الماتىدا ءانشى، كومپوزيتور ۇشقىن جامالبەكتىڭ "وتىزدىڭ ۇشقىنى" اتتى ءان جيناعىنىڭ تۇساۋكەسەرى ءوتتى. وردا بۇزار وتىز جاسقا تولعان ءانشى "الاش ۇلى" توبىنان ءبولىنىپ شىققاننان كەيىنگى ءبىرقاتار الداعى جوسپارلارىمەن ءبولىستى دەپ حابارلايدى Qamshy.kz اقپارات اگەنتتىگى.
"مەن قازاقتىڭ بالاسى" دەپ اندەتكەن ۇشقىن جامالبەكتىڭ ءۇنى مەن اۋەنى باسقادان بولەك. ويتكەنى، وندا ەرەكشە بوياۋ، وزگەگە ۇقسامايتىن ادەمى اۋەز بار. قاي ءانىن تىڭداساڭىز دا، التاي مەن اتىراۋدىڭ اراسىن، كەڭ قازاقتىڭ اسقاق دالاسىن ەسكە سالادى. اندەرىنەن مۇڭدى دا بايقاماۋ قيىن ەمەس. 20 جاستاعى جىگىتتىڭ جۇڭگو اسىپ ءوز اتامەكەنىنە كەلگەنىنە دە كوپ بولا قويعان جوق. مۇندا ەشبىر تۋىسى بولماسا دا، ۇشقىننىڭ جالعىز ەمەس ەكەنىن كەشەگى كەشكە جينالعان قالىڭ كوپشىلىك دالەلدەپ بەردى. دەگەنمەن، تۋعاننىڭ اتى بولەك قوي. وسى كەشتىڭ بارىسىندا ءانشى اق جۇرەكتى اناسىنا دەگەن ساعىنىشىن ءبىلدىرىپ، "مۇمكىن كەلەسى تويدا اناممەن بىرگە قۋانىشتى بىرگە بولىسە جاتارمىز" دەگەن تىلەگىن جەتكىزدى. ۇشقىننىڭ اناسى تۇساۋكەسەرگە قاتىسا الماسا دا، ۆيدەو ارقىلى ءوزىنىڭ بالاسىنا دەگەن جۇرەكجاردى تىلەگىن جەتكىزدى.
–"بالاپانىم، وزىڭە سالەم! بۇگىنگى تۋعان كۇنىڭمەن قۇتتىقتايمىن. ءومىر جاسىڭ ۇزاق بولسىن. ارماندارىڭا جەتە بەر. وتباسىڭا اماندىق، دەنىڭە ساۋلىق، جۇمىسىڭا ساتتىلىك تىلەيمىن. حالقىڭا بەرەرىڭ كوپ بولسىن. بۇدان دا بيىك شىڭداردان كورىنە بەر. باۋىرلارىڭمەن، بالاپاندارىڭمەن اماندىقپەن كەزدەسەيىك. بۇگىن قۋانىشىڭا كەلىپ وتىرعان اعالارىڭا، ىنىلەرىڭە، جان-جولداستارىڭا كوپتەن-كوپ العىسىمدى بىلدىرەمىن." - دەپ اناسى بارشا كورەرمەنگە سالەم جولدادى.
–12 جىلدان بەرى انامدى اكەلە الماي جاتىرمىن. ەندى ءبىر ءساتى كەلەر. مەن جالعىزبىن، بۇل جاقتا. ءبىراق وسىندا وتىرعان بۇكىل قوناقتار، تۋىسىم سىزدەرسىزدەر! مۇندا مەنىڭ نە ناعاشىم، نە اكەمنىڭ تۋىسى جوق. بۇكىل ونەر ادامدارى – تۋىستارىم. مەن جالعىز كەلدىم، اتاجۇرتتى اڭساپ كەلدىم. دومبىرامدى قولىما سەرىك ەتىپ، ونەرىمىزگە بەرىك ەتىپ ءجۇرمىز،– دەدى اناسىن اتامەكەنىنە اكەلۋدى اڭساعان ءانشى.
اتا-انا مەن تۋىستارىن كورۋ ءۇشىن ۇشقىن ولارعا جىلىنا ەكى-ۇش رەت بارىپ تۇراتىنىن، ال اعايىن-تۋمانىڭ كۇنەس دەگەن جەردە تۇراتىنىن ايتتى. ونىڭ ايتۋىنشا، ەڭ كوپ قازاق سول كۇنەستى مەكەن ەتەدى. وندا 160 مىڭ قازاق بار.
–بار تۋىسىمدى اكەلەتىن بولسام، ءبىر اۋداننىڭ حالقى جينالادى،– دەدى ۇشقىن جامالبەك.
كەش بارىسىندا ۇشقىن جامالبەك كوپشىلىككە تانىس وزىندىك ەرەكشە اۋەندەرىمەن قاتار، جاڭا اندەرىن، جاڭا بەينەبايانىن، سونداي-اق ەكى جىل دايىندىقتان وتكىزگەن UGAI production پروديۋسەرلىك ورتالىعىنىڭ جۇمىسىن تانىستىردى.
