احمەت بايتۇرسىن ۇلى ءمۇراجاي-ۇيىنىڭ اۋلاسىندا ماسكۇنەمدەر ءورىپ ءجۇر. وسىعان قاتىستى شارا قولدانايىن دەگەن اكىمدىك جوق. ءوزىنىڭ جانايقايىن مۇراجاي ديرەكتورى رايحان يماحانبەت Facebook-تەگى پاراقشاسى ارقىلى ءبىلدىردى دەپ حابارلايدى Qamshy.kz اقپارات اگەنتتىگى.

«احمەت بايتۇرسىن ۇلى مۋزەي-ۇيىنىڭ اۋلاسى ماسكۇنەم، بومجداردىڭ مەكەنىنە اينالدى!
مۋزەي ساكرالدى تىزىمگە ەنسە دە، مەملەكەت قاراماعىندا جوق! قالا بالانسىنا كىرمەگەندىكتەن، احۋال وسى...  جەكەشەلەگەن باسشىنىڭ مۇنىمەن ءىسى جوق»، - دەپ جازدى رايحان يماحانبەت.

ايتۋىنشا، مۇراجاي اينالاسىن كەزىپ جۇرگەن ماسكۇنەمدەردى سۋرەتكە ءتۇسىرىپ الىپ المالى اۋدانىنىڭ اكىمشىلىگىنە سالىپ، كومەك سۇراعان ەكەن.

«وبالى نەشىك تازالاتادى، ءبىراق بۇل "كارتينا" اپتاسىنا 3-4 رەت قايتالانادى. مۋزەيگە كەلۋشىلەردىڭ الدىندا قىسىلىپ... قىزارىپ "ەكىلىك" العان بالاداي ىڭعايسىز كۇيگە تۇسەمىز.

مۋزەي گيدى جانسايا سمان قور باسشىسىن قۇلاقتاندىرسا، "دەمالىپ" جاتىر دەپ قىسقا قايىرعان. 
ۇلت ۇستازىنىڭ 125 جىلدىعىنا وراي، 1998 جىلى سالتاناتتى تۇردە اشىلعان ءتاعىلىم-ۇيدىڭ تاعدىرىنا ەل باسشىلارىنىڭ سەلسوق كوزقاراسى... جەكەشەلەپ الۋشىنىڭ جوسىقسىز جاۋابى...
نە ىستەۋ كەرەك؟؟؟» - دەپ كۇيىندى مۇراجاي ديرەكتورى.

قازاق حالقىنا قىزمەت ەتكەن، حالقى ءۇشىن جانىن پيدا قىلعان الاش ارىسى احمەت بايتۇرسىن ۇلى وسى ۇيدە تۇرعان. ءدال وسى باسپانادان ونى «حالىق جاۋى» اتاندىرىپ، وتباسىمەن قوسا قۋىپ شىققان. ۇلت باستاۋىندا تۇرعان ۇلى تۇلعانى كەيىنگى ۇرپاق ءتانىپ-بىلسىن دەگەن ماقساتتا بۇگىندە بۇل عيماراتتى اقىن اتىنداعى مۇراجايعا اينالدىرعان.

1988 جىلى الاشورداشىلار اقتالعان تۇستا بايتۇرسىنوۆتىڭ بالالارى مەن نەمەرەلەرى احمەتتىڭ اتىنا قوعامدىق قور قۇرىپ، اقىننىڭ ءبىر كەزدەرى تۇرعان ءۇيىن مۇراجايعا اينالدىرۋدى قولعا الادى. الايدا بۇل ءىستى جۇزەگە اسىرۋ وڭايعا سوقپادى. سەبەبى، ءۇي باسقا بىرەۋلەردىڭ مەنشىگىنە وتكەن ەدى. دەگەنمەن دە، اقىن ۇرپاقتارىنىڭ باستاماسى ناتيجەسىز قالمادى. 1993 جىلى الماتى قالاسى، كوسموناۆتوۆ كوشەسىنىڭ بويىنداعى ءنومىرى 60-شى ءۇيدى مۇراجايعا اينالدىرۋ جونىندە شەشىم قابىلدانادى. وسىلايشا، 1998 جىلدىڭ 12 قىركۇيەگىندە قايتا جوندەۋ جۇمىستارىنان وتكەن ءمۇراجاي-ۇيدىڭ سالتاناتتى تۇردە اشىلۋى بولادى. سونداي-اق، الماتى قالاسىنداعى كوپتەگەن كوشەلەردىڭ اتاۋى وزگەرتىلگەن تۇستا عالىمنىڭ ءۇيى ورنالاسقان وسى ءبىر كوشە بايتۇرسىن ۇلى دەپ اۋىستىرىلادى.

ءتورت بولمەدەن تۇراتىن مۇراجايداعى ەڭ ۇلكەن ءارى جارىق ەكى بولمەدە بايتۇرسىن ۇلىنىڭ وتباسىنا جانە زامانداس دوستارىنا قاتىستى قۇندى ماعلۇماتتاردىڭ ءتۇپنۇسقاسى مەن كوشىرمەسى جانە بىرەڭ-ساراڭ ەكسپوناتتار بار. ال ءۇشىنشى تار ءارى قاراڭعى بولمەگە ساناۋلى عانا ەكسپونات قويىلعان ەكەن. مۇندا احمەت بايتۇرسىنوۆتىڭ اتۋ جازاسىنا كەسىلەر الدىندا تۇسكەن فوتوسۋرەتى ءىلىنىپ تۇر.

گۇلىم جاقان