بيىل جىل باسىنان بەرى (قاڭتار-اقپان) بارلىق قارجى كوزدەرى ەسەبىنەن 1،7 ملن شارشىمەتر تۇرعىن ءۇي نەمەسە 15 مىڭ باسپانا پايدالانۋعا بەرىلدى. بۇل تۋرالى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى رومان سكليار ءمالىم ەتتى.

 ءمينيستردىڭ  ايتۋىنشا، ساتىپ الۋ قۇقىعىنسىز جالعا بەرىلەتىن تۇرعىن ۇيلەردىڭ قۇرىلىسى ءۇشىن وڭىرلەرگە رەسپۋبليكالىق بيۋدجەتتەن 32،8 ملرد تەڭگە قاراستىرىلعان. شامامەن 4،5 مىڭ پاتەردىڭ قۇرىلىسى جوسپارلانۋدا (230،1 مىڭ شارشى مەتر).

–مەملەكەت باسشىسىنىڭ «نۇر وتان» پارتياسىنىڭ XVءىىى سەزدىندە بەرگەن تاپسىرمالارىن ىسكە اسىرۋ ءۇشىن 2019 جىلعا بيۋدجەتتى ايقىنداۋ اياسىندا كوپ بالالى وتباسىلار ءۇشىن جالدامالى تۇرعىن ءۇيدىڭ قۇرىلىسىنا جانە ساتىپ الۋعا وىڭىرلەرگە 50 ملرد تەڭگە ءبولۋ قاراستىرىلعان. جالپى اتالعان ءىس-شاراعا 7 جىل ىشىندە 350 ملرد تەڭگە بولىنەدى. بۇل جىل سايىن 6 مىڭ كوپ بالالى وتباسىنى پاتەرمەن قامتاماسىز ەتۋگە مۇمكىندىك بەرەدى. ياعني، 7 جىلدا 40 مىڭنان استام پاتەر بەرىلەدى دەگەن ءسوز، – دەپ اتاپ ءوتتى مينيستر.

بۇگىنگى تاڭدا 25 ملرد تەڭگەنىڭ قۇرىلىس جوبالار ءتىزىمى جاسالدى. دايىن پاتەرلەردى ساتىپ الۋ ءۇشىن 25 ملرد تەڭگە قاراستىرىلىپ وتىر.. بۇل كوپبالالى وتباسىلاردىڭ تۇرعىن ءۇي ماسەلەلەرىن شەشۋدى تەزدەتۋگە ىقپال ەتەدى.

–مىسالى، تۇركىستان وبلىسىندا 4 832 كوپبالالى وتباسى كەزەكتە تۇر. وسىعان بايلانىستى وڭىرگە پروپورسيونالدى 8،6 ملرد تەڭگە بولىنۋدە. بۇل قاراجاتتان 4،3 ملرد  تەڭگە قۇرىلىسقا، قالعان 4،3 ملرد تەڭگە دايىن پاتەر ساتىپ الۋعا بەرىلەدى. سولتۇستىك قازاقستان وبلىسىنداعى 342 وتباسىعا بەرىلەتىن ليميت 700 ميلليون تەڭگەنى قۇرايدى، - دەدى رومان سكليار.

ۇسىنعان: ەركىن قالدان