كەشتە ۇشقىننىڭ جاڭا ءانىنىڭ دە تۇساۋى كەسىلدى. ول تورەعالي تورالىمەن بىرگە "تاقيا" اتتى جاڭا ءانىن ورىندادى. ءانشىنىڭ ايتۋىنشا، بۇل دا ءبىر قازاقتىڭ ۇلتتىق قۇندىلىعىن دارىپتەۋگە ارنالعان اۋەن.
وسىدان كەيىن ۇشقىن "ەركەكتىڭ ەر بولىپ ءجۇرۋى ۇيدەگى اپپاق جۇرەكتەرىمىزدىڭ ارقاسىندا عوي"،– دەپ "اپپاق جۇرەگىم" اتتى ءانىن ورىندادى، كەلىنشەگىمەن ۆالس بيلەدى.
پوسموترەت ەتۋ پۋبليكاسيۋ ۆ Instagram30 دا وردا بۇزعان ۇشقىن باۋىرىمنىڭ تۋعان كۇن كەشىنەن ەستەلىكتەر @ushkyn.zhamalbek_official
ءانشى ونەردەگى قادامىنا ءبىراز وزگەرىس ەنگىزىپتى. ۇشقىننىڭ مۇڭدى، ۇلتتىق رۋحتى كوتەرەتەتىن اندەرىن تىڭداپ ۇيرەنگەن حالىق، ەندى ءانشىنى باسقا قىرىنان دا بايقاماق. جاقىن ۋاقىتتا UGAI production پروديۋسەرلىك ورتالىعىنىڭ قولداۋىمەن "باسىمدى قاتىرما" اتتى ۇشقىننىڭ جاڭا بەينەبايانى كورەرمەندەر نازارىنا جول تارتپاق.
"وتىزدىڭ ۇشقىنى" لاۋلاعان كەشكە بەلگىلى انشىلەر ساكەن مايعازييەۆ، ءادىل سلامحان، عادىلبەك جاناي، تورەعالي ءتورالى، توقتار سەرىكوۆ سىندى ونەر جۇلدىزدارى قاتىسىپ، وزدەرىنىڭ ىزگى تىلەكتەرىن ءبىلدىردى.
–سەن ءوزىڭ بولەك وسكەن بولتىرىكسىڭ عوي. ءوز ورمانىڭا كەلدىڭ. ەندى وسى دالادا ءىزىڭ قالسىڭ. ءبىز ونەر ولكەسىندە بىرگە جۇرگەننەن كەيىن ءبىر اكە ءبىر شەشەدەن تۋعانداي سىيلاسامىز. ءبىرىنىڭ ماڭدايىنا ءبىر كىشكەنتاي داق، كۇيە جاعىلسا، سوعان شىرىلداپ اراشا تۇسەمىز. ءبىز بىر-بىرىمىزگە ماتانىپ، بايلانىپ قالعانبىز. سول سياقتى مەنىڭ ۇشقىن باۋىرىم دا قاتارىمىزعا قوسىلىپ، ونەردە ۇلكەن دۇنيەلەر جاساپ جاتىر، ۇشقىن، قۋانىشىڭ قۇتتى بولسىن." - دەپ ىزگى تىلەگىن ءبىلدىردى توقتار سەرىكوۆ.
–بۇگىن ۇشقىن باۋىرىمىزدىڭ كەرەمەت ءان جيناعىنىڭ تۇساۋكەسەرى ءوتىپ جاتىر. ۇشقىن وتە تالانتتى، بەساسپاپ جىگىت. انشىلىگى، كومپوزيتورلىعى، ءاندى وڭدەۋى، ءبارى دە كەرەمەت. بولاشاعى وتە زور. ۇشقىننىڭ تاعى ءبىر قىرى ونىڭ رەجيسسەرلىك قابىلەتىنىڭ مىقتىلىعى. ول ءبىراز بەيناباياندى تۇسىرۋگە تۇرتكى بولدى. ۇشقىننىڭ كومپوزيسيالىق قىرى ونىڭ وزىندىك ەرەكشەلىگى بارىن كورسەتەدى. ونىڭ اندەرىن بىردەن اڭعارۋعا بولادى - دەپ اعالىق تىلەگىن ءبىلدىردى ءادىل سلامحان.
"الاش ۇلى" توبىنان ءبولىنىپ شىققاننان كەيىن ءانشى كورەرمەننىڭ جوعارى تالابىن ەسكەرە وتىرىپ، بارىنشا شىن ىقىلاسىمەن جۇمىس ىستەۋگە كىرىسكەنىن ايتادى.
–ءبارى ۋاقىتتىڭ ەنشىسىندە. قولىمىزدان كەلگەنشە، جاقسى دۇنيەلەر جاساپ، تالپىنۋعا تىرىسىپ جاتىرمىز. "جىلاماسىن سابيلەر" قايىرىمدىلىق قورىنا ارنالعان ۇلكەن جوبالارىمىز بار. ونەر ادامى رەتىندە بالالاردىڭ جىلاماي، الاڭسىز ءومىر سۇرۋىنە تۇرتكى بولساق دەگەن نيەتپەن وسى جوبانى ۇيىمداستىردىق. الداعى ۋاقىتتا دا وسىنداي شارالاردى قولعا الىپ، تۇسكەن قارجىنى تۇگەلدەي مۇقتاج بالالارعا بەرەتىن بولامىز،– دەپ الداعى جوسپارلارىمەن ءبولىستى انشى-سازگەر ۇشقىن جامالبەك.
