ەلۆيرانى 2010 جىلدان بەرى تانيمىن. قازۇۋ-دىڭ فيلولوگيا فاكۋلتەتىن بىتىرگەن. كەيىن ءوزىم ينتەرنەت جۋرناليستيكا سالاسىنا قادام باسقان سوڭ، ەلۆيرانى بلوگەر رەتىندە تانىدىم. ول – ءوزىن ءوزى قالىپتاستىرعان، قوعامعا ۇلكەن ۇلەسىن قوساتىن جاستىڭ ءبىرى. ونىڭ بءىر ءفيلمنىڭ سەنارييىنە دايىن بولارلىق كۇردەلى ءومىر جولى بار. باستىسى، ول سول قيىندىقتىڭ بارىنەن قايسارلىق، تاباندىلىق، ءبىلىم مەن ىزدەنۋ ارقىلى ءوتتى.
–ەلۆيرا ەرعالينا كىم؟
–وي، ءتىپتى سۇراعىڭىزعا قالاي جاۋاپ بەرەرىمدى ويلانىپ وتىرمىن. تۇركىستان وبلىسى، ورداباسى اۋدانىنىڭ تۋماسىمىن. فيلولوگ، مادەنيتتانۋشى ماماندىعى بويىنشا ديپلومىم بار. ءبىراق، جۋرناليستيكا سالاسىندا قىزمەت ەتتىم. قولونەرمەن دە اينالىستىم، شاش ارلەۋ ءىسىن دە مەڭگەرىپ الدىم. SMM بويىنشا دا ءبىراز جۇمىس اتقاردىم، ءالى دە ىستەپ جاتىرمىن، ونلاين مارافون، ساباقتار وتكىزىپ تۇرامىن. تەلەارنالاردا رەداكتور، پروديۋسەر بوپ، ءتىپتى ەكرانعا دا شىقتىم. ءقازىر پسيحولوگيا بويىنشا ىزدەنىپ، ءبىلىم الىپ، بىلگەنىممەن ءبولىسىپ ءجۇرمىن. ءوزىمدى سەلف-مەيد مامانىمىن (ءوز كۇشىمەن تابىسقا، مانساپقا جەتەتىندەر - رەد) دەپ ەسەپتەيمىن. ال ومىردە ءوز ميسسيامدى ورىنداۋ ءۇشىن جۇرگەن قاراپايىم عانا اداممىن.
–ەلۆيرا، ءوزىڭىز دە اناسىز. بالا قوعامعا قاراپ وسە مە، الدە وتباسىنداعى تاربيەگە قاراي ما؟
–يا، 10 جاستاعى قىز بالانىڭ اناسىمىن. بالا ومىرگە كەلگەن سوڭ ءوزىن اناسى ارقىلى تانيدى. وزگەمەن، الەممەن قاتىناستى اكەسى ارقىلى تانيدى. وسە كەلە اكە-شەشەسىنىڭ بىر-بىرىنە دەگەن قارىم-قاتىناسىن بويىنا ءسىڭىرۋ ارقىلى ەرەسەك ومىرگە بەيىمدەلەدى. اقىل-ويى مەن سانا-سەزىمى جەتىلگەن شاقتا قوعام دا وعان اسەر ەتە باستايدى. ال، اقىل توقتاتقاسىن جۇرگەن ورتاسى وزگەرتەدى. قانداي جاعداي بولسىن، بالانىڭ ءومىر ءسۇرۋ ساپاسىنا بالالىق شاقتىڭ تىكەلەي قاتىسى بار. كىشكەنتايىنان كورگەن-بىلگەنى، تۇيگەنى اكە-شەشە، تۋىستارىنىڭ ارەكەتى بولعاندىقتان ءومىر ءسۇرۋ شابلونىن سولاردان الادى. ءسويتىپ، بولاشاعىنىڭ ىرگەتاسى قالانادى. ءتاننىڭ ءوسۋى بەلگىلى ءبىر مەجەگە كەلىپ توقتاعانىمەن، جان مەن سانانىڭ ءوسۋى توقتامايدى ەمەس پە؟ ادامنىڭ ۇنەمى جەتىلىپ وتىرۋىنا وتباسى دا، قوعام دا بەلگىلى دارەجەدە ىقپال ەتەدى.
