قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتىگىنىڭ جامبىل وبلىسى بويىنشا دەپارتامەنتى مەن «جامبىل – ادالدىق الاڭى» جوبالىق كەڭسەسىنىڭ قىزمەتكەرلەرى ءوڭىر تۇرعىندارى اراسىندا سىبايلاس جەمقورلىققا قارسى نولدىك توزىمدىلىك قالىپتاستىرىپ، پاراساتتىلىققا باۋلۋ ماقساتىندا اۋداندارعا ءىسساپارعا شىعىپ، كەڭەستەر بەرىلىپ جاتىر دەپ جازادى Qamshy.kz اقپارات اگەنتتىگى. 

اتالعان ءىس-شارالار اياسىندا لەكتورلىق توپ 15 تامىز كۇنى جامبىل اۋدانىندا بولىپ، كەزدەسۋ وتكىزدى. وندا جامبىل وبلىستىق سىبايلاس جەمقورلىققا قارسى ءىس-قيمىل دەپارتامەنتى باسقارما باسشىسىنىڭ ۋاقىتشا مىندەتىن اتقارۋشى د.وماروۆ پەن «جامبىل – ادالدىق الاڭى» جوبالىق كەڭسەسىنىڭ جەتەكشىسى ق.مەكليسوۆ اۋداندىق پوليسيا ءبولىمى قىزمەتكەرلەرىمەن كەزدەسۋ ۇيىمداستىردى. جيىن بارىسىندا لەكتورلىق توپ مۇشەلەرى ءتارتىپ ساقشىلارىنا قىزمەتتىك فۋنكسيالارىن زاڭناماعا ساي ورىنداۋ، قىزمەتتىك اۆتوكولىكتى جۇمىستان تىس ۋاقىتتا پايدالانباۋ، جولدا رەيدتىك ءىس-شارالاردى ۇيىمداستىرۋ، پاراساتتىلىقتى، ادەپ نورمالارىن ساقتاۋ جونىندە مول ماعلۇماتتار بەرىپ، ءتۇسىندىرۋ جۇمىستارىن جۇرگىزدى. ال جيىننان سوڭ بارلىق قاتىسۋشىلار اۋداندىق پوليسيا بولىمىنەن اشىلعان فرونت ءوفيستىڭ جۇمىسىمەن تىنىستى.

سونىمەن بىرگە، قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتىگىنىڭ جامبىل وبلىسى بويىنشا دەپارتامەنتى مەن «جامبىل – ادالدىق الاڭى» جوبالىق كەڭسەسىنىڭ قىزمەتكەرلەرى جامبىلدىق دەنساۋلىق ساقتاۋ سالاسىنىڭ ماماندارىمەن كەزدەستى. باسقوسۋ بارىسىندا توپ مۇشەلەرى انىقتامالاردى زاڭسىز بەرمەۋ، اۋرۋحاناعا پورتال ارقىلى جاتقىزۋ جۇيەسىندە زاڭسىزدىقتارعا جول بەرمەۋ ماسەلەلەرىن كوتەردى.

ال، جامبىل اۋداندىق ءبىلىم ءبولىمىنىڭ قىزمەتكەرلەرىمەن وتكەن كەزدەسۋدە جاڭا وقۋ جىلىندا مەكتەپكە مۇعالىمدەردى قابىلداۋ مەن ساعات ءبولۋ كەزىندە سىبايلاس جەمقورلىق تاۋەكەلدەرىنە جول بەرمەۋ كەرەكتىگى، وقۋشىلاردى پاراساتتىلىققا باۋلي وتىرىپ، كەلەشەگى جارقىن، پاراساتتى قوعام قۇراتىنىمىز تۋرالى ايتىلدى.

جۇمىسپەن قامتۋ جانە الەۋمەتتىك باعدارلامالار ءبولىمىنىڭ قىزمەتكەرلەرىمەن وتكەن جيىندا ارنايى الەۋمەتتىك كومەكتىڭ ءتيىستى تۇلعالارعا ءتيۋىن قامتاماسىز ەتىپ، كوميسسيا قۇرامىن 4-5 ادامنان قۇرۋ كەرەكتىگىنە توقتالدى.

اۋدان اكتيۆىمەن وتكەن جيىندا قىزمەتكەرلەردىڭ ادەپ نورماسىن، پاراساتتىلىقتى ساقتاپ، جەمقورلىق تاۋەكەلدەرىنە جول بەرمەۋ كەرەكتىگى تۋرالى ايتىلدى. ۇسىنىستار تىڭدالىپ، جەمقورلىققا قارسى مادەنيەتتى قالىپتاستىرۋ جولدارى ءتۇسىندىرىلىپ، پاراساتتىلىق تۋرالى ايتىلدى.