روزا باعلانوۆانىڭ ەستەلىگىنەن:

مەكتەپ بىتىرگەن سوڭ قىزىلوردا پەداگوگيكا ينستيتۋتىنا ءتۇستىم، ءبىراق كەنەتتەن اكەم قايتىس بولىپ، تۋىستاردى جاعالاپ، تۇرمىستىق جاعدايعا وراي تاشكەنتتەگى توقىما ينستيتۋتىنا اۋىستىم. ينستيتۋت جاتاقحانا مەن ىشەر اسىڭدى تەگىن بەرىپ، بولاشاق توقىماشى قىزدارعا قامقورلىق جاسايدى ەكەن. مەنىڭ بالالىق، بويجەتكەن شاعىم اشارشىلىق پەن الاساپىران جىلدارىندا ءوتتى. تاعدىر ايداپ، اعايىندارىمدى پانالاپ، كۇنكورىس قامىمەن تۋعان ەلدەن جىراققا — تاشكەنتكە سولاي كەتكەنمىن…
ادەتتە ءۇيدىڭ تىرشىلىگىن جاساي ءجۇرىپ، ءان سالاتىن ادەتىم بار ەدى. ءالى ەسىمدە، ەسىكتىڭ الدىن سىپىرىپ، اندەتىپ جۇرگەنىمدە وزبەك فيلارمونياسىنىڭ ديرەكتورى داۋىسىمدى ەستىپ، "ءان ايتقان كىم؟" دەپ اۋلاعا كىرىپ كەلدى. سودان فيلارمونيا ديرەكتورى كاري ياكۋپوۆ اكانىڭ كومەگىمەن تاشكەنت فيلارمونياسىنداعى مەملەكەتتىك ايەلدەر ءان-بي انسامبلىندە ءانشى بولدىم. 1941 جىلى موسكۆا كونسەرۆاتورياسىنا جولداما العانىمدا سوعىس باستالىپ كەتتى.
مەن وزبەك حالقىنىڭ قامقورلىعىن كوپ كوردىم. وزبەكستاننان قازاقستانعا كەلۋىمە تىكەلەي سەبەپشى بولعان — اقىن اعامىز جۇبان مولداعالييەۆ. موسكۆادا جوعارى پارتيا مەكتەبىندە وقىپ جۇرگەن ول وزبەكستان اتىنان ءان سالىپ جۇرگەن قازاق قىزى بار دەپ ەستىپ، ارنايى ىزدەپ كەلدى. "پەريزاتتاي قىز ەكەنسىڭ، قاراعىم! وزبەكستاندا نە ءبىتىرىپ ءجۇرسىڭ؟" — دەدى وكتەم داۋىسپەن. قانداي كەلبەتتى جىگىت ەدى. جۇبان اعانىڭ قولداۋىمەن 1949 جىلى ەلگە كەلدىم. ماعان اكەمدەي قامقورشى بولعان ءبىرتۋار ازاماتتىڭ جاقسىلىعىن قالاي ۇمىتام. بۋداپەشتتە وتكەن ءان جارىسىنا مەنى ماپەلەپ قوسقان دا جۇبان اعا بولاتىن.

ەستەلىك اسەت اقمولدانىڭ Facebook-تەگى پاراقشاسىنان الىندى

ۇسىنعان: گۇلىم جاقان