–قىزىڭىزبەن ايەل بولمىسى تۋرالى اشىق اڭگىمەلەسىز بە؟
–قازاقتا اناسى مەن قىزى اراسىندا اشىق اڭگىمە كوپ ايتىلا بەرمەيدى. ءبارىن ەجەلدەن ەتەنە تانىس «ۇيات» سوزىمەن جاۋىپ قويامىز ءبارىن. ءوزىم - اتا-اجەنىڭ قولىندا تاربيەلەنگەن تۇڭعىش نەمەرەمىن، سولاردى «ماما، پاپا» دەپ وسكەنمىن. ال، بيولوگيالىق تۇرعىدان اكە-شەشەمدى «اعا-جەڭگە» دەدىم، بايلانىس تا وتە الشاق بولدى. وزىندىك سەبەپتەرى بار جايت بولسا دا، قازاق ءۇشىن جاقسى تانىس دۇنيە عوي. بويجەتىپ، اعزامدا بەيتانىس قۇبىلىستار بولىپ جاتقاندا ونىڭ نە ەكەنىن تۇسىندىرەتىن ەشكىم بولمادى. جوق، اجەم ۇنەمى جانىمدا بولدى. الايدا ارامىزداعى جاس الشاقتىعىنان دا بولار، جاقىن سىرلاسا المادىق، ايەل بولمىسى، ءتاننىڭ جەتىلۋى تۋرالى مۇلدە سويلەسپەدىك دەسە دە بولادى. قاجەت دەپ ويلاماعان دا بولار. كەمپىردىڭ قىزى بولعاندىقتان اناممەن ءتىپتى سويلەسپەيتىنبىز، ول باسقا قالادا تۇردى. قاجەت كەزدە سۇراپ الاتىن الدىمدا اپكەم دە جوق. وكىنىشكە قاراي، قىز بالاعا ناعىز مورالدىق قولداۋ كەرەك تۇستا جالعىز بولدىم. سول سەبەپتى بويجەتكەن كەزدە ءبىرقاتار پروبلەمالارعا ۇرىندىم...
ال «قىزىم ونعا تولدى» دەگەن ءسوز ءتوسى بىلىنە باستاپ، جىنىستىق جەتىلۋ كەزەڭى باستالعان شاعى. بۇل تانىندەگى وزگەرىستەرگە ۇركە قارايتىن كەزى. ول – تابيعات زاڭى، سوندىقتان وتپەلى كەزەڭدە اعزاداعى بۇل وزگەرىستەردى ءتۇسىندىرۋ وتە ماڭىزدى. تۇسىندىرمەسە، قىز بالادا وزىنە دەگەن سەنىمسىزدىك پايدا بولۋى مۇمكىن. ءتىپتى وزگەرىستەردەن قورىققاننان ءوز ءتانىن جەك كورە باستاۋى دا ىقتيمال. سونى بىلگەن ساتتەن قىزىمنىڭ سىرلاس جاقىن قۇربىسىنا اينالامىن دەپ شەشكەنمىن. جاقىندا عانا وعان ايەل بولمىسى مەن ونىڭ ومىردەگى ميسسياسى تۋرالى ايتتىم. بولاشاقتا ايەل، سوسىن انا بولاتىنىن ءتۇسىندىردىم. بويىندا قانداي دا قۇبىلىستار بولىپ جاتسا، بىردەن ماعان ايتۋىن ەسكەرتتىم. قىزىم عۇمىرىندا كەزدەسەتىن جايتتىڭ بارىنە مورالدىق تۇرعىدا دايىن بولۋى ءۇشىن اناسىمەن تىعىز بايلانىستا بولۋ كەرەگىن بىلەمىن. قازىردەن باستاپ ءوز بولمىسىن تانيتىن بولسا، ەرتەڭ ودان جاقسى انا، ادال جار، يبالى كەلىن شىعاتىنىنا سەنىمدىمىن. اڭگىمەمدى قىزىم مۇقيات تىڭداپ، جاقسى قابىلدادى. ول ءۇشىن مۇنىڭ بارلىعى وتە قىزىق بولعان سەكىلدى كورىندى.
