ءتىل جاناشىرى وعىز دوعان ءوءزىنىڭ فەيسبۋك پاراقشاسىندا جاڭادان قۇرىلعان قازاق ۇكىمەتىنە قاتىستى بازىناسىن ءبىلدىردى.

«سىزدەر، جارقىن كەلەشەگى بۇگىننەن كورىنىپ، جارقىراپ تۇرعان، تۇرىك دۇنيەسىنىڭ كوشباسشىسى - قازاقستانىمىزدىڭ باسقارىلۋىندا ەڭ بيىك ورىندا قىزمەت ەتەيىن دەپ جاتقان، وتە باقىتتى دا وتە بەدەلدى تۇلعالارسىزدار!.. سىزدەردى جاڭا لاۋازىمدارىڭىزبەن قۇتتىقتاي وتىرىپ، جۇزەگە اسىرايىن دەپ جاتقان ىستەرىڭىزدە ساتتىلىك تىلەيمىن...

ۇلى قازاق حالقى، عاسىرلار بويى باستان كەشىرگەن سانسىز قايعى-قاسىرەتكە، جاۋدىڭ اياۋسىز شابۋىلدارىنا، اشارشىلىقتا ايرىلعان ميلليونداعان ۇل-قىزىنا، رەپرەسسيادا جوعالتقان مىڭداعان وتانسۇيەر زيالىسىنا قاراماستان، نامىسىن بەرمەگەن، تۇركىنىڭ كيەلى ۇلى دالاسىن تاستاپ كەتپەگەن، ءتىلىن، ءدىنىن، مادەنيەتىن اياققا تاپتاتپاعان حالىق ەكەنىن مەنەن جاقسى بىلەسىزدەر... مۇنداي تەڭدەسى جوق ۇلتقا "ۇكىمەت" بولۋ قانداي باقىت!..

قازاق حالقىنىڭ سونداي ازاپتى كەزەڭدەردەن، تۇرىك ءتىلىنىڭ سۇلتانى، قايماعى، گاۋھارى - انا ءتىلىن ساقتاپ قالۋىنىڭ ارقاسىندا امان قالعانىن فيلولوگ مامان رەتىندە سەندىرىپ ايتا الۋعا تولىق قۇقىعىم بار دەپ ويلايمىن!..

سول ءۇشىن، ەڭ الدىمەن سىزدەردەن بۇرىنعى مينيسترلەردىڭ باسقارۋ ورگاندارىندا قازاق تىلىندە ونشا سويلەي بەرمەۋىنىڭ، كورشىنىڭ ءتىلىن قازاق تىلىنەن ۇستەم كورۋىنىڭ قاتەلىك ەكەنىن، وسىنىڭ ۇلى قازاق حالقىنا لايىق ەمەس ەكەنىن مويىنداڭىزدار... قاتەلىكتەن ساباق الۋ – ول اقىلدىلىق. ومىردە قاتەلەسپەيتىن ادام بولمايدى. ەڭ ماڭىزدىسى، ءوز قاتەلىگىڭدى دەر كەزىندە ءتۇسىنۋ ەمەس پە؟!

بويىندا قازاقتىڭ قانى بار تۋىسقاندارىڭىز، تۇرىكتىڭ جەتى اتاسىن بىلەتىن بالاسى رەتىندە سىزدەردەن وتىنەمىن، بۇرىنعى قاتەلىكتى قايتالاماي - قازاقشا سويلەڭىزدەر!..

ءومىرىن قازاق تىلىنە ارناعان، قازاق ءتىلى جونىندە 2 كىتاپ، ونداعان عىلىمي ماقالا جازعان فيلولوگ دوكتور رەتىندە سىزدەردەن سۇرايمىن، بۇرىنعى قاتەلىكتى قايتالاماي - قازاقشا سويلەڭىزدەر!..»