ورال قالاسىنداعى نازاربايەۆ زياتكەرلىك مەكتەبىنىڭ 12س سىنىبىندا وقيتىن الينا مولداعالييەۆا – «التىن بەلگىدەن» ۇمىتكەر ۇزدىك وقۋشى. ءبىلىمپاز ورەن ءقازىردىڭ وزىندە اقش پەن گونكونگتىڭ 11 جوعارى وقۋ ورنىنان شاقىرتۋ الدى دەپ حابارلايدى Qamshy.kz اقپارات اگەنتتىگى egemen.kz سايتىنا سىلتەمە جاساپ.

الينانىڭ تاڭداۋى اقش-تىڭ پەنسيلۆانيا شتاتى فيلادەلفيا قالاسىنداعى Drexel University ءبىلىم ورداسىنا ءتۇسىپ تۇر. ول مۇندا Chemical Engineering (حيميالىق ينجەينەريا) ماماندىعى بويىنشا باكالاۆر جانە ماگيستر دارەجەسىن الىپ شىقپاق. ءبىلىمدى بويجەتكەن بۇل مۇمكىندىككە اقش پرەزيدەنتىنىڭ گرانتىن جانە Drexel ءبىلىم گرانتىن ۇتىپ الىپ قول جەتكىزگەن.

الينا مولداعالييەۆا بۇدان بولەك ماسكەۋ فيزيكا-تەحنيكا ينستيتۋتىندا وتكەن حالىقارالىق حيميا وليمپياداسىنىڭ جۇلدەگەرى، بۇۇ مودەلى مەكتەپ كونفەرەنسياسىنىڭ Best Speech Certificate (ۇزدىك ءسوز) سەرتيفيكات يەگەرى، FLEX ليدەر الماسۋ باعدارلاماسىنىڭ ءفيناليسى، اقش-تىڭ Johns Hopkins University وقۋ ورنىندا وتكەن CTY قاتىسۋشىسى، شاڭعى جارىسىنان قالا چەمپيونى، سپورتتىق-بالدىق بي بويىنشا وبلىس جەڭىمپازى اتانعان، سان قارلى تالانت يەسى. الەۋمەتتىك ورتاداعى قوزعالىستارعا دا بەلسەنە ارالاساتىن الينا Ironman 70.3 Astana جانە Global Conference on Primary Health Care سەكىلدى ءىرى حالىقارالىق شارالارعا ۆولونتەر بولىپ قاتىسقان.

زياتكەرلىك مەكتەپتىڭ ماعان بەرگەن مۇمكىندىگىنە زور جاۋاپكەرشىلىكپەن قارايمىن. مەن يەلەنگەن 11 وقۋ گرانتىنىڭ التاۋى تولىق گرانت بولسا، قالعان ۋنيۆەرسيتەتتەر وقۋعا جەڭىلدىك ۇسىندى. مەن تاڭداعان پەنسيلۆانيا شتاتىنداعى Drexel ۋنيۆەرسيتەتىنىڭ ءبىر ارتىقشىلىعى – 1-كۋرستان باستاپ كومپانيالاردا جۇمىس ىستەپ، تاجىريبە جيناقتاۋعا مۇمكىندىك بەرەدى. كەلەشەكتە وتانىما كەلىپ، حيميالىق ينجەنەريا سالاسىن دامىتقىم كەلەدى، - دەيدى الينا.

ۇسىنعان: ماقپال سەمباي