«جاس ەۋروپا» حالىقارالىق ءان بايقاۋىندا الماتىلىق تەمىرلان ءوسىمقۇل جۇلدەلى ءبىرىنشى ورىندى يەلەندى دەپ حابارلايدى Qamshy.kz اقپارات اگەنتتىگى 24.kz تەلەارناسىنىڭ سايتىنا سىلتەمە جاساپ.

12 جاستاعى جەرلەسىمىز حالىق ءانى «دايديداۋدى» ورىنداپ، قازىلار القاسىن تاڭداي قاقتىردى.

ءداستۇرلى كونكۋرس بيىل 12-رەت كييەۆ قالاسىندا ۇيىمداستىرىلدى. وعان الەمنىڭ 9 ەلىنەن 80 جۋىق ونەرپاز قاتىسقان. جاس ەۋروپا» حالىقارالىق ءان بايقاۋى بيىل «اۆتورلىق»، «ۇلتتىق»، «الەمدىك حيت»، «حالىق ءانى» جانە «اكادەميالىق ۆوكال» دەپ اتالعان بەس اتالىم بويىنشا ءوتتى.

قازاقستاندىق تەمىرلان ءوسىمقۇل «حالىق ءانى» اتالىمى بويىنشا ۇزدىك شىقتى.

تەمىرلان ءوسىمقۇل، «جاس ەۋروپا» حالىقارالىق ءان بايقاۋىنىڭ جەڭىمپازى: - قوبالجۋ بولدى شىعاردىڭ الدىندا. ءبىراق ودان كەيىن ءبارى ءوتتى، ءانىمدى جاقسى ايتتىم. كوڭىل-كۇيىم كەرەمەت. مۇنداي كونكۋرستارعا شىققانمىن، ءبىراق شەتەلگە ءبىرىنشى رەت شىعىپ تۇرمىن. مەن بۇگىن حالىقتىڭ ءانىن «دايديداۋدى» ايتتىم.

قارلىعاش ابدىكارىموۆا، ءادىل قازىلار القاسىنىڭ مۇشەسى، ق ر مادەنيەت قايراتكەرى: - بىلتىر ءبىز كەلگەن بولاتىنبىز وسىندا. وندا دا ءبىزدىڭ بالالار وتە تاماشا ءان ايتىپ، ورىن الىپ قايتقان بولاتىن. ەندى بيىل دا مىنەكەي بالالارىمىز وتە تاماشا اندەرىن وزدەرىنىڭ ايتىپ، ونىڭ ۇستىنە ءبىز بيىل كادىمگىدەي جاقسىلاپ دايىنداپ كەلدىك. بيىل بىلتىرعى بالالاردان دا كىشكەنە جوعارىلاۋ بالالاردى الىپ كەلدىك شىنىن ايتۋ كەرەك. بۇل بالالاردىڭ ءوزى حالىقارالىق كونكۋرستان دا ورىن العان بالالار. سوندىقتان دا ءقازىر وسى جەردە دە ءبىزدىڭ كوڭىلىمىزدەن شىعىپ وتىر. وزدەرىنىڭ ولەڭدەرىن ءوز تىلىندە ايتتى داعى، ەكى قىزىمىز ۋكراين تىلىندە، بالامىز يتاليان تىلىندە ءان ايتتى.

ۇسىنعان: ماقپال سەمباي