بۇل تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ءوزىنىڭ Facebook الەۋمەتتىك جەلىسىندەگى جەكە پاراقشاسىندا جازدى. «جاستار جىلىنىڭ» رەسمي تۇردە باستالۋىنا وراي ءوز پىكىرىن بىلدىرگەن ول ەلباسى بەرگەن تاپسىرمالاردىڭ ورىندالۋىن «نۇر وتان» پارتياسى ءوز باقىلاۋىنا الاتىنىن ايتقان.

«بۇگىن ەلباسى «جاستار جىلىن» رەسمي تۇردە باستاپ بەردى. سالتاناتتى ءىس-شارانىڭ «نۇر الەم» بولاشاقتىڭ ەنەرگياسى ەكسپو-مۋزەيىندە ءوتۋى دە تەگىن ەمەس. سەبەبى، تاۋەلسىز قازاقستاندا تۋىپ-وسكەن، «بولاشاق» باعدارلاماسى ارقىلى الەمنىڭ ەڭ وزىق جوعارى وقۋ ورىندارىندا ءبىلىم العان، ساناسى اشىق، تىڭ يدەيالارعا باي ءبىزدىڭ بۇگىنگى جاستارىمىز – ەلىمىز ءۇشىن ناعىز بولاشاقتىڭ ەنەرگياسى.

فورۋمدا مەملەكەت باسشىسى «جاستار جىلىن» ناقتى ىستەرمەن وتكىزۋدىڭ كەشەندى شارالارىن جاريالاپ، مەملەكەت تاراپىنان جاستاردى قولداۋدىڭ ءتيىمدى تەتىكتەرىنە نازار اۋداردى. اتاپ ايتقاندا، ەلىمىزدىڭ ءىرى مەگاپوليستەرىندە جالدامالى باسپانالار سالۋ، جاس عالىمدارعا گرانتتار ءبولۋ، جاس ونەرتاپقىشتاردىڭ ستارتاپتارىن قولداۋ قورىن قۇرۋ، جوعارى ءبىلىمنىڭ ساپاسىن ارتتىرىپ، قولجەتىمدىلىگىن قامتاماسىز ەتۋ جانە جۇمىسپەن قامتۋ ارقىلى جاستاردىڭ جان-جاقتى دامۋىنا جاعداي جاساۋ كوزدەلىپ وتىر. مۇنىڭ بارلىعى جاستارعا بەرىلىپ وتىرعان جاڭا مۇمكىندىكتەر.

مەملەكەت باسشىسى وسى يگى ىستەردى جۇزەگە اسىرۋدا پارتيامىزدىڭ ءرولىن ەرەكشە اتاپ ءوتىپ، «نۇر وتان» جاستار ساياساتىنىڭ باستى درايۆەرى بولۋى كەرەك، دەدى. سوندىقتان ءبىز ەلباسىنىڭ سەنىمدى تىرەگى رەتىندە مەملەكەت باسشىسى بەرگەن بارلىق تاپسىرمالاردىڭ ءتيىمدى جۇزەگە اسىرىلۋىن ءوز جاۋاپكەرشىلىگىمىزگە الامىز. بۇل ىستە پارتيامىزدىڭ جاستار قاناتى ەلىمىزدىڭ جاستار ساياساتىنىڭ باستى ورتالىعىنا اينالۋى ءتيىس. سوندىقتان «جاس وتان» بولاشاعى زور، كرەاتيۆتى جانە بەلسەندى جاستاردىڭ كۇش بىرىكتىرىپ، ەل مۇددەسىنە ەڭبەك ەتۋىن قامتاماسىز ەتەتىن بولادى.

وسىعان وراي، ەلىمىزدىڭ بارشا جاستارىن «جاستار جىلىمەن» قۇتتىقتايمىن. «جاستار جىلى» ءبىزدىڭ وسكەلەڭ ۇرپاققا مول مۇمكىندىكتەر بەرىپ، جاڭا بيىكتەرگە جول اشىپ بەردى. وسى جولدا ءار قازاقستاندىق جاسقا ساتتىلىك پەن تابىس تىلەيمىن»، – دەلىنگەن جازبادا.