–قىزىڭىزدى نەدەن نەمەسە كىمنەن قورعايسىز؟
–مەنىڭ ويىمشا، بالانى وسىپ-جەتىلگەنشە، ءوزىن دۇرىس قابىلداماۋدان جانە وزىنە دەگەن نازاردىڭ جەتىسپەۋشىلىگىنەن قورعاۋ كەرەك. تەك بەستىك باعا العاندا عانا ماقتاپ، قالعان ۋاقىتتا «جۇرتتىڭ بالاسىمەن» سالىستىراتىن اتا-انانىڭ ارەكەتى بالانىڭ جانىنا جاراقات سالادى. مۇنداي جاعداي ءوزىن جاقسى كورمەۋگە اپارىپ سوعادى. سوسىن وزىنە سەنىمسىز، قورقاق بولادى. قانداي جاعداي بولسىن مەن ونى جاقسى كورەتىنىمدى، ونى وسى بولمىسىمەن قابىلداي الاتىنىمدى قاشان دا سەزدىرگىم كەلەدى.
ال بالانى سىرتقى فاكتورلاردان قورعاۋ – ءار انانىڭ ەشكىم ايتپاسا دا اتقاراتىن مىندەتى عوي. جالپى جانى مەن ساناسىنىڭ تازالىعىن قورعاۋدى كوبىسى ەسەپكە الا بەرمەيدى.
–قازىرگى قوعامنىڭ دەرتى نە، ءسىز ءۇشىن؟
– «قازىرگى قوعامنىڭ دەرتى –مىناۋ» دەپ دياگنوز قويىپ، وزىمە اۋىر جاۋاپكەرشىلىك العىم كەلمەيدى. ايتسە دە، ويىمدى ايتايىن. ۇلتىمىز ءوز بولمىسىنان، قازاقي قالپىنان ايرىلا باستاعان سەكىلدى. جوق، ويۋلى شاپان، قوس ەتەك بۇرمە كويلەك كيىپ، ورىندى-ورىنسىز قازاق ءتىلىن تالاپ ەتىپ، جايلاۋدا، كيىز ۇيدە ءومىر ءسۇرۋدى ايتىپ وتىرعان جوقپىن. تالاي سوعىس پەن اشارىلىقتى، قۋعىن-سۇرگىن مەن قيىندىلىقتى باستان وتكەرىپ، تىرشىلىكتىڭ قامىمەن جانتالاسىپ جۇرگەندە وتباسىلىق تاربيە ينستيتۋتىن جوعالتىپ الدىق-اۋ. وتباسىلىق ينستيتۋتتىڭ السىرەۋىنەن قازىرگى بۋىن قازاقى تاربيەدەن الشاقتاپ بارادى دەپ ويلايمىن. نە ءدىندى، نە ءداستۇردى، قىسقاسى قاي رۋحاني ءىلىمدى ۇستانارىن بىلمەي اداسىپ ءجۇر. قويىرتپاق قوعامنىڭ قولبالا بالاسىنا اينالىپ كەتتى –اۋ. ءدىني فاناتيزمنىڭ تۇبىنە تۇسكەن جاستار كوپ. شاراناسىن قوقىسقا تاستاپ جاتقان قىزدار قانشاما؟! اجىراسۋدىڭ كوبەيۋى دە انا مەن قىزدىڭ اراسىنداعى بايلانىس پەن اشىق اڭگىمەنىڭ سەتىنەۋىنەن شىعار. ءبىراق بۇل جايتتان شىعار جول بولادى، ءالى!
