وقۋ-اعارتۋ ءىسىنىڭ ارداگەرىنىڭ ايتۋىنشا، شىمكەنت قالاسىنداعى №38 گۋمانيتارلىق مەكتەپ-گيمنازياسىنداعى ورىس تىلىندە وقىتاتىن سىنىپتارداعىلاردىڭ كوبىسى قازاق بالالارى. قالانىڭ شاعىن اۋداندارىنان كەلىپ وقىپ ءجۇر. «تۇرعان جەرىڭىزدە قازاق مەكتەبى بار عوي. بالانى نەگە مۇندا جەتەكتەپ اكەلىپ وقىتىپ ءجۇرسىز؟» – دەگەن سۇراققا اتا-انالار: «قازاق مەكتەپتەرى ناشار وقىتادى»، – دەپ جاۋاپ بەرگەن.

– ال شىن مانىسىندە قازاق مەكتەبىنىڭ وقىتۋ بازاسى، جاڭا تەحنولوگيالارمەن قامتىلۋى، مۇعالىمدەردىڭ ءبىلىم دەڭگەيى ورىس مەكتەبىندەگىدەن كەم ەمەس. سوندا دا كەيبىر اتا-انالار «ورىسشا ءبىلىم الماسا بالا كۇنىن كورە المايدى، نانىن تاۋىپ جەي المايدى، قىزمەتكە تۇرا المايدى» دەگەن تەرىس ۇعىمنان ءالى ارىلا الماي كەلەمىز، – دەيدى اۆتور.

ارداگەر ءمۇعالىم وزگە تىلدە وقىعان بالا ءوز ەلىنە مۇرنىن شۇيىرە قارايتىنىن ايتادى.

– «بالا ءوز تىلىندە تاربيەلەنبەسە، ءوز حالقىنا قىزمەت ەتە المايدى»، – دەيدى الاش ارىسى احمەت بايتۇرسىنوۆ. انىعىندا ورىس مەكتەبىندە وقىعان قازاق بالاسى ءوز انا ءتىلىنىڭ قاينار بۇلاعىنان سۋسىنداپ، مەيىرىن قاندىرا المايدى. انا تىلىندە ۇلتتىق قۇندىلىقتارىمىزبەن تانىسىپ، كوكەيىنە توقىپ، بولاشاعىنا باعىت-باعدار الا المايدى. سەبەبى ۋىزعا جارىماعان بالا ءار نارسەگە، شەتەلگە ەلىكتەگىش كەلەدى. ءوز ۇلتىنا مۇرنىن شۇيىرە قارايدى. ءوز ۇلتىن مەنسىنبەيتىن ۇرپاق ءوز ەلىن دە، جەرىن دە سۇيمەيدى. ال ءوز انا تىلىندە وقىعان جاس ۇرپاقتان ۇلتىن سۇيگەن ەر-ازاماتتار ءوسىپ شىعادى. وسى ورايدا ورىس مەكتەبى بالالارعا ۇلتتىق يدەولوگيانى، ۇلتتىق تالىم-تاربيەنى بەرە المايدى. بالا ەڭ الدىمەن ءوز انا تىلىندە ءبىلىم الۋى كەرەك، – دەيدى كوشكىنباي ەلىكبايەۆ.