الماتى قالاسىنىڭ توتەنشە جاعدايلار دەپارتامەنتى 3 بالانى ورتتەن قۇتقارعان باتىرعا قۇرمەت كورسەتتى، دەپ حابارلايدى Qamshy.kz اقپارات اگەنتتىگى الماتى قالاسى تجد باسپا ءسوز قىزمەتىنە سىلتەمە جاساپ.

ماراپاتتاۋ راسىمىنە قازاقستان رەسپۋبليكاسى قم راديوەلەكترونيكا جانە بايلانىس اسكەري-ينجەنەرلىك ينستيتۋتى وقۋ ورتالىعىنىڭ قىزمەتكەرلەرى قاتىستى. ادام ءومىرىن قۇتقارۋدا كورسەتكەن باتىلدىعى ءۇشىن نۇرقانات مۇرات ۇلى دۇيسەن «توتەنشە جاعدايداعى ەرلىگى ءۇشىن» مەدالىمەن ماراپاتتالدى. قازاقستان رەسپۋبليكاسى ىشكى ىستەر ءمينيسترىنىڭ اتىنان الماتى قالاسى توتەنشە جاعدايلار دەپارتامەنتىنىڭ باستىعى، ءورت ءسوندىرۋ قىزمەتى گەنەرال-مايورى سەرىك اۋباكىروۆ نۇرقاناتقا اتالعان ماراپاتتى سالتاناتتى تۇردە تابىس ەتتى. سەرىك عابدول ۇلى جالعىز ءوزى جانىپ جاتقان ۇيدەگى ءۇش بالانى وت جالىننان امان-ەسەن الىپ شىققان نۇرقانات دۇيسەننىڭ كاسىبي تاعىلىمدامادان وتۋىنە، سونداي-اق وعان ەرەكشە جاعدايلاردا ءارقاشان دايىن بولۋعا ۇيرەتكەن كومانديرلەرىنە العىس ايتتى.

ءورت 2019 جىلعى 11 ناۋرىز كۇنى ساعات 18:00-دە الماتى قالاسىنىڭ جەتىسۋ اۋدانىنداعى ءبىرىنشى ماي كوشەسىندە ورنالاسقان جاتاقحانادا بولدى.

ءورت ءسوندىرۋ بريگادالارىنا كەلگەنگە دەيىن اتالعان ءۇيدىڭ جانىنان ءوتىپ بارا جاتقان نۇرقانات دۇيسەن تەرەزەدەن ايقايلاعان داۋىستى ەستىپ، تەز ارادا كومەككە ۇمتىلعان بولاتىن.

ەسكە سالا كەتەيىك، تاياۋدا نۇرقاناتتى قورعانىس مينيسترلىگى دە ماراپاتتاعان بولاتىن.  

ۇسىنعان: ماقپال سەمباي