بيىلعى 2019 جاستار جىلىنا وراي اقتوبە قالاسىنىڭ جاس، دارىندى ءانشىسى ارمان جيەنالييەۆپەن Qamshy.kz اقپارات اگەنتتىگىنىڭ ءتىلشىسى سۇحباتتاسقان بولاتىن.
–كوبىنە حالىق ءسىزدىڭ اندەرىڭىزدى بىلگەنمەن، ءتۇرىڭىزدى تانىماي جاتادى؟ نە سەبەپتى؟
–نەگىزى جۇرت مەنىڭ حالىق اندەرىمدى بىلەدى. ال ءوزىم، ءيا، تانىمال ەمەسپىن. حالىققا كەڭ تاراعان 20 شاقتى اۆتورلىق ءانىم دە بار. بەينەباياندارىم دا كوپ ەمەس. اللا قالاسا، جاقىن ارادا تاشكەنتكە بارىپ «ءسۇيىپ قالدىم»، «بيلە، مادام» سياقتى اندەرگە بەينەبايان ءتۇسىرىپ، رەسپۋبليكالىق ارنالاردان تاراتۋ جوسپارىمدا بار. ەندى مىنە، رەسپۋبليكا كولەمىندە تانىلۋعا جوسپار جاساپ جاتىرمىن.
–الماتى – ونەر ورداسى. الماتىعا كەلۋ جوسپارىڭىزدا جوق پا؟
–ارينە، ونەردىڭ قايناعان مەكەنى – الماتى دەر ەدىم. ءقازىر ءوزىمنىڭ تۋىپ-وسكەن مەكەنىم اقتوبەدەمىن. ون جىلدىڭ كولەمى بولدى، الماتىعا ءان جازدىرۋعا، ءارتۇرلى تۇسىرىلىمدەرگە، بەينەبايان تۇسىرۋگە كەلىپ تۇرامىن. ءبىراق بارماقتاي ب ا ق كەرەك. قۇداي قالاسا، ونەر ورداسىنا قونىس اۋدارۋ ويدا بار.
–اندەرىڭىزدى قالاي تاڭدايسىز، انىنە ءمان بەرەسىز بە، الدە سوزىنە مە؟
–مەن انىنە دە، سوزىنە دە، وڭدەۋىنە، ارانجيروۆكاسىنا دا ۇلكەن ءمان بەرەمىن. ءاننىڭ ءستيلىن تاڭداۋ بارىسىندا دا ءوزىمنىڭ ويىمدى ۇنەمى ءبىلدىرىپ وتىرامىن. مەنىڭ مۋزىكالىق ءبىلىمىم بار. سوندىقتان، كومپوزيتورلارمەن دە ءجيى اقىلداسىپ، ءان جازۋ بارىسىندا ۇنەمى بىرگەمىن دەسەم دە بولادى. گارمونيا، نوتا، تەوريا دەگەن جاعىن جاقسى بىلەمىن. ءاننىڭ حيت بولۋى ۇلكەن مۋزىكالىق ساۋاتتىلىقتى قاجەت ەتەدى.
–«بيلە، مادام» دەگەن ءانىڭىز پلاگيات پا؟
–يا، انشىلەر كوبىنە اۋدارما ءانىن ايتىپ تەز تانىلىپ جاتادى. مەن دە ويلانا كەلە پلاگياتقا جولىقتىم. يۋتۋب جەلىسىن قاراي وتىرا، «بيلە، مادام» ءانىن ءوز قورجىنىما قوسىپ الدىم.
–ۇلكەن ونەرگە قادام باسۋىڭىزداعى باستى ماقسات نە؟
–«ونەرگە ءبىر كۇندە كەلگەن جوقپىز، جانە ءبىر كۇنگە كەلگەن جوقپىز» دەمەكشى، مەنىڭ مۋزىكالىق ءبىلىمىم بار. وسى سالادا وقىدىم، توقىدىم. ونەر مەنىڭ اتا-انامنىڭ قانىمەن دارىعان. انشىلىككە كوشەدەن، نەمەسە باسقا سالادان ءجۇرىپ قوسىلعان جوقپىن. ۇلكەن كونكۋرستارعا قاتىستىم. كيەلى اقتوبە جەرىنەن تاعى ءبىر دارىندى بالا قانات قاعىپ، قازاق ەستراداسىنا تامشىداي بولسا دا ۇلەسىن قوسسا دەگەن ارمانىم بار.
–قازاق ەستراداسىندا كىممەن دۋەت ايتقىڭىز كەلەدى؟
–مەنىڭ كۋميرىم – مەيرامبەك بەسپايەۆ جانە قۇرماش ماحانوۆ. وسى كىسىلەرمەن دۋەت ايتقىم كەلەدى. ال اپايلارىمىزدان ماقپال ءجۇنىسوۆا، قاراقات ابىلدينامەن قوسىلىپ ءان شىرقاعىم كەلەدى.
–وبلىس اۋماعىنان انشىلەرگە قانداي قولداۋ كورسەتىلەدى؟
–ءقازىر مەنىڭ تۇرىپ جاتقان جەرىم – اقتوبە قالاسى. وبلىستىق مادەنيەتتەن ەشقانداي كومەك كورسەتىلمەيدى. ولاردىڭ اۋزىمىزعا نان، قالتامىزعا اقشا سالىپ جاتقان ەشنارسەسى جوق. اراسىندا كونسەرتتەرگە عانا شاقىرىپ تۇرادى. بارلىق جەتىستىك ماڭداي تەرىمىزبەن كەلەدى. كونسەرتتەن، تويدان تاپقان تابىسىمىزدى ارتىق تۋفلي، ارتىق كاستيۋم كيمەسەك تە، كليپ پەن ءان جازدىرۋعا جۇمسايمىز. ءوزىمىزدىڭ ەڭبەگىمىزبەن جۇرگەن جايىمىز بار ءدال ءقازىر.
سۇحباتتاسقان: اسەم مەرەكە قىزى
پىكىر قالدىرۋ