–ءسىز سۋيسيد جاساماق بولعانىڭىز جايلى ءوز بلوگىڭىزدا جازدىڭىز. ولىمنەن باسقا تاڭداۋ بولماعانى ما، سوندا؟
–يا، بىلتىردان باستاپ سۋيسيد جاساعانىم جايلى شىندىعىمدى ايتا باستادىم. وعان دەيىن دوس-جاران، ءتىپتى اتا-اناما «ابايسىزدا قۇلاپ قالدىم» دەپ الداپ كەلگەنمىن. جەتى جىل بۇرىن ءتورتىنشى قاباتتىڭ تەرەزەسىنەن ءوزىمدى تاستاپ جىبەردىم. ارينە، بۇل - ماقتاناتىن نارسە ەمەس. جاريا قىلىپ، ءسۋيسيدتى دارىپتەپ تە وتىرعانىم جوق. دەسە دە، سول اقىماق ارەكەت جاساعانىمدى ايتۋ ارقىلى قيىندىقتىڭ ءبارى وزىڭە قول جۇمساۋمەن شەشىلە سالمايتىنىن جۇرتشىلىققا تۇسىندىرگىم كەلەدى.
مەن مۇنى كەزدەسكەن پروبلەمالاردان قاشۋ ءۇشىن جاسادىم. ءبىراق امان قالدىم، پروبلەمام مۇنان كەيىن ءتىپتى ەكى ەسەلە ءتۇستى. جانىمنىڭ اۋىرعانى ازداي، ەندى ءتانىم جاراقات الىپ، قاتتى قينالدىم. قيىندىقتىڭ ۇستىنە قيىندىق قوسىلىپ، ومىرتقام مەن اياعىما ايتارلىقتاي زاقىم كەلدى. ءبىر جىلعا جۋىق توسەكتە جاتىپ، اياققا تۇرعاسىن تانىممەن قاتار، جانىمدى دا ەمدەۋگە كىرىستىم. قاتەلىكتەرىمنەن ساباق الدىم. جالپى، قازاقستان سۋيسيد جاساۋ بويىنشا الەمدىك ستاتيستيكادا ءتورتىنشى ورىندا تۇر ەكەن. دەمەك، «اينالامىزدا وزىنە كوڭىلى تولمايتىن، وتكىنشى قيىندىققا شىداماي،. سونىڭ بارىنەن ءوزىن قۇرباندىققا شالۋ ارقىلى قۇتىلامىن» دەپ ويلايتىن زامانداستارىمىز كوپ. «سۋيسيدتەن كەيىن اياققا قالاي تۇرعانىمدى ايتىپ، سوڭعى شەشىمدى ولىمنەن ىزدەپ جۇرگەن زامانداستارىما كومەگىمدى تيگىزسەم» دەپ ويلاندىم. سەبەبى، ءتورتىنشى قاباتتان قۇلاعان ادامنىڭ ءتىرى قالماۋى دا مۇمكىن ەدى. مەنى پەرىشتە قاقتى، اياعىمنان تۇرعىزدى. سونداي جاعدايدان امان الىپ قالعانىنان بولەك، مەنى ارمان-ماقساتتارىما نىق قادام باسقىزدى. دەمەك مەن بىرەۋلەرگە كەرەكپىن. مەن وسىلاي باسىمنان وتكەن قيىنشىلىقتار ارقىلى باسقا ادامنىڭ ماڭگىلىك وكىندىرەر قاتەلىك جاساۋىنىڭ الدىن العىم كەلەدى. مەنىڭ ومىرلىك ميسسيام – وسى. كەز كەلگەن قيىندىقتان كەيىن دە جاقسى ءومىر سۇرۋگە مۇمكىندىك بار. سونى ءتۇسىندىرۋ ءۇشىن ءقازىر العاشقى قادام جاسالىنىپ جاتىر.
