مەملەكەت تاراپىنان قولداۋلار كوپ كورسەتىلۋدە. ءبىز سونى باعالاي ءبىلىپ، دەر كەزىندە ارەكەت جاساي ءبىلۋىمىز كەرەك. مەن قازاقستانداعى ەڭ جاس رەكتورلاردىڭ ءبىرىمىن. ءقازىر جاستاردى قولداۋ ساياساتى وتە ۇلكەن كۇش الىپ جاتىر. مادەنيەت، ونەر بولسىن كونسەرۆاتوريادا تالانتتى جاستار وتە كوپ. ءقازىر ءبىز وبلىستارداعى قانشاما ونەرلى جاستاردى وزىمىزگە تارتىپ، سولاردان ۇلكەن كاسىبي مامان دايارلاۋعا كۇش سالىپ جاتىرمىز. حالىق مۋزىكاسى فاكۋلتەتى، ۆوكالدىق ونەر بولسىن اۋىلدان كەلگەن جاستاردى، ءبىرىنشى كۋرستىڭ ستۋدەنتتەرىن اكادەميالىق ۇتقىرلىق باعدارلاماسى اياسىندا شەتەلگە جىبەرىپ، بىلىكتىلىگىن ارتتىرۋدى باستاپ كەتتىك. ءبىز بۇگىن ستۋدەنتتەردىڭ ساپالى ءبىلىم الۋىنا بارلىق جاعدايدى جاساۋىمىز كەرەك. ويتكەنى، ولار وتە كرەاتيۆتى، ءبىز جاستارمەن ساناسۋىمىز قاجەت. ءبىزدىڭ ۋنيۆەرسيتەتتە جاستارمەن ءجۇمىس ىستەيتىن ءبولىم بار. «مەندە يدەيا بار، وسى ءىستى جۇزەگە اسىرايىقشى» دەپ جالىنداپ تۇرعان ستۋدەنتتەر كەلسە، ءبىز ولاردى تىڭداپ، ولارمەن بىرگە جۇمىس جاسايمىز. جاستار جالقاۋلانباۋ كەرەك. بۇكىل جاقسىلىق ولاردىڭ وزىنە بايلانىستى. ۋنيۆەرسيتەت باسشىلىعى تاراپىنان ءبىز «ءسوزى مەن ءىسى بىرگە جۇرەتىن ىسكەر» جاستاردى قولداۋعا دايىنبىز.