وسىدان 14 جىل بۇرىن قوعامدا رەزونانس تۋدىرعان الماتى قالاسىندا بولعان وقيعا ءالى كۇنگە دەيىن جۇمباق كۇيىندە قالدى دەپ جازادى Qamshy.kz اقپارات اگەنتتىگى caravan.kz سايتىنىڭ دەرەگىن نەگىزگە الىپ. 

رەسەيلىك ءىرى بيزنەسمەن رامازان چاركسەليانيدى الماتى-1 ماڭىندا 2005 جىلى اتىپ كەتكەن بولاتىن. بۇل تاۋەلسىز قازاقستاندا كيللەر-ايەلدىڭ قاتىسۋىمەن بولعان العاشقى قىلمىستىق وقيعا. 

2005 جىل... قىلمىس بولعان وقيعا ورنىنا ارنايى پوليسيا قىزمەتكەرلەرى كەلدى. ولار كولىكتىڭ ىشىندە 45 جاستاعى كاسىپكەردەن بولەك ونىڭ ايەلى جانە كامەلەتكە تولماعان قىزى بولعانىن ايتقان. قىلمىس ياسساۋي كوشەسىندە بولعان. 

كۋاگەرلەردىڭ سوزىنشە، رامازان چاركسەلياني كولىكتى كپپ كابيناسىنىڭ جانىنا توقتاتقان كەزدە،  قارا كوزىلدىرىكتى ايەل ونىڭ كولىگىنىڭ قاسىنا بارعان. بەيتانىس ايەل كاسىپكەرگە بىرنەشە سۇراقتار قويىپ، نازارىن اۋدارماق بولادى. كەيىن وعان 4 رەت وق اتادى. ءبىرىنشى وق كاسىپكەردىڭ يىعىنا، ال ەكى وق قاق ماڭدايىنا تيەدى. كاسىپكەر سول جەردە تىلگە كەلمەي قايتىس بولعان. ال ءتورتىنشى وق ايەلىنىڭ سول قولىنىڭ ساۋساعىنا تيەدى. ءبىر عاجابى كولىكتىڭ ارتىندا وتىرعان بالالارعا وق تيمەي، امان قالعان. 

بىرنەشە سەكۋندقا سوزىلعان شابۋىلدان سوڭ، قىلمىسكەر وقيعا ورنىنان ءىزىن سۋىتادى. كۋاگەرلەردىڭ ايتۋىنشا، كيللەر اۋدي - 100 ماركالى كولىككە ءمىنىپ كەتكەن. ال كولىك جۇرگىۋشى ەۋروپالىق جاس جىگىت بولعان. 

بيزنەسمەننىڭ ايەلىن شۇعىل اۋرۋحاناعا جەتكىزگەن. سول ماڭداعى كۇزەتشىلەر بولسا ولەردەي ماس بولعان. اتالمىش قىلمىستىق وقيعاعا بىرنەشە سەبەپ بار.

ءبىرىنشىسى، قارسىلاستاردىڭ قاندى كەگى بولۋى ابدەن مۇمكىن. چاركسەليانيدىڭ الماتىداعى كوتەرمە-ساۋدا ورىندارىنىڭ ءبىرىن ساتىپ الۋدى ويلاستىرىپ جۇرگەنى بەلگىلى بولدى. الايدا تەكسەرۋ جۇمىستارى كەزىندە بۇل نۇسقاعا بايلانىستى ەشقانداي ايعاق تابىلمادى. 

سونداي-اق بيزنەسمەندى ولتىرۋگە تاپسىرىس رەسەيدەن كەلگەن بولۋى مۇمكىن. سەبەبى بيزنەسمەن قايتىس بولارىنان 7 جىل بۇرىن رەسەيدەن قازاقستانعا كوشىپ كەلگەن. 

بۇل ىسكە قاتىستى اسكەري قىزمەتتەگى بارلىق ايەلدەر تەكسەرۋدەن ءوتتى. ولاردىڭ قاتارىندا ىىم-دەگى، ۇقك-دەگى ءتىپتى اڭشىلىق قاۋىمداستىقتاعى ايەلدەر تەكسەرىستەن ءوتتى. ءبىراق ءبارى بەكەر بولدى. كىسى ءولتىرۋشىنىڭ ايەل ادام ەكەنى ساۋساق ءىزى ارقىلى انىقتالدى. چاركسەلياني كولىگىنىڭ تەرەزەسىندە كيللەردىڭ ساۋساق ىزدەرى قالعان. 

سونىمەن قاتار قىلمىسكەردىڭ "بورز" دەپ اتالاتىن شەشەندەردىڭ پيستولەت-پۋلەمەتىن قولدانعانى انىقتالدى. 

مۇنداي قارۋ-جاراقتار رەسەيدەگى ەكىنشى شەشەن سوعىسىنان كەيىن وتە كوپ بولدى. بارلىق قارۋ-جاراق يەسىنە قاتىستى تەرگەۋ جۇمىستارى جۇرگىزىلسە دە، سوڭى ناتيجەسىز اياقتالدى. 

پوليسيا قىزمەتكەرلەرى كىسى ولتىرۋگە تاپسىرىس بەرگەن ادامعا قاتىستى ءتۇرلى بولجام جاساعانىمەن،  كيللەردىڭ كۋاگەرلىگى ارقىلى عانا قىلمىستى دالەلدەي الاتىن ەدى. ال كيللەر-ايەل سول كۇيى ءىز-تۇسسىز جوعالدى. ەشقانداي ايعاق تا تابىلمادى. ەڭ وكىنىشتىسى، بيزنەسمەندى ولتىرۋگە تاپسىرىس بەرگەن ادام مەن كيللەر 14 جىل بويى بوستاندىقتا تايراڭداپ ءجۇر.

اۋدارعان: اسەل بولات قىزى