قازاقستاندىق ءانشى ءادىلحان ماكين حالىقارالىق "ۆيتەبسك-2019" جاس ورىنداۋشىلار بايقاۋىندا كوش باستاپ كەلەدى دەپ حابارلايدى Qamshy.kz اقپارات اگەنتتىگى.
ءبىرىنشى كۇننىڭ قورىتىندىسى بويىنشا ءادىلحان ماكين 90 ۇپايدان 89 جينادى. ول يگور نيكولايەۆتىڭ "وزەرو نادەجدى" ءانىن ورىندادى. بايقاۋدى بەلارۋس يۆان زدونيۋك اشتى.
كونكۋرسانتتار سلاۆيان كومپوزيتورلارىنىڭ شىعارمالارىن ورىندادى. "ءبىر عانا ۇپاي جەتپەي قالدى. جاراتقانعا مىڭ العىس، قازىلار القاسىنا قۇرمەتىم شەكسىز، مەنى قولداپ جاتقانداردىڭ بارلىعىنا العىس ايتامىن"، - دەپ جازدى ءانشى Instagram جەلىسىندەگى پاراقشاسىندا.
باستاپقىدا بايقاۋدا 18 ەلدىڭ قاتىسۋشىلارى ونەر كورسەتەدى دەپ جوسپارلانعان، الايدا سلوۆاكيا مەن كۋبانىڭ ارتىستەرى كەلە الماي قالدى.
وسىعان بايلانىستى بيىل 16 ەلدىڭ ونەرپازى باس جۇلدەگە تالاسادى. شاراعا العاش رەت شۆەيساريا مەن جۇڭگو انشىلەرى قاتىسىپ جاتىر.
بيىلدان باستاپ بايقاۋعا وزگەرىستەر ەنگىزىلدى: ۇيىمداستىرۋشىلار جارتىلاي فينالدان باس تارتۋدى ۇيعارعان. ارتىستەردىڭ ۆوكالىنا رەسەيدىڭ حالىق ءارتىسى تامارا گۆەردسيتەلي باستاعان ءادىل قازىلار القاسى باعا بەرەدى.
پىكىر قالدىرۋ