–قالاي ويلايسىز، ادام جاقسى ناتيجەگە جەتۋى ءۇشىن مىندەتتى تۇردە باسىنان قيىنشىلىق ءوتۋى كەرەك پە؟
–مەنىڭ تۇسىنىگىمشە، ادام ومىرگە بەلگىلى ءبىر ميسسيامەن كەلەدى. مۇمكىن، ءوزىنىڭ باستان وتكەرگەنى ارقىلى بىرەۋگە كومەكتەسۋدى ۇيرەنۋى كەرەك شىعار. بالكىم كەشىرۋدى دە ۇيرەنۋى كەرەك بولار. ادام سول ميسسياسىن ورىندامايىنشا، ول پروبلەما بولىپ الدىڭنان شىعا بەرەدى. پروبلەما ءبىر، تەك سونى وينايتىن اكتەرلەر عانا ءارتۇرلى. مىسالى، ءبىر قىزدىڭ اكەسى ىشكىش، شەشەسىنە قول جۇمسايتىن تيران بولۋى مۇمكىن. قىز سوسىن اكەسىنە سول ءۇشىن رەنجىپ وسەدى. قىز بولاشاق كۇيەۋىن اكەسى ارقىلى تانيدى. اكەسىنە وكپەسى ورشىگەن قىز بۇكىل ەركەكتى اكەسى سياقتى «ناشار ادام» دەپ ويلايدى. قانشا جەردەن اكەسىن جاقسى كورگەنىمەن، جۇرەگىنىڭ تۇبىندە ۇلكەن رەنىش بۋلىعىپ جاتۋى مۇمكىن. بوي جەتكەننەن سوڭ، جىگىتپەن قارىم-قاتىناسىندا ءتۇرلى قيىندىقتار تۋىنداي باستايدى. اكەسىنىڭ ماحابباتىنا ءزارۋ بولىپ وسكەن قىزدىڭ كەز كەلگەن ەركەكتىڭ جىلى سوزىنە ەري سالۋى دا وڭاي. جولىندا كەزدەسكەن جىگىتتىڭ ءبارىنىڭ ىڭعايىنا كونە سالۋى دا مۇمكىن. ماحابباتقا ءزارۋ بولىپ ءجۇرىپ ەرتە تۇرمىسقا شىعىپ كەتۋى ىقتيمال. تۇرمىسقا شىققان سوڭ اكەسىنە دەگەن رەنىشى كۇيەۋىمەن قارىم-قاتىناستا دا كورىنىس تابا باستايدى. دەمەك، ونىڭ وبرازىنداعى ەركەكتىڭ ءبارى –وڭباعان. ول بارلىق ەركەك ايەلىنە تەك زورلىق- زومبىلىق كورسەتەدى دەپ سەنەدى. ءسويتىپ ءجۇرىپ اجىراسۋى، نە سول ومىرىنە كوندىگۋى دە مۇمكىن. ءوزى دە ۇل تۋادى. اكەگە دەگەن رەنىشىنىڭ سالدارىنان ءوزىنىڭ ۇلىنا دا «باياعى اكەدەن قالعان پروگراممانى» ورناتۋى مۇمكىن. ۇلى ۇيلەنگەسىن ونىڭ جەكە ومىرىنە دە ارالاسا باستايدى. كەلىنىمەن ارادا پروبلەمالار تۋىندايدى. ال اكەسىمەن و باستا قارىم-قاتىناسىن تۇزەپ، رەنىشىن مۇلدە ۇمىتقاندا، بۇل قىزدىڭ ومىرىندە وسىنشا پروبلەما بولمايتىن ەدى عوي؟ دەمەك، قيىندىق ادامعا ءبىر نارسەنى ەسكەرتەدى، سول ارقىلى ساباق الۋدى ۇيرەتەدى. ادايدا، ادام جاقسى ناتيجەگە جەتۋ ءۇشىن قينالۋى ءتىپتى مىندەتتى ەمەس. ەگەر وزىمەن ۋاقىتىلى جۇمىس ىستەپ، ءوز بولمىسىن تۇسىنسە، ساناسىن جەتىلدىرىپ، دامۋعا ۇمتىلاتىن بولسا، ناتيجەگە جەتۋى وڭاي. ال، «قيىندىق ارقىلى جەتىستىككە جەتەم» دەگەندەر ۋاقىتتان بۇرىن، ءوز پوتەنسيالىن ازايتىپ الادى. ابايشا ايتقاندا، «قولىمدى مەزگىلىنەن كەش سەرمەدىمنىڭ» كوكەسى سوندا بولادى.
