جامبىل وبلىسى شۋ اۋدانىنداعى ەڭ شالعاي ورنالاسقان اۋىلدىق وكرۋگتەردىڭ ءبىرى بالۋان شولاقتا دارمەنبەكوۆتەر وتباسىنا بەس بولمەلى ءۇيدىڭ كىلتى تابىس ەتىلدى. «Nur Otan» پارتياسىنىڭ «باقىتتى وتباسى» جوباسى اياسىندا جۇزەگە اسىرىلىپ وتىرعان بۇل شارا پارتيانىڭ اۋداندىق فيليالى ءتوراعاسىنىڭ ءبىرىنشى ورىنباسارى نايمان سۇلتانبايەۆتىڭ باستاماسىمەن جاسالىپ وتىرعانىن اتاپ وتكەن ءجون.

بەس بولمەلى ءۇيدى ساتىپ الۋعا دەمەۋشىلىك كورسەتكەن – بالۋان شولاق اۋىلىنىڭ تۇرعىنى، «قالقا» شارۋا قوجالىعىنىڭ جەتەكشىسى ساعادات مادالييەۆ ەكەنىن دە ايتا كەتۋ كەرەك. جومارت جۇرەكتى ازامات بۇرناعى جىلدارى دا ءوز اۋىلىنىڭ تۇرعىندارىنا مەيلىنشە كومەك كورسەتىپ، ءبىرقاتار وتباسىلارعا ماتەريالدىق جاعىنان قول ۇشىن بەرگەن. اتاپ ايتار بولساق، سول اۋىلدىڭ ماڭىنداعى قورعانعا قورشاۋ سالۋ ماقساتىندا ءۇش ميلليون ەكى ءجۇز مىڭ تەڭگە كولەمىندە اقشا ءبولىپ بەرىپتى. وعان قوسا، بىلتىر بالۋان شولاقتا ۇلكەن مەشىت سالىنعاندا ساعادات مادالييەۆ ءبىر تۇيە مەن ءبىر ميلليون تەڭگە قارجى قاراستىرىپ، ۇلكەن سىي جاساپتى. مىنە، جۋىردا عانا التى بالانىڭ اتا-اناسىنا بەس بولمەلى ءۇيدى ساتىپ الىپ بەرىپ، كىلتىن سالتاناتتى تۇردە تابىس ەتتى.

سالتاناتتى شارا بارىسىندا «Nur Otan» پارتياسى شۋ اۋداندىق فيليالى ءتوراعاسىنىڭ ءبىرىنشى ورىنباسارى نايمان سۇلتانبايەۆ ىزگى تىلەگىن جەتكىزىپ، اۋىل ازاماتتارىنا العىسىن جەتكىزدى. «بالۋان شولاق اۋىلىنىڭ بىرلىگى بۇرىننان بەكەم، تىرلىگىدە تياناقتى. جەتىم-جەسىرىن جىلاتپاعان اتا-بابامىزدىڭ اماناتىن قاز-قالپىندا ساقتاپ كەلە جاتقان اۋىل. ولار كەز كەلگەن كەزدە ءبىر جەڭنەن قول، ءبىر جاعادان باس شىعارا الادى. بۇعان وسى اۋىلدا اكىم بولىپ قىزمەت ىستەپ جۇرگەن كەزدە-اق كۋا بولعانمىن. باسپانا يەلەرىنە قۇتتى بولسىن دەيمىن» - دەدى نايمان سۇلتانبايەۆ.

قايىرىمدىلىق شاراسىنىڭ باس-اياعىندا ءجۇرىپ، جۇرتشىلىقتى ءدال وسىنداي يگى شاراعا جۇمىلدىرا بىلگەن، تۇيگەندەرى مەن كورگەندەرى كوپ اق سامايلى اجە شىمشىق مادالييەۆا باستاعان ءبىرقاتار انالار مەن اۋىلدىق اقساقالدار كەڭەسىنىڭ ءتوراعاسى مارات ساعىندىقوۆ ۇيىمداسا كەلە سۋ جاڭا ءۇي بەرەكەلى بولسىن دەگەن نيەتتە اۋىلدىقتارعا داستارحان جايدى. سونداي-اق،  «Nur Otan» پارتياسى اۋداندىق فيليالى  قونىس يەلەرىنە توڭازىتقىش سىيعا تارتىپ، مارتتىك جاسادى. سونىمەن بىرگە، جوعارىدا اتى اتالعان اق جاۋلىقتى انالار قۋانىش يەسىنىڭ بالالارىنا كيىم-كەشەك بەردى.

شىنىن ايتۋ كەرەك، قايىرىمدىلىققا جانى قۇمار ازاماتتار ءوزى جاساعان جاقسىلىعىن كوپشىلىككە جاريا ەتۋدى ءجون سانامايدى. الايدا، ساعادات مادالييەۆتىڭ قايىرىمدىلىعى وزگە دە كاسىپكەرلەرگە ۇلگى بولسا دەگەن نيەتتەمىز. كاسىپكەردىڭ ءوزى «انامىز ىلعي دا «جاقسىلىق جاساۋعا اسىعىپ تۇرىڭدار، قايىرىن وزدەرىڭ كورەتىن بولاسىڭدار» دەيدى. ءبىز ءۇشىن انامىزدىڭ ءاربىر ايتقان ءسوزى زاڭ. ال، مۇقتاج ازاماتتاردىڭ قۋانعان ءساتىن كورۋ – مەن ءۇشىن ۇلكەن قۋانىش» دەيدى.

 اتالمىش قايىرىمدىلىق شاراسىنىڭ سوڭىندا سەكسەننەن اسقان شىمشىق اجەمىز كورەگەندىك تانىتىپ، اۋىل تۇرعىندارىن اۋىزبىرشىلىككە شاقىردى.  

شاپاعات قونىسباي