28 قاراشادا جاستار جىلى قارساڭىندا جانە قازاقستان رەسپۋبليكاسى تۇڭعىش پرەزيدەنتى كۇنىن مەرەكەلەۋ اياسىندا ءال-فارابي اتىنداعى قازاق ۇلتتىق ۋنيۆەرسيتەتىندە «مەن جاستارعا سەنەمىن!» VI رەسپۋبليكالىق ستۋدەنتتىك پاتريوتتىق جاستار فورۋمى ءوتتى.

فورۋم جۇمىسىن ءال-فارابي كىتاپحاناسىنداعى «ۇلى دالا جاستارى» كونفەرەنسياسى اشتى. وعان فورۋمنىڭ ىرىكتەۋ كەزەڭىنەن ءوتىپ ەلىمىزدىڭ 70 ايماقتىق ۋنيۆەرسيتەتىنەن كەلگەن 500-دەن اسا ستۋدەنت قاتىستى.

تۇڭعىش پرەزيدەنت كۇنىنە وراي ۇيىمداستىرىلاتىن فورۋم التى جىل ىشىندە ەلىمىزدىڭ بارلىق جاستارى ءۇشىن ماڭىزدى شىعارماشىلىق الاڭعا اينالدى. ول قازاقستان بولاشاعى جولىندا جاس ۇرپاقتىڭ پاتريوتتىق سەزىمىن جانە ازاماتتىق جاۋاپكەرشىلىگىن ارتتىرۋعا، جاستاردى قوعامدىق سانانى جاڭعىرتۋ ۇدەرىسىنە تارتۋعا باعىتتالعان. وسى جىلى فورۋمعا قاتىسۋ ءۇشىن ۇيىمداستىرۋ كوميتەتىنە قازاقستاننىڭ بارلىق وڭىرىنەن 2 مىڭعا جۋىق ستۋدەنت ءوتىنىش جولداعان.

2013 جىلدان بەرى وتكىزىلىپ كەلە جاتقان فورۋمنىڭ باعدارلاماسى ءداستۇرلى تۇردە ءتورت بايقاۋدان تۇرادى: «ەلىمىزدىڭ يننوۆاسيالىق دامۋىنا قوسقان مەنىڭ ناقتى ۇلەسىم» اتتى ستۋدەنتتىك الەۋمەتتىك ماڭىزى بار يننوۆاسيالىق جوبالار؛ «مەن ءوز ەلىمنىڭ گۇلدەنۋى ءۇشىن نە ىستەي الامىن؟» اتتى ستۋدەنتتىك ەسسەلەر؛ «مەن جاستارعا سەنەمىن!» اتتى ستۋدەنتتىك ازاماتتىق-پاتريوتتىق باعىتتاعى پوەزيالىق شىعارمالار؛ «ماڭگىلىك ەل مۇراتىم!» پاتريوتتىق اندەر بايقاۋى.

ءو. جولداسبەكوۆ اتىنداعى ستۋدەنتتەر سارايىندا وتكەن ۇلكەن گالا-فورۋمدا بايقاۋلاردىڭ جەڭىمپازدارى مەن جۇلدەگەرلەرىنە سالتاناتتى تۇردە ديپلومدار جانە باعالى سىيلىقتار تابىس ەتىلىپ، ءبىرىنشى ورىن يەگەرىنە ءال-فارابي اتىنداعى قازۇۋ-دا ءبىر جىل تەگىن وقۋ گرانتى بەرىلدى.

قازىلار القاسىنىڭ شەشىمى بويىنشا ءبىرىنشى ورىن ەڭ ۇزدىك يننوۆاسيالىق جوبا ءۇشىن ش.ەسەنوۆ اتىنداعى كاسپيي مەملەكەتتىك تەحنولوگيالار جانە ينجيرينينگ ۋنيۆەرسيتەتىنىڭ ستۋدەنتى اينۇر قۋانوۆاعا بەرىلدى. پوەزيا سەكسياسى بويىنشا م. ساپاربايەۆ اتىنداعى وڭتۇستىك قازاقستان گۋمانيتارلىق ينستيتۋتىنىڭ ستۋدەنتى سۇندەت سەيتوۆ جەڭىسكە جەتسە، ستۋدەنتتىك ەسسە بايقاۋىندا م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنەن كەلگەن ساعييەۆا ايجان ماراپاتقا يە بولدى. ال پاتريوتتىق اندەر سەكسياسى بويىنشا باس جۇلدەنى قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ستۋدەنتى رۋسلان تولەگەن ەنشىلەدى.

«ەلباسى كەلەر جىلدى – جاستار جىلى دەپ اتادى. مەملەكەت ستۋدەنتتەر ماسەلەلەرىنە ەرەكشە كوڭىل بولەدى. ءبىلىم الۋعا گرانت سانى كوبەيىپ، جاتاقحانالار سالىنۋدا، جۇمىسقا ورنالاستىرۋ، قايتا دايارلاۋ باعدارلامالارى قاراستىرىلعان. بىزگە عىلىمي زەرتتەۋ جوبالارىمىزدى كورسەتىپ، شىعارماشىلىعىمىزدى شىڭداۋعا مۇمكىندىك بەرگەندەرى ءۇشىن فورۋم ۇيىمداستىرۋشىلارىنا راحمەت ايتامىن. ءبىز جاقسى تاجىريبە جينادىق جانە جاڭا دوستار تاپتىق. فورۋم كەرەمەت دەڭگەيدە ءوتتى. ەرەكشە العىسىمدى ءبىزدى قۇشاق جايا قارسى العان قازۇۋ-عا جەتكىزگىم كەلەدى. ماعان كامپۋس وتە ۇنادى. وسىندا ماگيستراتۋراعا ءتۇسىپ، وقۋدى جالعاستىرعىم كەلەدى»، - دەيدى اينۇر قۋانوۆا. گالا-فورۋم قاتىسۋشىلارىنا قازۇۋ شىعارماشىلىق ۇجىمىنىڭ جانە قازاقستاندىق تانىمال ەسترادا جۇلدىزدارىنىڭ مەرەكەلىك باعدارلاماسى ۇسىنىلدى.

فورۋم ءال-فارابي اتىنداعى قازاق ۇلتتىق ۋنيۆەرسيتەتى، «جاندانۋ الەمى» قورى جانە «جاس وتان» جاستار قاناتى، جازۋشىلار وداعى، قازاق راديوسى بىرلەسە ۇيىمداستىرۋىمەن، ق ر ءبىلىم جانە عىلىم مينيسترلىگى، الماتى قالاسى اكىمدىگىنىڭ قولداۋىمەن ءوتتى.