"قاسىرەتكە ۇشىراعان ادامنىڭ ورنىنا ءوزىڭدى قويعان كەزدە عانا شىنايى جاناشىرلىق باستالادى"، -  دەيدى ليەۆ تولستوي. تۇرىك فوتوگرافى ۋگۋر گاللەننىڭ شىعارماشىلىعى وسى ءسوزدى ايقىنداپ، اشا تۇسەدى. ول ءوز شىعارماشىلىعى ارقىلى ەكى الەمنىڭ ەكى ءتۇرلى كورىنىسىن ءبىر سۋرەتكە توعىستىرىپ، عالامدا بولىپ جاتقان پروبلەمانى كوتەرە ءبىلدى دەپ جازادى Qamshy.kz اقپارات اگەنتتىگى. 

ۋگۋر گاللەن ءوزىنىڭ شىعارماشىلىق سۋرەتتەرىن ينستاگرام پاراقشاسىنا جاريالادى.

«بەيكۇنا ادامداردىڭ ولىمىنە سەبەپكەر بولعان قاتىگەز سوعىستى باقىلاپ تۇرىپ، ادامزات «ۇيدە دە الەمدە دە بەيبىتشىلىك ورناسىن» دەگەن مۇستافا اتاتۇرىكتىڭ ايتقانىنداي ءومىر سۇرسە ەكەن دەپ ويلايسىڭ»، - دەيدى فوتوگراف.

«مەنىڭ تۋعان جەرىم الەمدەگى ەڭ ءقاۋىپتى مەكەنگە جاقىن ورنالاسقان. مەن ءبىز ۇيرەنىپ قالعان قاراپايىم ءومىر مەن سوعىس بولىپ جاتقان ايماق تۇرعىندارىنىڭ ءومىرى اراسىنداعى جەر مەن كوكتەي ايىرماشىلىقتى بايقايتىنمىن. كەيىن ەكى بولەك الەمنىڭ اراقاشىقتىعىن جاقىنداتىپ، ادامزاتقا وي سالۋدى ويلاپ، ءبىر سۋرەتكە سىيعىزدىم»، - دەيدى فوتوگراف.

ەسكەرتۋ: سۋرەتتەردە زورلىق-زومبىلىق پەن قاتىگەز كورىنىستەر بار. 

وڭ جاقتاعى سۋرەت الەمگە تانىمال سۋرەتتەردىڭ ءبىرى. بۇل - سۋداندا بولعان وقيعا. اشتىقتان ولگەلى جاتقان قىزدى جىرتقىش قۇس باقىلاپ تۇر. وسى ساتكە كۋا بولعان فوتوگراف بىردەن فوتواپپاراتىن قولىنا الىپ، سۋرەتكە ءتۇسىرىپ الادى. ال الگى شىناشاقتاي قىزدىڭ ءتىرى، نە ءولى ەكەنىن ەشكىم بىلمەيدى. ءتىپتى سۋرەتكە تۇسىرگەن كارتەردىڭ دە حابارى جوق. فوتوگراف بۇل سۋرەت ءۇشىن ارنايى ماراپات تا العان. كەيىن الەمدىك ب ا ق كارتەردى سىنعا العاننان كەيىن فوتوگراف وز-وزىنە قول جۇمسادى.