–ەلۆيرا، ءقازىر ءسىز جانتانۋ سالاسىندا ونلاين-كۋرس وتكىزىپ ءجۇرسىز. قاتىسۋشىلار اراسىندا ەر ازاماتتار بار ما؟
–يا، «سانا ترانسفورماسياسى» اتتى ون بەس كۇندىك ونلاين-كۋرس جۇرگىزەمىن. مەن پسيحولوگ ەمەسپىن، پراكتيكپىن. ءقازىر رۋحاني ءوسۋ سالاسىندا كوپ ءبىلىم الىپ جاتىرمىن. ونلاين-كۋرستا باسىمنان وتكەن تاجىريبەلەرىمە سۇيەنەمىن. ءوز اكە-شەشەسىنەن الشاق، اتا-اجەسىنىڭ قولىندا وسكەن، 18 جاسىندا تۇرمىسقا شىعىپ، 19 جاسىندا انا اتانعان، 20 جاسىندا اجىراسىپ، 21 جاسىندا وزىنە قول جۇمساعان شيكى ەلۆيرا سول پروبلەمادان شىعۋ جولىندا ءبىراز ءبىلىم جينادى. نەگە سول ءبىلىمدى دۇرىس باعىتقا بۇرىپ، زامانداستارىما كومەكتەسپەسكە؟ وسى 15 كۇننىڭ ىشىندە ونلاين تۇردە بىرنەشە ادامعا بولسا دا كومەكتەسۋگە مۇمكىندىگىم بار. كۋرستىڭ مازمۇنى جۇيەلى. دامۋدى وتكەن ومىرمەن جۇمىس جاساۋدان باستايمىز. ناتيجەسى دە جاقسى شىعىپ جاتىر. العاشقى لەكپەن قاتىسقان 30 ادامنىڭ ىشىندە تەك ءبىر عانا ەر بالا بولدى. پسيحولوگيالىق ىزدەنىستە جۇرگەندەردىڭ كوبى ايەلدەر عوي، ءبىر جىگىتتىڭ كەلگەنىنىڭ وزىنە قۋاندىم.
*«سانا ترانسفورماسياسىنىڭ» باسقا كۋرستاردان ايىرماشىلىعى –بىر-بىرىنە ورىلگەن جۇيەلى ساباعىندا؛ وتكەنمەن، وكپە-رەنىشپەن ارىلۋ جۇمىستارىندا، سيقىرلى تاياقشانىڭ جوقتىعىندا، ءوز ءومىرىڭ مەن باقىتىڭنىڭ جاۋاپكەرشىلىگىن الۋعا ۇيرەتەتىنىندە.
