استاناداعى كوپبالالى وتباسىنىڭ قايعىلى جاعدايى كۇللى قازاق ەلىن جىلاتقان ەدى. قاراپايىم حالىق پەن بىرگە ونەر ادامدارى دا بۇعان بەي-جاي قاراي المادى.

كۇنى كەشە ءانشى باعلان ءابدىرايىموۆ ءوزىنىڭ ينستاگرام پاراقشاسىندا وزگە ارىپتەستەرىنە دە، قازاق جىگىتتەرىنە دە ۇلگى بولسىن نيەتپەن دوسىمەن بىرگە كوپبالالى وتباسىنا بارعان سۋرەتى مەن جازباسىن سالعان ەكەن.

"بۇگىن، سىرىم دوس ەكەۋمىز ىلە اۋدانىنى، قۋات ەلدى مەكەنى، اشكەيەۆ 25 - ۋي، (گرەس) بەس بالالى وتباسىعا ارنايى بارىپ كەلدىك. وتە ناشار جەردە ءومىر ءسۇرىپ جاتقانىن كورىپ، كوزبەن كورگەن ءجون دەپ سانادىق. "بارماعان جەرىم، باسپاعان تاۋىم جوق، جاعۋعا كومىر، جەۋگە نان جوق" دەگەن سوڭ، شىدامادىم.

بىر-ەكى دوستارىما ايتىپ ەدىم، قولدان كەلگەن قاراجاتتى سالىپ جىبەرىپتى. /اللا رازى بولسىن! ءۇيىپ - توگىپ ۋادە بەرمەسەك تە ازداپ قاراجات جاعىن بەردىك. پاتەر اقىسىن ءبىزدى كۇتكەندەي، ەگەسى دە كەلە قالدى. وتاعاسى كورشى ەلدىڭ ادامى بولعان سوڭ /قازاق/ كز ەلىنىڭ ازاماتتىعىن الا الماپتى. قىستا كولىك جۋاتىن جەردە، جازدا قۇرىلىستا جۇمىس جاسايدى ەكەن. وزىمەن جولىعا المادىق. جۇمىس جاساپ، اقشا تابۋ ءۇشىن ءۇش - ءتورت كۇندە ءبىر كەلەتىن كورىنەدى. قازبالاپ سۇراۋعا ۇيالدىق.

تۇرمىسى ناشار، كوپ بالالى وتباسى كوپ كورىنەدى. اتتەڭ، قولدان كەلسە، كومەكتەسكىڭ- اق كەلەدى. الداعى ۋاقىتتا اكىمدىككە كىرىپ، جەر سۇراساق دەگەن نيەتتەمىز! جەر العان جاعدايدا ۋي تۇرعىزىپ بەرۋ ويدا بار.

اۋەلى اللا، سوسىن ءسىز بەن ءبىز اسارلاتىپ جىبەرسەك، باسپانالى بولىپ قالادى. بالاقايلار سۇيكىمدى، پىسىق. ەڭ باستىسى، دەندەرى ساۋ. اناسى استانادا بولعان جاعدايدان سوڭ جالدامالى جۇمىستان باس تارتىپ، بالا - شاعاسىنىڭ قاسىندا وتىر. ەكى بالا مەكتەپتە وقيدى. ەكى بالانى جەرگىلىكتى بالاباقشا تەگىن قابىلداپتى. بەسىنشىسى –ەمىزۋلى. سوڭعى سۇرەتتە ءوز كارتوچكاسى بار.

اللا رازىلىعى ءۇشىن جاردەم بەرسەڭىزدەر، ساۋاپتان بولسىن! قازاقتىڭ قايسار قىزدارى قايىرىمدىلىق جاساپ، ەرلىك تانىتىپ جاتىر. جىگىتتەر قاراپ قالمايىق، ۇيات بولادى!" (ورفوگر.ساقتالعان) دەپ جازعان باعلان ءابدىرايىموۆ جازباسىنىڭ سوڭىنا اتالمىش وتباسىنىڭ جەكە رەكۆيزيتتەرىن دە قالدىرىپتى.

"جارايسىڭ!"، "ەستافەتا جالعاسا بەرسىن!"، "اللا رازى بولسىن!"، "باسقالارعا ۇلگى بولسىن!"... دەگەن سىندى جاعىمدى پىكىرلەردى اياماي ۇيىپ-توككەن ەكەن وقىرماندارى. 

البەتتە، مۇنداي يگى ىسكە نەگە ريزا بولماسقا! ءبارىن بەرۋشى دە اللا، الۋشى دا اللا! اللاسىن اۋزىنان تاستاماي، ساداقاسىن بەرىپ، يگى ءىس جاساپ جۇرەتىن ونەر ادامدارىنىڭ ونەرىمەن قوسا ازاماتتىعىن كورگەندە ءتانتى بولماۋ مۇمكىن ەمەس. 

ۇسىنعان: ماقپال سەمباي