بۇگىن الماتىدا مانەرلەپ سىرعاناۋشى دەنيس تەننىڭ تۋىپ-وسكەن ۇيىندە مەموريالدى تاقتا ورناتىلدى. وعان سپورتشىنىڭ اتا-اناسى، دوستارى مەن دەنيس تەندى قۇرمەتتەيتىن ازاماتتار جينالدى. مەموريالدى تاقتانىڭ سالتاناتتى ورناتىلۋ شاراسىنا دەنيس تەننىڭ رەسەيدەن ارىپتەستەرى مەن جاتتىقتىرۋشىلارى كەلدى. ولاردىڭ اراسىندا سسرو-نىڭ ەڭبەك سىڭىرگەن جاتتىقتىرۋشىسى، حالىقارالىق دارەجەدەگى سسرو سپورت شەبەرى، رەسەيدىڭ ەڭبەك سىڭىرگەن ارتيسى تاتيانا تاراسوۆا دا بار.
ءبارى جاقسى، ءبارى دۇرىس. ءبىراق، مەموريالدى تاقتانى سالتاناتتى تۇردە ورناتۋ شاراسىندا قويىلعان باننەردە قازاق تىلىندە ءبىر اۋىز ءسوز بولماعانى قىنجىلتتى. بۇل جەردە قازاقستان رەسپۋبليكاسىنىڭ ءتىل تۋرالى زاڭى نەلىكتەن ورىندالماي وتىر؟ «بۇل مەموريالدى تاقتاداعى جازۋدى رەسەيدەن كەلگەن قوناقتار تۇسىنسە بولدى» دەگەن ۇعىمدى بىلدىرە مە؟
باننەردەگى ورىس تىلىندە جازىلعان ماتىندە قاتە كەتكەننەن كەيىن ورىستار ورنىنان ورە تۇرەگەلىپ شۋلاستى. قاتە جىبەرگەن مەكەمەنىڭ كەشىرىم سۇراۋىن تالاپ ەتتى. كەشىرىم سۇراتتى دا. گرامماتيكالىق قاتەنىڭ كەتكەنىن كەشىرمەدى. ورىستار انا ءتىلى ءۇشىن جانى اشىدى، ءوز قۇقىعىن تالاپ ەتتى. كەتكەن قاتەلىكتى جىلى جاۋىپ قويمادى.
ال باننەردە قازاق تىلىندە ءبىر اۋىز ءسوز جازىلماعانى ءۇشىن كىم كەشىرىم سۇرايدى؟ بۇل جەردە ماسەلە قاتەدەن دە تەرەڭىرەك، ياعني باننەردە قازاق تىلىنە مۇلدە ورىن بەرىلمەگەنىندە بولىپ تۇر ەمەس پە؟ ورىسشا ماتىندە كەتكەن قاتەلىگى ءۇشىن باننەردى جاساعان مەكەمە كەشىرىم سۇراسا، باننەردە قازا تىلىندە ءماتىن بولماعانىنا شارانى ۇيىمداستىرعان ۇيىم تۇسىنىكتەمە بەرىپ، كەشىرىم سۇراۋىن تالاپ ەتەمىز.
دەنيس تەن رەسەيدە، شەتەلدە جاتتىقسا دا، ول – قازاقستاننىڭ سپورتشىسى. قازاقستاننىڭ ازاماتى. سپورت دوداسىنا دا ءبىزدىڭ ەلىمىزدىڭ اتىنان شىعىپ، قازاقستاننىڭ تۋىن كوكتە جەلبىرەتتى. ءبىراق تەن ابىرويىن اسىرعان مەملەكەتتىڭ ءتىلى نەلىكتەن ەلەۋسىز قالدى؟
رەسەيدەن كەلگەن قوناقتار باننەردە بىردە-بىر قازاق تىلىندە ءسوز بولماعانىنا ميىعىنان كۇلىپ كەتكەن بولار.
بۇل رەتتە تەك رەسەي ەمەس، الەمدىك مۇز ايدىنىنىڭ حانزاداسى دەنيس تەننىڭ قۇرمەتىنە، ونىڭ تۋىپ-وسكەن ۇيىنە مەموريالدى تاقتانى ورناتۋ شاراسىنداعى باننەردە مەملەكەتتىك تىلگە ورىن تابىلماعانى ۇيات...