–وسى باعىتتا نە ءۇشىن ەر ادامدار ىزدەنبەيدى، قالاي ويلايسىز؟
–ادەتتە بالانىڭ مي تالشىقتارى مەن اعزاسى ءۇش جاسقا دەيىن دامىپ بىتەدى. ودان كەيىن بالادا ويلاۋ جۇيەسى ىسكە قوسىلادى. ەندى ساناسى قالىپتاسىپ كەلە جاتقان ۇل بالاعا اتا-اناسى ءسال جىلاسا، «سەن ەركەكسىڭ عوي، جىلاما»، "ەركەك ەمەسسىڭ بە، ۇيات بولادى" دەپ ىشكى ەموسياسىن شىعارۋعا مۇمكىندىك بەرمەيدى. ءبىراق، ول ءالى ەركەك جاسىنا جەتپەگەن بالا عوي؟! ءبۇلدىرشىن وسىپ-جەتىلمەيىنشە، جىنىسقا بولىنبەيدى، وعان الدىمەن ءومىردى تانىتىپ الۋ كەرەك دەپ ويلايمىن. تيتتەيىنەن جيىرماداعى جىگىتتىڭ ارەكەتىن، نامىسىن تالاپ ەتۋدىڭ قاجەتى جوق. ەرجەتە باستاعاندا-اق تانىمىن ۇلعايتىپ، نامىسىن وياتۋعا كۇش سالۋعا بولادى. بالانى سەزىمىن اشىق ايتۋعا، ەموسياسىن شىعارۋعا ەش شەكتەۋ قويىلماۋى كەرەك. ال، شەكتەلدى ەكەن، ول ءوزىن جەتىلدىرۋگە قىزىقپايدى. بويىندا بار كەمشىلىگىن تۇزەۋگە تىرىسپايدى. پروبلەماسىن ەشكىمگە اشىق ايتا المايدى، ونىڭ شەشىمىن ىزدەۋگە اسىقپايدى. جاسىق بولۋى دا مۇمكىن. بويىندا بار پروبلەمانىڭ ءوزىن مويىنداماي، كوز جۇما سالۋ، جاۋاپكەرشىلىكتەن قاشۋ سولاي قالىپتاسادى.
–قاتىسۋشىلاردىڭ كوبىنىڭ پروبلەماسى قانداي؟
–"كۋرسقا قاتىسقانعا دەيىن سونشا پروبلەما مەندە عانا دەۋشى ەم. ەشكىمگە ەشتەڭە ايتپايتىن ەم، ۇيالاتىنمىن. سويتسەم، باسقا ادامداردا دا قيىندىقتار بار ەكەن. اعىنان جارىلىپ، اشىلۋدى ۇيرەنىپ جاتىرمىن"، –دەپ، جاقىندا ءبىر قاتىسۋشى اعىنان جارىلىپ حات جازدى.
ال قاتىسۋشىلاردىڭ پروبلەماسى بىر-بىرىنە وتە ۇقساس: وزىنە، ومىرىنە كوڭىلى تولماۋ؛ اكە-شەشەگە دەگەن رەنىشى؛ ادامدارمەن دۇرىس قاتىناس قۇرا الماۋ؛ ىشتەن ءمۇجيتىن قورقىنىشتار. بارىنە ورتاق نارسە - ءوزىن قابىلداي الماۋ، ولار ۇنەمى تانىنە، مىنەزىنە كۇڭكىلدەپ، وزىمەن-وزى الىسىپ جۇرەدى. ارينە، بۇل پروبلەمالاردىڭ ءتۇپ-تامىرى بالالىق شاقتا جاتىر.
–الەۋمەتتىك جەلىلەردەگى «حايپقۇمار» جاستار تۋرالى نە دەيسىز؟
–حايپ – ساتاتىن ونىمىنە، نە قىزمەتىنە نازار اۋدارتۋ ءۇشىن جاسالاتىن شۋ ەكەنىن بىلەسىز. وكىنىشكە قاراي، ەشتەڭە ساتپاسا دا، دىم بىتىرمەسە دە، حايپ جاساعىسى كەلەتىن جاستاردىڭ سانى ارتىپ كەلەدى،. مۇنىڭ ءبارى تەك ءبىر ساتتىك ەلەس سياقتى. ولار جۇرتتىڭ ۋاقىتشا تالقىلاۋى مەن ەلدىڭ اۋدارعان نازارىنا ءماز بولىپ جالعان سەزىمگە الدانادى. ءوزىم دە جۇرتتىڭ نازارىن اۋداراتىن ارەكەتتەر جاسادىم)). دەمەك، بالالىق شاعىندا اتا-اناسىنىڭ نازارى جەتىسپەي قالعان ادامدار كەشكە دەيىن ۇمىتىپ قالاتىن وسىنداي حايپقا قۇمار بولادى دەپ ويلايمىن.
–سۇحباتىڭىزعا راقمەت، ەلۆيرا. باستاماڭىزدىڭ كوپكە كومەگى تيۋىنە تىلەكتەسپىن.
اڭگىمەلەسكەن اقەركە ءابىلحان
