«پرەدكي،
ۆ بويۋ پوددەرجيتە مەنيا پود مىشكي.
ودينوكوە دەريەۆو نە وبويدۋ.
يا پوۆەشۋ اركان
نا كريۆوم سۋكۋ.
يا نە پەرۆىم –
ۆ پوسلەدنەم بويۋ ۋپادۋ.
كتو نە زناەت مويۋ زولوتۋيۋ ساكۋ؟..»
ولجاس سۇلەيمەنوۆ.
ءى.
ولجاستىڭ ءسوزى – ورىس،
ءوزى – قازاق!
تامىرىنا تانىمى،
تەرەڭ، تازا-اق...
ولجاستىڭ ويى – ورىس،
سويى – قازاق!
بويلاي الماس تەكسىزىڭ،
ويىنا ساپ...
ولجاستىڭ ءتىلى – ورىس،
جىرى – قازاق!
الجاستىق ۇلىمىزدان،
«ۇرى» جاساپ...
ولجاستىڭ جۇرتى – ورىس،
ۇلتى – قازاق!
تالانتى مەن تالعامى،
تۇرقى قازاق.
ولجاستىڭ «جانى» – ورىس،
قانى – قازاق!
قازاقتىق قۇن سۇيىلار،
تانىماساق؟!.
ولجاستىڭ ءتورى – ورىس،
ءتولى – قازاق!
قىپشاقتى اسپانداتقان،
ءبورى قازاق.
ولجاستىڭ جارى – ورىس،
بارى... – قازاق!
جۋساننىڭ ءيسى سىڭسە،
ءبارى قازاق!
ءىى.
ءاربىر جولى...
سىلكىلەگەن جىر مىنا...
(ءۋاج ايتپا –
بۇرا تارتار...
سىرعىما...)
«اق شالعىدان اۋناپ تۇسكەن ورنىنا،
ءشوپتىڭ ءيىسى كەلسىن دەسەڭ مۇرنىڭا...»
ناعىز قازاق...
تۇلپار مىنەز تەبىنىپ...
اتوي سالار شەپ تە بۇزىپ...
شەگىنىپ...
«ءشول دالاعا ايدىڭ نۇرى توگىلىپ،
بۋرالار ءجۇر ىنگەندەرگە ەمىنىپ...»
ءىىى.
...ولجاعام ويدا تۋدى ورىس باسقان...
(ويپاڭدا ويلى-ويسىز شالىس باسقان...)
جاسىنان جات-جاداعاي بىلدىر شىعىپ،
(ەرىكسىز ەسىل تىلدەن...
«الىس قاشقان»...)
تۇنىقسىز...
تۇماندانىپ تۇرادى ەلەس.
ساياسات...
دارىندىنىڭ سۇراعى ەمەس.
سەرگەلدەڭ، سارتاپ كەزەڭ ۇكىمى ءۇشىن،
ەشكىمنىڭ جەكە باسى... –
كىنالى ەمەس!
ادىلەت... –
ازاپ سوقپاق...
ۇزاعىن-اي...
اۋىسار قىزارىپ كۇن، قىزارىپ اي!
قىپشاقتا ءتىل بەزەگەن بىلگىرلەر كوپ،
ۇلىقسىڭ...
قۇرىعى ۇزىن، ۇزانىم-اي!
نار كوكەم!
ءور كەۋدەلى، ەركەك تەكتى.
بايانسىز، بەرەكسىز تەر توكپەپتى.
«ءسوز باسى...
قىپشاقتاردىڭ ەنشىسى» – دەپ،
ورماننىڭ بار عىلىمىن ورتەپ كەتتى...
(سىرعاقتىڭ جالداۋ-جانى جىلىماعان،
بەلگىلى قۇبىلمالى سىرى ماعان...)
وراي تاۋىپ جاراتقان...
ورمانسىز-اق،
ىرىسى ىڭىرانار ۇلى دالام!
كونەنىڭ كوسەم ءسوزى –
جارقىن باتا.
القاۋعا قاندىرعاندا القىمداتا!
انانىڭ ءتىلى سىڭگەن قان-جانىنا،
ءار قازاق... –
جارقىراعان التىن ساقا!
...التىن ساقا – الاشتىڭ ەسكەرگەنى...
(الدى – ءجون، ارتى – سوقپاق...
دەس بەرگەنى...)
سۇرىنگەندى سۇيەگەن... –
سەركە قىلىق،
كەشىرىم...
قۇلاتپاعان ەش پەندەنى!
مىڭجان بايجانين،
18 مامىر 2018 جىل.
پىكىر قالدىرۋ