جاسىم كەلگەن سايىن قىرىقتان اسقان ايەلدەرگە دەگەن قۇرمەتىم ءوسىپ كەلەدى. ونىڭ سەبەبى كوپ.

مىسالى، قىرىقتان اسقان ايەل ەشقاشان سەنى ءتۇن جارىمىندا وياتىپ، «نە ويلاپ جاتىرسىڭ؟» دەپ سۇرامايدى. ونىڭ سەنىڭ نە ويلايتىنىڭا تۇكىرگەنى بار. 

ەگەر قىرىقتان اسقان ايەلگە سەنىمەن بىرگە وتىرىپ تەلەديدار كورۋ قيىن بولسا، سول ءۇشىن شاشىن جۇلىپ، بايبالام سالمايدى. سەنىڭ جانىڭدا ۋاقىت جولعاتقانشا، وزىنە ۇناعان ىسپەن اينالىسادى. جانە كوبىنەسە ول اينالىسقان ءىس – سەنىڭ تەلەديدارىڭنان الدەقايدا پايدالى ءارى قىزىقتى بولىپ شىعادى.

قىرىقتان اسقان ايەل ءوزىن وتە جاقسى بىلەدى. وزىنە بەك سەنىمدى. كىم بولعىسى، نە جاساعىسى كەلەتىنىن دە انىق بىلەدى. كىمنەن نە قالايتىنىن دا ناقتى بىلەدى. مۇنداي جاستاعى ايەلدەردىڭ كوبىسىن سەنىڭ ول تۋرالى، نە ول ىستەپ جاتقان ءىس جونىندە پىكىرىڭ قىزىقتىرمايدى.

قىرىقتان اسقان ايەلدەر وتە نامىسشىل. مەيرامحانادا، نە وپەرادا وتىرعاندا ساعان مايدان اشىپ، ۇرىس-كەرىس شىعارمايدى. ارينە، ەگەر ءوزىڭ كىنالى بولىپ تۇرساڭ، ول جازالانبايتىنىنا انىق كوزى جەتسە، ەشكىم كورمەيتىن جەردە اتىپ كەتە الادى.

قىرىقتان اسقان ايەلدەر ماقتاۋ سوزگە جومارت كەلەدى. كوبىنە لايىقسىز ماقتاي بەرەدى. سەبەبى، ولار جاقسىلىقتى قادىرلەمەۋدىڭ نە ەكەنىن جاقسى بىلەدى.

قىرىقتان اسقان ايەلدەر سەنى قۇربىلارىمەن تەز تانىستىرادى. ويتكەنى، وزىنە سەنىمدى. جاس قىزدار سەرىگىن قۇربىلارىنا تانىستىرۋعا اسىقپايدى. سەبەبى، سەرىگىنە سەنىمى بولمايدى.

قىرىقتان اسقان ايەلگە سەن ونىڭ قۇربىلارىن سۇلۋ دەپ ماقتاساڭ دا ءبارىبىر. ول قۇربىلارى ەشقاشان ساتىپ كەتپەيتىنىن جاقسى بىلەدى. 

قىرىقتان اسقان ايەلدەردىڭ تۇيسىگى وتكىر. ونىڭ الدىندا سىلتاۋ ايتىپ ءدىلمارسۋدىڭ قاجەتى جوق. ولار ونسىز دا سەن تۋرالى ءبارىن بىلەدى.

قىرىقتان اسقان ايەلدەرگە قىپ-قىزىل پومادا كەرەمەت جاراسادى. جاستار تۋرالى ولاي دەي المايمىز. كوزىنىڭ اينالاسىنداعى بىردى-ەكىلى ءاجىمىن بايقاماۋعا تىرىسساڭ، قىرىقتان اسقان ايەلدەر جاس قىزعا قاراعاندا الدەقايدا شىرايلى، تارتىمدى، باۋراپ الاتىن ءبىر قۇدىرەتى بولادى. 

قىرىقتان اسقان ايەلدەر ۇنەمى اشىق، جالعان سويلەمەيدى. ەگەر سەن ناقۇرىس بولساڭ، ءوزىڭدى مال سياقتى ۇستاساڭ، ونىڭدى بىردەن بەتىڭە ايتادى. ول سەن تۋرالى نە ويلاپ قالدى ەكەن دەپ ەشقاشان قينالمايسىڭ. سوندىقتان قىرىقتان اسقان ايەلدەردى قۇرمەتتەۋدىڭ سەبەبى كوپ. 

وكىنىشكە وراي، قىرىقتان اسقان ەركەكتەر تۋرالى ءداپ وسىلاي ايتا المايسىڭ. ءاربىر سۇيكىمدى، كەلىستى، اجارلى، اقىلدى، جاقسى كۇتىنەتىن قىرىقتان اسقان ايەلگە - قارنى قامپيعان، تىزەسى شىعىپ كەتكەن شالبار كيىپ، جيىرما جاسار داياشى قىزدىڭ كوزىنشە ءوزىن ەسەرسوق قىپ كورسەتەتىن قىرىقتان اسقان ەركەك بار. 

حانىمدار، سىزدەردەن كەشىرىم سۇرايمىن. «سيىردى تۇتاس ساتىپ الىپ نە كەرەك، ءسۇتتى تەگىن الا الساڭ» دەيتىن كوكەزۋ ەركەكتەر ءۇشىن مەندە ءبىر جاڭالىق بار. بۇگىنگى تاڭدا ايەلدەردىڭ 80 پايىزى نەكە قۇرۋعا قۇلىقتى ەمەس. نەگە؟ سەبەبى، ءبىر شۇجىق ءۇشىن ءبۇتىن شوشقانى ساتىپ الۋدىڭ ءمانىسى كەتكەن. 

ەندي رۋني
اۋدارعان: شىنار ءابىلدا

ۇسىنعان: ماقپال سەمباي