بۇگىن الماتى قالاسىندا ناۋرىز مەرەكەسىن تويلاۋ كەرەمەت دەڭگەيدە بولدى دەپ حابارلايدى  Qamshy.kz اقپارات اگەنتتىگى.

الماتى قالاسىنىڭ تۇرعىندارى مەن قالا قوناقتارىن قازاق حالقىنىڭ ءتول مەرەكەسىمەن قۇتتىقتاعان قالا اكىمى باۋىرجان بايبەك نۇرسۇلتان نازاربايەۆ تۋرالى دا ەرەكشە پىكىرىن ايتىپ ءوتتى.

"ارداقتى الماتىلىقتار! ءقادىرلى قوناقتار!  

بارشاڭىزدى ۇلىستىڭ ۇلى كۇنى – ءاز-ناۋرىز مەرەكەسىمەن شىن جۇرەكتەن قۇتتىقتايمىن!

ناۋرىز – كۇن مەن ءتۇننىڭ تەڭەلگەن، تىرشىلىك اتاۋلىنىڭ جاندانىپ-جاسانعان، جەر-دۇنيەنىڭ تۇلەپ-تۇرلەنگەن كۇنى. حالقىمىزبەن بىرگە جاساسىپ كەلە جاتقان ءتول مەرەكەمىز. 

اراعا ۇزاق جىلدار سالىپ، 1988 جىلدىڭ كوكتەمىندە ءبىر توپ ۇلت زيالىلارىنىڭ ۇيىتقى بولۋىمەن الماتىدا العاش رەت تويلانعان ەدى. وسىلايشا ۇلى مەرەكەمىز قايتا جاڭعىرىپ، قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ 1991 جىلعى 15 ناۋرىزداعى جارلىعىمەن مەملەكەتتىك سيپات الدى.

ءبىز بيىلعى ناۋرىزدى ەرەكشە جاڭالىقتارمەن قارسى الىپ وتىرمىز. كۇنى كەشە، ياعني 19 ناۋرىزدا ەلباسى ءوزىنىڭ پرەزيدەنتتىك وكىلەتتىگىن توقتاتۋ تۋرالى تاريحي شەشىمىن مالىمدەدى. وسىناۋ قادامى ارقىلى ەلباسى تاعى دا ەلدىك ءداستۇرىمىزدىڭ وزىقتىعىن كورسەتتى.

ەلباسى نۇرسۇلتان ءابىش ۇلى نازاربايەۆ – قازاق ەلىنىڭ جاڭا داۋىردەگى جاسامپاز تاريحىندا عانا ەمەس، ادامزات تاريحىندا دا ۇلكەن بەدەلگە يە ساڭلاق ساياساتكەر،كەمەڭگەر تۇلعا. 

كەڭەس وداعى كۇيرەگەن ءولىارا تۇستا ەل تۇتقاسىن قولىنا الىپ، ازاتتىعىمىزدى جاريالادى. ەلىمىزدىڭ شەكاراسىن شەگەندەپ، مەملەكەتتىلىگىمىزدى بەكەمدەدى. اتا زاڭىمىزدى، ۇلتتىق رامىزدەرىمىزدى بەكىتىپ، ۇلتتىق ۆاليۋتامىزدى ەنگىزدى. سىرتتاعى قانداستارىمىزدى ەلگە شاقىرىپ، ۇلى كوشكە جولاشتى.

قازاقستان حالقى اسسامبلەياسىن قۇرا وتىرىپ ەلىمىزدەگى بارشا ۇلت پەن ۇلىستى ءبىر شاڭىراقتىڭ استىنا بىرىكتىرىپ، ەتنيكاارالىق كەلىسىمنىڭ قازاقستاندىق مودەلىن قالىپتاستىردى.

ەل استاناسىن الاتاۋدان ارقاعا كوشىردى. ەسىل بويىندا تاڭعاجايىپ زاماناۋي ەلوردا سالىپ، ونى باتىس پەن شىعىستىڭ اراسىن جالعاعان، تورتكۇل دۇنيەنىڭ ساياساتى توعىسقان باعانالى ورداعا اينالدىردى.

تاۋەلسىزدىكتىڭ ەلەڭ-الاڭىندا«بولاشاق» حالىقارالىق ستيپەندياسىن تاعايىنداپ، ەلىمىزدىڭ مىڭداعان جاستارىنا الەمنىڭ ەڭ وزىق ۋنيۆەرسيتەتتەرىندە ءبىلىم الۋىنا جاعداي جاسادى. ال قازاقستاندا «نازاربايەۆ» ۋنيۆەرسيتەتى مەن «نازاربايەۆ زياتكەرلىك مەكتەپتەرىن» اشتى.

