ءوزىن مۇسىلمانمىن دەيتىن ءاربىر ءيىسى قازاق جان بەس پارىزدىڭ ءبىرى – ورازانى جىل بويى اسىعا كۇتەتىنى راس. وتىز كۇن اۋىز بەكىتىپ، تەك تاماقتان عانا ەمەس، جامان ءسوز، ءىس، ادەت، قىلىقتاردان تىيىلۋعا تىرىسقان ادام وسى ءبىر قاسيەتتى ايدا ءوزىن، ءوزىنىڭ «مەنىن»، ءناپسىسىن تىزگىندەۋگە، تارتىپكە سالۋعا تىرىسادى. ەگەر وسى وتىز كۇن بويى ورازانىڭ ناقتى ەرەجەسىن ۇستانىپ، مىندەتتەرىن ورىنداسا، ورازادان كەيىن جاقسى جاققا وزگەرگەن، بۇرىن جاقسى ادام بولسا، ودان دا جاقسى قاسيەتتەرى اشىلىپ، كوپ نارسەگە كوزقاراسى وزگەرگەن جانعا اينالارى ءسوزسىز. كەلەر جىلعى ورازاعا جەتەر-جەتپەسى بەيمالىم بولعاندىقتان، ورازامەن قيماي قوشتاسادى دا...
«دىندە زورلىق جوق». ورازا ۇستاۋدى دا بارىنە مىندەتتەمەگەن. اۋىز بەكىتپەۋگە رۇقسات ەتىلگەندەر دە بار. الايدا، بۇگىنگى تاڭدا سان ءتۇرلى سىلتاۋ ايتىپ، اۋىز بەكىتپەيتىندەر سانى قانشالىقتى كوپ بولسا، اللانىڭ امىرىنە بويۇسىنىپ، «ءتۇبى ءبىر باراتىن جەرىم – اللانىڭ الدى عوي» دەپ، پارىزدارىن ورىنداۋعا تىرىسىپ جۇرگەندەر سانى دا ارتىپ كەلەدى. شۇكىر دەيمىز.
بۇگىنگى قوزعاعىم كەلىپ وتىرعانى ورازا ۇستاماعان ادامعا قاتىستى ورازانىڭ ادەبى. «رامازاندى قۇرمەتتەۋ كەرەك. ونىڭ راقىمدىلىعى مۇمىندەردى قۋانتادى. ونىڭ العاشقى كۇندەرى راقىمدىلىق، ورتاسى كەشىرىم جانە سوڭى توزاق وتىنان قۇتىلۋ» دەگەن حاديس بار. ءيا، ءسىز بەلگىلى-بەلگىسىز سەبەپتەرمەن اۋىز بەكىتپەدىڭىز دەلىك. جارايدى، حوش. دەگەنمەن، سىيلاستىق، قۇرمەت دەگەن نارسە بار. قانشا جەردەن قارنىڭىز اشسا دا، قوعامدىق جەردە، كوپشىلىك جۇرەتىن ايماقتا ورازا كەزىندە سۋ ءىشىپ، تاماق جەپ، ادەپسىز قىلىق جاساماساڭىز ەكەن. ءيا، تۇسىنىكتى: بالكىم، تۇنگى اۋىسىمنان شىقتىڭىز، شارشاپ تۇرسىز، قارنىڭىز اش. الايدا، ءسال شىداساڭىز، ۇيىڭىزگە بارىپ تاماقتاناسىز. اۆتوبۋستا سۋدى ءسىمىرىپ، ساياباقتا اۋىز تولتىرا تاماق جەپ وتىرعانىڭىز – اۋىز بەكىتكەن جانعا ايتارلىقتاي اسەر ەتپەيتىنىن ءبىلىڭىز. سەبەبى، ول سىرتقى ەمەس، ىشكى جان-دۇنيەسىمەن كۇرەسىپ ءجۇر. ول اللانىڭ رازىلىعىنان ۇمىتتەنەدى. اللانىڭ ونىڭ تاماق جەمەگەنىنە ەمەس، امالىنا قارايتىنىن دا بىلەدى. قارنى اشىپ تا كەتپەيدى. ءبىراق ومىرىندە ءبىرىنشى رەت اۋىز بەكىتكەن جان بولسا، وعان اۋىر ءتيۋى مۇمكىن. سونى ەسكەرسەڭىز.
تاعى ءبىر ەسكەرەتىن جايت، ورازا ەكەنىن بىلە تۇرا، ءدال سول جاننىڭ اشۋىن وياتۋعا تىرىسىپ، ۇرسىسۋعا يتەرمەلەۋدىڭ دە قاجەتى جوق. ول راسىمەن دە تەك تاماقتان ەمەس، جامان ادەتتەن دە تىيىلىپ جۇرگەن ادام بولسا، سابىر ساقتاي الار. ءبىراق ورازانى جەتە ۇعا بىلمەيتىن جان بولسا، ءسوزسىز، سىزبەن ءسوز تالاستىرىپ، ايتىسىپ كەتۋى ىقتيمال. بۇل دەگەن ءسوز، يسلام ءدىنى، ورازا تۋرالى ونسىز دا ءدۇدامال ويدا جۇرگەن كوپشىلىك ءۇشىن سوققىداي ءتيىپ، يسلام ءدىنى تۋرالى ويىن تارازىلاي الماي جۇرگەن ادامنىڭ كۇمانىن ارتتىرۋى مۇمكىن. ياعني، ءسىز ورازا تۇتقان ادامنىڭ اشۋىنا ءتيىپ، ورازاسىن بۇزعانىڭىزبەن قويماي، سوعان كۋاگەر بولعان ءۇشىنشى ءبىر جاقتىڭ دا اداسۋىنا، ءدىن تۋرالى قاتە پىكىرى قالىپتاسۋىنا سەپتىگىڭىزدى تيگىزەسىز. بىلايشا ايتقاندا، جوق جەردەن كۇنا ارقالاپ الاسىز. «رامازان ايىندا ءبىر كۇنا ىستەگەن ادام ەكى ازاپ الادى. رامازاندا ءبىر جاقسىلىق جاساعان ادام ەكى ساۋاپ الادى» دەيدى حاديستە. جاقسىلىق جاساماڭىز دا، جاماندىق جاساماۋدىڭ ءوزى – جاقسىلىق ەكەنىن ەستەن شىعارماڭىز.
اۋىز بەكىتپەسەڭىز دە، ورازا كەزىندە اۋىز بەكىتكەن جاندارعا سىيلاستىق، دىنگە قۇرمەت تانىتساڭىز ەكەن. «رامازاندى قۇرمەتتەگەن ادام اللا تاعالانى قۇرمەتتەگەن بولادى» دەيدى تاعى ءبىر حاديستە. ەندەشە، ءدىنىمىزدى، ەل-جەرىمىزدى، حالقىمىزدى سىيلاپ، قولدان كەلگەنشە بىر-بىرىمىزگە قۇرمەت كورسەتىپ جۇرەيىك.
