قالا اكىمى كەي ازىق-تۇلىك ونىمدەرىنىڭ جوعارى باعالارىنا ەكونوميكالىق تالداۋ جانە ايقىن نەگىزدەۋدى قامتاماسىز ەتۋدى جانە ولاردىڭ باعاسىن تومەندەتۋگە قاتىستى ناقتى ۇسىنىستار ەنگىزۋدى تاپسىردى، - دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ رەسمي سايتىنا سىلتەمە جاساپ.

باقىت سۇلتانوۆتىڭ توراعالىعىمەن استانا اكىمدىگىندە كەزەكتى وتىرىس ءوتتى. كۇن تارتىبىندەگى نەگىزگى ماسەلە – الەۋمەتتىك ماڭىزى بار ازىق-تۇلىك تاۋارلارىنىڭ باعالارى.

"ءبىزدىڭ تاراپىمىزدان باعانىڭ وسۋىنە جول بەرىلمەيتىن بەكىتىلگەن ازىق-تۇلىك تىزىمىندە تەك 19 پوزيسيا بار. ونىڭ ىشىندە كوكونىستەردەن تەك قانا كارتوپ، قىرىققابات، ءسابىز جانە پياز بار. حالىق ءۇشىن قاجەتتى جەمىستەر، قىزاناق، قيار جانە باسقا دا كوكونىستەر جوق. جالپى ايتقاندا، بۇل تاۋارلاردىڭ باعاسىن ەشكىم رەتتەمەيدى"، - دەدى استانا اكىمى.

ول 1 كەلى قىزاناق نەمەسە قيار باعاسىنىڭ 800-دەن 1000 تەڭگەگە دەيىن نەمەسە ودان دا جوعارى تۇراتىنىن تىلگە تيەك ەتتى. "از قامتىلعان وتباسىلاردىڭ ەشقايسىسى ونى ساتىپ الا المايدى"، - دەدى باقىت سۇلتانوۆ وسى ورايدا.

قالا اكىمىنىڭ ورىنباسارى ماليكا بەكتۇروۆانىڭ ايتۋىنشا، اقپان ايىندا استانادا ينفلياسيا قاڭتار ايىنىڭ دەڭگەيىندە قالعان.

ول 100،8 پايىز (رەسپۋبليكا بويىنشا 7 ورىن)، ال الەۋمەتتىك ماڭىزى بار ازىق-تۇلىك تاۋارلار يندەكسى وتكەن اپتادا 101،2 پايىز (رەسپۋبليكا بويىنشا – 0،6 پايىز) بولدى. "دەر كەزىندە قابىلدانعان شارالار بويىنشا اينالىم قاراجاتىن تولىقتىرۋ شەڭبەرىندە ساۋدا جەلىلەرىنە جەڭىلدىكتى كرەديت بەرۋ ارقىلى قارجىلاندىرۋ الەۋمەتتىك ماڭىزى بار تاۋارلاردىڭ 2017 جىلى 15 ساناتىن، 2018 جىلى 22 ساناتىنا باعانى تومەندەتۋگە جانە تۇراقتى ۇستاۋعا مۇمكىندىك بەردى. 2018 جىلى ينفلياسيانى تومەندەتۋگە مۇمكىندىك بەردى. تۇراقتاندىرۋ قورى قۇرىلعان. بۇگىن وندا قانت، كۇرىش، قاراقۇمىق، كارتوپ جانە ءسابىز بار. وسى تاۋار تۇرلەرىنە باعا 15 پايىزعا كوتەرىلگەندە قالاداعى ساۋدا وبەكتىلەرىندە تاۋار ينتەرۆەنسيالارى وتكىزىلەدى"، - دەدى م. بەكتۇروۆا.

ونىڭ سوزىنشە، ساۋدا ۇيلەرىن كرەديتتەۋ ارقىلى باعانى تۇراقتاندىرۋ ءوز ناتيجەسىن بەرگەن. ءقازىردىڭ وزىندە جوباعا "ماگنۋم"، "شايىر"، "مەترو"، "كەڭمارت" ساۋدا جەلىلەرى، "ساپار" بازارى، "استاناەكوستاندارت" ج ش س، "اگروكاپيتال" ج ش س جانە باسقالار قاتىسۋعا دايىن.