قاراپايىم قازاقستاندىقتاردىڭ ءال-اۋقاتىن ارتتىرۋدى قاشاندا مەملەكەتتىك ساياساتتىڭ باستى وزەگى ەتىپ وتىردى.

ءبىر سوزبەن ايتقاندا، ەلباسى حالقىمىزدىڭ عاسىرلار كۇتكەن ارمانى مەن اڭسارىن ىسكە اسىردى.

ارينە، قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ پرەزيدەنتتىك وكىلەتتىگىن توقتاتقانىمەن، قازاقستان حالقى اسسامبلەياسىنىڭ، «نۇر وتان» پارتياسىنىڭ، قاۋىپسىزدىك كەڭەسىنىڭ ءتوراعاسى بولىپ قالا بەرەدى. وسىعان دەيىن ەلباسىنىڭ باستاماسىمەن تۇجىرىمدالعان ەلىمىزدىڭ دامۋ ستراتەگياسى، ىشكى-سىرتقى ساياسي باسىمدىقتارى ءارى قاراي ساباقتاستىعىن ۇزبەي، ءوز جالعاسىن تابا بەرەتىندىگىن كۇنى كەشە عانا انت قابىلداعان مەملەكەت باسشىسى قاسىم-جومارت كەمەل ۇلى توقايەۆ باسا ايتتى.

جاڭادان تاعايىندالعان مەملەكەت باسشىسى ەلباسىنىڭ ەرەن ەڭبەگىن ۇلىقتاۋ ماقساتىندا ومىراۋىنا «التىن جۇلدىز» تاعىپ، «حالىق قاھارمانى» اتاعىن بەردى. ەلباسىنىڭ ءتول تۋىندىسى بولىپ سانالاتىن ەلوردامىزدى «نۇرسۇلتان» دەپ اتاۋدى، ەلوردامىزدا ەلباسىنا ارنالعان مونۋمەنت تۇرعىزۋدى، ەلىمىزدىڭ بارلىق وبلىس ورتالىقتارىندا نازاربايەۆ اتىنا كوشە بەرۋدى ۇسىندى.

«الماتى – ەلباسى– تاۋەلسىزدىك» اجىراماس ۇعىم.ەلىمىزدىڭ تاۋەلسىز تاريحىنىڭ جارقىن بەتتەرى الماتىدا اشىلعان. نۇرسۇلتان نازاربايەۆ مەملەكەتتىلىگىمىزدى تۇعىرلى، ەلدىگىمىزدى عۇمىرلى ەتەر كوپتەگەن اسا ماڭىزدى قۇجاتتارعا دا وسى الماتىدا قول قويعان. ەلباسىنىڭ سوزىمەن  ايتقاندا، «الماتى – تاۋەلسىزدىكتىڭ التىن بەسىگى».

سوندىقتان دا الماتى قالاسى ءاردايىم ەلباسىنىڭ ەرەكشە نازارىندا، تۇراقتى قامقورلىعىندا" - دەگەن ىستىق لەبىزىن بىلدىرگەن قالا اكىمى ناۋرىز مەرەكەسى الماتى قالاسىندا ءتورت كۇن بويى تويلاناتىنىن اتاپ ءوتتى. 

"ءبىزدىڭ تىلەيتىنىمىز – كەلىپ جەتكەن ءاز ناۋرىز مەملەكەتىمىزگە، ءار وتباسىعا ب ا ق پەن بەرەكە، ىرىس پەن ىنتىماق الىپ كەلسىن. ەلىمىز امان، جۇرتىمىز تىنىش بولسىن. بىرلىگىمىز بەن بەرەكەمىز ارتا بەرسىن. تاۋەلسىزدىگىمىز تۇعىرلى، ەلدىگىمىز باياندى بولسىن!

ۇلىستىڭ ۇلى كۇنى قۇتتى بولسىن اعايىن!"- دەپ قۇتتىقتاۋىن اياقتاعان باۋىرجان بايبەك الماتى قالاسىنىڭ تۇرعىندارى مەن قوناقتارىنىڭ كوڭىلىن قالدىرماي، سۋرەتكە ءتۇسىپ، دامنەن اۋىز ءتيدى.

ۇسىنعان: ماقپال سەمباي