تانىمال قازاقستاندىق بلوگەر قىز امينكا ۆيتامينكا (ءامينا مالعاجار) Nickelodeon - Kids Choice Award 2019 بالالار پرەمياسى نومينانتتار تىزىمىنە ەندى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

قىز بالا "رەسەيلىك تەلەكورەرمەندەرىنىڭ ۇزدىك جاڭا ۆيدەوبلوگەرى" ساناتىندا ۇسىنىلعان. ءاميناعا Viki Show، ەۆا ميللەر جانە ناستيا تروپيسەل سىندى جاس بلوگەرلەر باسەكەلەس بولعان. 

قىزدىڭ اتا-اناسى امەريكالىق Nickelodeon تەلەارناسىنىڭ رەسەيدەگى وكىلدەرىنەن قىزدارىنىڭ نومينانتتار تىزىمىنە ەنگەنى تۋرالى حات كەلگەنىن مالىمدەدى. 

"ءبىز بۇل نوميناسياعا وتە قۋانىشتىمىز - اقش-قا ماراپاتتاۋعا بارعىمىز كەلدى، ءبىراق  ماراپاتتى ماسكەۋدەگى وكىلدىككە جىبەرەتىن كورىنەدى. سونداي-اق، بىزگە ءامينانىڭ روليكتەردىڭ ءبىرىن دىبىستايتىنى تۋرالى ايتتى"، - دەدى قىزدىڭ اناسى اراي مالعاجار.

ال قازاقستاندىق قىزعا مىنا جەردە داۋىس بەرۋگە بولادى. ءاميناعا جەتۋ ءۇشىن، الدىمەن ءۇش نوميناسيا بويىنشا داۋىس بەرۋ كەرەك. سوسىن قىز بالا ۇسىنىلعان كاتەگوريا پايدا بولادى. 

Kids Choice Award - بۇل اقش-تىڭ Nickelodeon تانىمال بالالار تەلەارناسىمەن بەرىلەتىن جىل سايىنعى كينوپرەميا. Kids Choice Award 2019 ماراپاتتاۋ ءراسىمى 27 ناۋرىزدا لوست-اندجەلەستە وتەدى. ءامينا مالعاجاردىڭ وتباسى ماسكەۋگە 2018 جىلى كوشكەنىن ايتا كەتكەن ءجون.

ءامينا مەن ونىڭ  سىڭلىلەرى اديا مەن ارۋجان Instagram-داعى قىزىقتى شاعىن روليكتەردىڭ (ۆاينام) ارقاسىندا قازنەتتە تانىمال. 2015 جىلدىڭ تامىز ايىندا ولاردىڭ العاشقى ۆايندارى پايدا بولدى. ءقازىر امينكا ۆيتامينكانىڭ Youtube كانالىندا 2،9 ميلليون قولدانۋشىسى بار جانە Instagram جەلىسىندەگى پاراقشاسىنا 1،1 ميلليون ادام جازىلعان.

ۇسىنعان: ماقپال سەمباي