سونىمەن قاتار، بەكتۇروۆا "شاپاعات" بازارىن جەكەشەلەندىرىلۋىنە بايلانىستى "اق استانا" اكك-عا بازاردىڭ جاڭا مەنشىك يەلەرى تاراپىنان تەندەرلىك شارتتاردىڭ ساقتالۋىن ەرەكشە باقىلاۋدى ۇسىندى.

قالا اكىمنىڭ ايتۋىنشا بۇگىن قازاقستاننىڭ كوپتەگەن وڭىرلەرىندە نان باعاسى كوتەرىلگەن. باستى سەبەپ - ۇننىڭ تاپشىلىعى.

قالا اكىمى بۇدان بۇرىن قالا اكىمىنىڭ ورىنباسارى ماليكا بەكتۇروۆاعا "استانا" الەۋمەتتىك كاسىپكەرلىك كورپوراسياسىنىڭ مەحانيزمدەرى ارقىلى ەلوردانىڭ ناۋبايحانالارىنا ۇندى جەتكىزۋدى تاپسىرعان بولاتىن.

ءوز كەزەگىندە ماليكا بەكتۇروۆا، وتكەن اپتادا پرەمەر-مينيستردىڭ ءبىرىنشى ورىنباسارى ءاليحان سمايىلوۆ اۋىل شارۋاشىلىعى جانە ۇلتتىق ەكونوميكا مينيسترلىكتەرىنە ناننىڭ قىمباتتاۋىن بولدىرماۋ ءۇشىن ءتيىستى ۇسىنىستار ەنگىزۋ بويىنشا تاپسىرما بەرگەندىگىن جەتكىزدى.

"ءبىز ءوز تاراپىمىزدان ۇسىنىس ەنگىزدىك. قازىرگى كەزدە ازىق-تۇلىك كورپوراسياسى ارقىلى ماسەلەنى شەشىپ جاتىرمىز. بۇل ماسەلە اپتا سوڭىنا دەيىن شەشىلەدى"، - دەدى بەكتۇروۆا.

قالا اكىمى سونداي-اق، مەملەكەت باسشىسى مەملەكەتتىك ورگانداردىڭ قىزمەتى ازاماتتاردىڭ ءال-اۋقاتىن جاقسارتۋعا باعىتتاۋدى تاپسىرعاندىعىن ەسكە سالدى.

وسى ماقساتتا 1 قاڭتاردان باستاپ كوممۋنالدىق قىزمەتتەر تاريفتەرى، ءبىرقاتار الەۋمەتتىك تولەمنىڭ مولشەرى ۇلعايتىلدى، حالىقتىڭ ءال-اۋقاتىن كوتەرۋ شارالارى جۇزەگە اسىرىلىپ جاتىر.

"نۇر وتان" پارتياسىنىڭ سەزىندە مەملەكەت باسشىسى حالىقتىڭ الەۋمەتتىك وسال توپتارىنىڭ كىرىستەرىن ارتتىرۋ بويىنشا تاپسىرما بەرگەن.

وسىعان بايلانىستى باقىت سۇلتانوۆ ءوز ورىنباسارى ماليكا بەكتۇروۆا مەن استانا قالاسىنىڭ ينۆەستيسيالار جانە كاسىپكەرلىكتى دامىتۋ باسقارماسىنىڭ باسشىسى الىشەر ءابدىقادىروۆقا الەۋمەتتىك ماڭىزى بار ازىق-تۇلىك تاۋارلارى باعاسىنىڭ وسۋىنە جول بەرمەۋگە، تۇراقتى باقىلاۋدى قامتاماسىز ەتۋدى جانە ولاردىڭ ماۋسىمدىق وسىمىنە جول بەرمەۋ، اسىرەسە مەرەكە كۇندەرى باعانىڭ كوتەرىلۋىن بولدىرماۋدى تاپسىردى.

"الەۋمەتتىك ماڭىزى بار ازىق-تۇلىك تاۋارلارىنىڭ تىزىمىنە كىرمەيتىن ازىق-تۇلىك ونىمدەرىنىڭ جوعارى باعالارىنا ەكونوميكالىق تالداۋ جانە ايقىن نەگىزدەۋدى قامتاماسىز ەتىڭىز جانە ولاردىڭ باعاسىن تومەندەتۋگە قاتىستى ناقتى ۇسىنىستار ەنگىزىڭىز"، - دەدى سۇلتانوۆ.