اتىراۋ وبلىسىنىڭ اكىمى سپورت نىسانىنداعى جۇمىستاردىڭ بارىسىن ينسپەكسيالاپ، مەردىگەر ۇيىمنىڭ وكىلدەرمەن سويلەستى.
قازىرگى كەزدە تابيعي جابىندى جاساندى جابىنمەن الماستىرۋ جۇمىستارى اياقتالىپ كەلەدى. «مۇنايشى» ستاديونىندا سوڭعى ۇلگىدەگى گازون توسەۋ اعىمداعى جىلدىڭ ناۋرىز ايىندا باستالىپ، ءقازىر جۇمىستار 80% كولەمدە اتقارىلدى.
جوبانىڭ باس سپونسورى - «GAZ stroy montazh KZ» ج ش س، قاجەتتى تەحنيكانى «اتىراۋينجستروي» ج ش س بەردى.
اتىراۋ وبلىسى سپورت جانە دەنە شىنىقتىرۋ باسقارماسىنىڭ اقپاراتى بويىنشا، جەردى تەگىستەۋ كەزىندە قانداي دا بولماسىن سىزاتتار مەن قيعاشتىقتاردى بولدىرماۋ ماقساتىندا، جوبانىڭ العاشقى كەزەڭىندە گەولوگيالىق جانە گەودەزيالىق جۇمىستار جۇرگىزىلدى.
- فۋتبول الاڭىنىڭ استىنداعى درەناجدىق تاباندى جاساۋ ءۇشىن قالىڭدىعى 30 سم نىعىزدالعان باللاست، قالىڭدىعى 20 سانتيمەترلىك 5-20 فراكسياسىنداعى نىعىزدالعان قيىرشىق تاس توگىلەدى جانە نىعىزدالعان جاعدايدا 10 سانتيمەترلىك ەلەم جاسالادى. سودان سوڭ، الاڭعا Taishan كومپانياسىنىڭ جاساندى گازونى توسەلەدى، وعان 18 كگ كۆارس قۇمى جانە 10 كگ SBR رەزەنكە تۇيىرشىگى توگىلەدى،-دەپ باياندادى «GAZ stroy montazh KZ» ءجشس-نىڭ باس ديرەكتورى مۇحتار باقىت.
-الاڭنىڭ اۋماعى 5 مەترگە ۇلعايتىلدى، ءسويتىپ، ول ەندى ۋەفا-نىڭ ستاندارتتارىنا تولىقتاي سايكەس كەلەدى. جابىندى اۋىستىرۋ جۇمىستارى بارىسىندا نىسانعا 6 مىڭ تەكشە مەترگە جۋىق ينەرتتى ماتەريالدار اكەلىندى، توسەۋ جۇمىستارىنا 22 جۇمىسشى تارتىلدى.
سپورت جانە دەنە شىنىقتىرۋ باسقارماسىنىڭ باسشىسى رينات يبراگيموۆتىڭ ايتۋىنشا، بىرنەشە جىل جاتقان بۇرىنعى تابيعي گازون بەتى تەگىس ەمەس جانە باسقا دا ولقىلىقتارىنا بايلانىستى فۋتبولشىلارعا قولايسىز بولعان ەدى. ەندى، يننوۆاسيالىق جابىننىڭ ارقاسىندا اتىراۋلىق سپورتشىلاردىڭ ويىن ساپاسى ايتارلىقتاي جاقسارۋى ءتيىس. سپورتتىق نىساندا بولعان اتىراۋ وبلىسىنىڭ اكىمى نۇرلان نوعايەۆ وسىنداي سەنىم ءبىلدىردى.
- ستاديوننىڭ جابىنىن اۋىستىرۋ جۇمىستارى ۋاقتىلى جانە ساپالى اياقتالۋى ءتيىس. فۋتبولشىلاردىڭ جاتتىعۋى جانە حالىقارالىق دەڭگەيدەگى ويىنداردى وتكىزۋى ءۇشىن لايىقتى ورىن بولۋى كەرەك. ءبىزدىڭ سپورتشىلارىمىزدىڭ ويىن ساپاسى الاڭنىڭ ساپاسىنا تىكەلەي تاۋەلدى، كوماندانىڭ تۋرنيرلىك كەستەدە جىلجۋى دا وسىعان بايلانىستى ،– دەدى وبلىس اكىمى مەردىگەرلەرگە.
اتاپ وتەيىك، «مۇنايشى» ستاديونى 1950 جىلى اشىلعان، سىيىمدىلىعى – 8 690 ادام. گازونى جاڭارتىلعاننان كەيىن ستاديوننىڭ اۋماعى 110 دا 70 مەتردى قۇراپ، ۋەفا-نىڭ ستاندارتتارىنا سايكەس بولادى.