جامبىل وبلىسىندا رەسپۋبليكالىق ماڭىزى بار «مەركى-شۋ-بۋرىلبايتال» كولىك جولىنىڭ قۇرىلىسى جانە تاعى دا باسقا مەملەكەتتىك باعدارلامالار اياسىندا بىرنەشە ءىرى جوبالار جۇرگىزىلىپ جاتىر. اعىمداعى جىلدىڭ العاشقى جارتىجىلدىعى بويىنشا وبلىستا بيۋدجەت 99،6 پايىزعا يگەرىلگەن. بۇل تۋرالى وبلىس اكىمى  اسقار مىرزاحمەتوۆ وبلىستىق ءماسليحاتتىڭ كەزەكتەن تىس وتكەن سەسسياسىندا بەرگەن ەسەبىندە ايتتى.

«جالپى 600 شاقىرىم جەرگىلىكتى اۆتوجولدار مەن كوشەلەردى جوندەۋ جۇرگىزىلۋدە (16،2 شاقىرىم جاڭا جول سالىنىپ، 6،2 شاقىرىمى قايتا جاڭعىرتىلىپ، 30 شاقىرىمى كۇردەلى جانە 550 شاقىرىمى ورتا جوندەۋدەن وتەدى) وعان رەسپۋبليكالىق بيۋدجەتتەن – 8 ميلليارد، جەرگىلىكتى بيۋدجەتتەن 6،8 ميلليارد تەڭگە ءبولىندى. ناتيجەسىندە «قاناعاتتانارلىق جەرگىلىكتى اۆتوجولداردىڭ ۇلەسى» 85 پايىزعا جەتەدى (2018 جىلى – 80،1 پايىز)»، - دەدى وبلىس اكىمى.

سونىمەن قاتار، وبلىس اكىمى ايماقتاعى گازداندىرۋ جانە اۋىز سۋ ماسەلەسىنە دە توقتالىپ ءوتتى.

«گازعا قاتىستى ايتساق، 5 اۋداندا 81 ەلدى مەكەندى (101 مىڭ ادام) گازداندىرۋ جۇمىستارى باستالدى (جىل سوڭىنا 9 ەلدى مەكەندە جۇمىستار اياقتالادى). بۇدان بولەك،بيۋدجەتتىك باعدارلامالاردى توسپاي مەردىگەرمەن تىكەلەي كەلىسىم شارت ارقىلى گاز تارتۋ ماسەلەسىن قاراستىرىپ وتىرمىز.

بۇرىن ءبىر اۋلاعا شاققانداعى جۇمىستىڭ قۇنى 470 پەن 650 مىڭ تەڭگە ارالىعىندا بولاتىن. كوممۋنالدىك 2 مەكەمەگە – «جامبىل جىلۋ»، «تەمىر جول جىلۋعا» ارنايى ليسەنزيا الىپ بەرىپ، بۇل باعانى 300 مىڭ تەڭگەگە دەيىن ءتۇسىرىپ وتىرمىز. وسىنىڭ ناتيجەسىندە قوسىمشا 32 مىڭ حالىق گازعا قول جەتكىزەتىن بولادى.

ورتالىقتاندىرىلعان اۋىز سۋمەن قامتىلعان 199 ەلدى مەكەندە 130 مىڭ ادام سۋ قۇبىرى بولا تۇرا، سۋعا قوسىلماعانىن انىقتادىق. التى ايدىڭ قورتىندىسىمەن 34 مىڭ ادام قۇبىرعا قوسىلدى. جىل سوڭىنا دەيىن تاعى دا 30 مىڭ ادام سۋ جۇيەسىنە قوسىلاتىن بولادى. بۇل دا كوممۋنالدىق مەكەمەمەن اتقارىلىپ جاتقان جۇمىستىڭ ەسەبىنەن. بۇعان قوسا، بيۋدجەت بويىنشا 18 ەلدى مەكەنگە سۋ قۇبىرلارى جۇرگىزىلۋدە، ونىڭ 10 جوباسى ىسكە قوسىلادى، قامتۋ ۇلەسى 56 پايىزعا جەتەدى، – دەدى اسقار يسابەك ۇلى.

مىرزاحمەتوۆتىڭ ايتۋىنشا، وبلىس بيۋدجەتىنىڭ كىرىسى وتكەن جىلدان (2018 جىلى – 251،2 ميلليارد تەڭگە) 51،6 ميلليارد تەڭگەگە (20 پايىز) ارتىپ، بۇگىندە 302،8 ميلليارد تەڭگەنى قۇراعان. سونىمەن قاتار، ۇلتتىق قوردان الەۋمەتتىك سالاعا قوسىمشا 9،2 ميلليارد  تەڭگە ءبولىنىپ وتىر. جالپى وبلىستا جارتىجىلدىڭ قورىتىندىسى بويىنشا، بيۋدجەتتىك كىرىس 103،9 پايىزعا، مەنشىكتى كىرىس 119،5 پايىزعا (32 ميلليارد تەڭگە) ورىندالعان. بيۋدجەت 99،6 پايىزعا يگەرىلگەن.

قۋانىش كەۋىلىمجاي