جامبىل وبلىسدا اعىمداعى جىلدىڭ جارتى جىلىندا ەكونوميكانىڭ ءوسۋى – 103،8 پايىزدى قۇراپ وتىر. بۇل تۋرالى وبلىس اكىمى اسقار مىرزاحمەتوۆ وبلىستىق ءماسليحاتتىڭ كەزەكتەن تىس وتكەن سەسسياسىندا اعىمداعى جىلدىڭ العاشقى جارتىجىلدىعىنا بەرگەن ەسەبىندە باياندادى.
«ونەركاسىپ ءوندىرىسىنىڭ كولەمى 3 پايىزعا، وڭدەۋ ونەركاسىبى 5،4 پايىزعا ءوستى. نەگىزگى كاپيتالعا سالىنعان ينۆەستيسيا 12،7 پايىزعا ارتتى. وسى ورايدا بيۋدجەتتەن تارتىلعان ينۆەستيسيا ازايىپ، جەكە سەكتوردىڭ ۇلەسى كوبەيىپ كەلە جاتقانىن ايتۋعا بولادى. ەسەپتى كەزەڭدە 17 ميلليارد تەڭگەگە 7 جوبا ىسكە قوسىلدى. جىل سوڭىنا دەيىن 46 ميلليارد تەڭگەگە 9 جوبا ىسكە اسىرىلادى. 32،2 ميلليارد تەڭگەگە باعالانعان 2 جوبا شەتەل ينۆەستورلارىنىڭ قاتىسۋىمەن اتقارىلادى. ولار – «Kaz-ir Agro» ءجشس-نىڭ (يران) «سافلور مايىن شىعارۋ زاۋىتىن كەڭەيتۋ» جانە «M-KATGREEN» (فرانسيا) كومپانياسىنىڭ «كۇن ەلەكتر ستانساسىنىڭ قۇرىلىسى مەن پايدالانۋى» جوبالارى.
بولشەك ساۋدا 104،3 پايىزدى، كوتەرمە ساۋدا 109،8 پايىزدى قۇرادى.
ينفلياسيا دەڭگەيى (2018 جىلدىڭ جەلتوقسانىنا) 102،3 پايىز. بۇل رەسپۋبليكالىق ورتا كورسەتكىشتەن تومەن.
اۋىل شارۋاشىلىعىنىڭ ءونىمى – 103،8 پايىز، ياعني 2 مىڭ گەكتارعا ارتىپ، 670 مىڭ گەكتارعا جەتتى. ەگىن ورۋ وتكەن جىلدان 60 پايىزعا جوعارى (2018 جىلى – 39،5 مىڭ، 2019 جىلى – 64،7 مىڭ گەكتار).
وتكەن جىلى قۇرىلعان مەحوترياد 99 شاقىرىم كانالداردى تازالاپ (27 كانال، 5 سۋ قويماسى)، 6،6 مىڭ گەكتار سۋارمالى جەر قالپىنا كەلتىرىلدى، – دەدى وبلىس اكىمى اسقار يسابەك ۇلى.
سونداي-اق، بيىل تاۋلىگىنە 8 مىڭ توننا قانت قىزىلشاسىن وڭدەيتىن قانت زاۋىتىنىڭ قۇرىلىسى تامىز ايىندا باستالماق. جوبا شۋ اۋدانىنداعى ارنايى ەكونوميكالىق ايماقتا سالىنادى.
وبلىستا قۇرىلىس كولەمى 12،4 پايىزعا ءوسىپ، 226 مىڭ شارشى مەتر تۇرعىن ءۇي پايدالانۋعا بەرىلىپ، 6،2 پايىزعا ارتتى. ونىڭ ىشىندە 260 پاتەر كوپبالالى جانە از قامسىزداندىرىلعان وتباسىلارىنا بەرىلدى. بۇدان باسقا، دەمەۋشىلەر ەسەبىنەن 24 وتباسى تۇرعىن ۇيمەن قامتاماسىز ەتىلدى.
باسپاناعا مۇقتاج از قامتىلعان جانە كوپبالالى وتباسىلارىن ءتۇرعىن-ۇي كەزەگى جەتكەنگە دەيىن جاتاحانامەن قامتۋ ءۇشىن تاراز قالاسىنجدا ارنايى 8 جاتاقحانانىڭ قۇرىلىسى باستالدى.
جەكە تۇرعىن ءۇي قۇرىلىسىنا 2877 جەر تەلىمى بەرىلەدى. بۇدان بولەك، تەك ەلەكتر قۋاتىن تارتا وتىرىپ 17 القاپتا 3722 جەر تەلىمىن بەرۋ قاراستىرىلىپ جاتىر.
قۋانىش كەۋىلىمجاي
پىكىر قالدىرۋ