ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆا ءار بالاعا بەرىلەتىن 21 مىڭ تەڭگە جاردەماقىعا ءوتىنىشتىڭ قاشان قابىلداناتىنىن ايتتى دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ. 

"ءبىز كەشە عانا سەلەكتور وتكىزدىك. ءمينيستردىڭ تاپسىرىسى بار. ءقازىر اكىمدىك، "ازاماتتارعا ارنالعان ۇكىمەت" مەملەكەتتىك كورپوراسيا، سوسىن ءبىزدىڭ جەرگىلىكتى دەپارتامەنتتەرىمىز جانە جۇمىسپەن قامتۋ ورتالىقتارى بار عوي. ولاردىڭ ءبارى وتىنىشتەردى قابىلدايدى"، - دەيدى سۆەتلانا جاقىپوۆا.

ۆيسە-مينيستردىڭ ايتۋىنشا، 1 ساۋىردەن باستاپ ءوتىنىش بەرۋدىڭ قاجەتى جوق. سەبەبى الدىمەن زاڭ كۇشىنە ەنۋى كەرەك. سونىڭ نەگىزىندە ءمينيستردىڭ بىرنەشە بۇيرىعىنا قول قويىلادى. اتالمىش قۇجاتتار جەرگىلىكتى اتقارۋشى ورگاندارعا تۇسكەننەن كەيىن عانا وتىنىشتەر قابىلدانا باستايدى. ءبىراق اتاۋلى الەۋمەتتىك كومەكتىڭ ءبارى 1 ساۋىردەن باستاپ ەسەپتەلەدى.

"مەن ءوزىم بىرنەشە رەت ايتتىم، حالىققا 1-نەن باستاپ ءوتىنىش بەرىڭىزدەر دەپ ايتۋعا بولمايدى. سەبەبى زاڭ ەندى عانا قابىلدانادى. اتالعان قۇجات 28 ناۋرىزدا سەناتتىڭ كەڭەيتىلگەن وتىرىسىنا شىعارىلادى. ودان كەيىن سەنات ماقۇلداپ، قولداسا، ەلباسىنىڭ قول قويۋىنا جىبەرىلەدى.

ال قازىرگى زاڭعا سايكەس، اتاۋلى الەۋمەتتىك كومەك ءوتىنىشتى بەرگەن كۇننەن ەمەس، بەرگەن ايدان باستاپ تاعايىندالادى. دەمەك، ازاماتتار 15 ساۋىردە كەلە مە، 29 ساۋىردە كەلە مە، ءبارىبىر اتاۋلى الەۋمەتتىك كومەك ولارعا 1 ساۋىردەن باستاپ تاعايىندالادى. وسى نورما ساقتالا بەرەدى"، - دەپ اتاپ كورسەتتى سۆەتلانا جاقىپوۆا.

ۆيسە-مينيستردىڭ سوزىنە قاراعاندا، بۇگىندە ءمينيستردىڭ ارنايى بۇيرىقتارى دايىن تۇر. زاڭ قابىلدانسا، اتالعان قۇجاتتار بىردەن ادىلەت مينيسترلىگىنىڭ تىركەۋىنەن وتەدى.

ءسويتىپ، بارلىق جەرگىلىكتى اتقارۋشى ورگاندارعا تاراتىلادى. سودان سوڭ وتىنىشتەر قابىلدانادى.

"سوندىقتان 1 ساۋىردەن بارىپ، ءوتىنىشتى قابىلداۋدى تالاپ ەتسە دە، جەرگىلىكتى اتقارۋشى ورگاندار ونى قابىلداي المايدى. ولاردىڭ بارلىعى بۇيرىقتى كۇتەدى. ەلباسى زاڭعا قول قويدى ما، ەرتەسىندە بىردەن بۇيرىق تىركەۋدەن ءوتۋى كەرەك. ءبىز ءبارىن دايىنداپ قويدىق. جەرگىلىكتى اتقارۋشى ورگاندار دا بىردەن حابارىن بەرەدى"، - دەپ ءتۇسىندىردى ەڭبەك جانە حالىقتى الەۋمەتتىك قورعاۋ ۆيسە-مينيسترى.

ەستەرىڭىزگە سالا كەتەيىك، قازاقستاننىڭ تۇڭعىش پرەزيدەنتى ءار بالاعا بەرىلەتىن جەكە الەۋمەتتىك كومەك كولەمىن كەم دەگەندە 21 مىڭ تەڭگەگە دەيىن كوتەرۋدى تاپسىرعان بولاتىن.