ حابارلايدى matritca.kz. مارقۇم بولعان وقۋشى قىز ءبىرىنشى سىنىپتا وقىعان ەكەن.

دارىگەرلەر كەلگەنشە اناسى ۇيىقتاپ جاتىر دەپ ويلاپ، قايتىس بولعان قىزىنىڭ قولىن ۋقالاپ وتىرا بەرىپتى.

دەنە قىزۋىمەن قۇلاپ، قايتىپ ەس جيناي الماي قالعان ءبۇلدىرشىننىڭ جاعدايىن كورشىلەرى ۆيدەوعا ءتۇسىرىپ العان.

جەلىدە تاراعان ۆيدەودا جەدەل جاردەم قىزمەتىن 40 مينۋت كۇتكەنى ايتىلادى. قىزدىڭ اناسى بالاسىنىڭ قىزۋى كوتەرىلىپ، قالتىراپ قۇلاپ قالعانىن جەتكىزگەن.

ۆيدەودا بالانىڭ تامىر سوعىسىن تەكسەرگەن دارىگەردىڭ بىردەن جاعدايدى سەزگەنى كورىنىپ تۇر. ول بالانىڭ قانداي دا ءبىر دەرتپەن ەسەپتە بار جوعىن سۇرايدى.

كىشى دارەتىن جىبەرىپ قويعان بالا قۇلاعان جەرىندە جاتا بەرگەنگە ۇقسايدى.

الەۋمەتتىك جەلىدە تەز تاراپ كەتكەن كىشكەنتاي قىزدىڭ ولىمىنە قاتىستى اقپارات اقتوبەلىكتەردى شوشىتىپ وتىر.

اتا-انالار WhatsAرp جەلىسى ارقىلى بالانىڭ قىزۋى كوتەرىلسە، بىردەن دارىگەر شاقىرۋ كەرەكتىگىن ايتىپ، ەسكەرتۋلەر جاساۋدا.

بەلگىسىز جاعدايدا قايتىس بولعان وقۋشىنىڭ ولىمىنە قاتىستى سوت-مەديسينالىق ساراپتاما تاعايىندالعان.