ۇلتتىق ەكونوميكا ءمينيسترى تيمۋر سۇلەيمەنوۆ دوللار باعامىنىڭ نەگە شارىقتاپ جاتقانىن ءتۇسىندىردى. بۇل تۋرالى Sputnik قازاقستان ءتىلشىسى حابارلادى.

سۇلەيمەنوۆتىڭ ايتۋىنشا، اقش ساياساتىنىڭ ءوزى امەريكالىق يۋريسديكسيا مەن قۇندى قاعازدارىنىڭ ينۆەستيسيالىق تارتىمدىلىعىنىڭ كۇشەيۋىنە ىقپالىن تيگىزەدى. بۇل، تيىسىنشە، دوللار مەن تولەم بالانسىنا اسەر ەتەدى.

"دوللارعا ىقپالىن تيگىزەتىندىكتەن، ول وسەدى دە، ال قالعان ۆاليۋتالار قۇلدىرايدى"، — دەدى مينيستر ۇكىمەت كۋلۋارىندا. 

تەڭگەنىڭ كۇن وتكەن سايىن قۇنسىزدانۋىنا ەكىنشى سەبەپ – ءالى تۇراقتاماي تۇرعان مۇناي باعاسى. 

"قارا التىن" قۇنى بىردە جوعارىلاپ، بىردە تومەندەپ تۇر. تيىسىنشە، بۇل تەڭگە باعامىنا اسەر ەتپەي قويمايدى"، — دەدى ول. 

جۋرناليستەر مينيستردەن دوللار باعامى 400 تەڭگەگە جەتە مە دەپ سۇرادى. 

"ەڭ دۇرىسى، مۇنى ۇلتتىق بانكتەن سۇراۋ. بىزدە كەلەسى جىلعا ارنالعان  الەۋمەتتىك-ەكونوميكالىق دامۋ بولجامىندا دوللار باعامى 370 تەڭگە دەڭگەيىندە كورسەتىلگەن"، — دەدى سۇلەيمەنوۆ.

ايتا كەتسەك، ءقازىر ۇلتتىق بانكتىڭ رەسمي سايتىندا دوللار باعامى 380،44 تەڭگەنى كورسەتىپ تۇر. ال قازاقستان قور بيرجاسىندا (KASE) تاڭعى سەسسيا بويىنشا دوللاردىڭ ورتاشا سارالانعان باعامى – 383،46 تەڭگە.