تارازدا جامبىلدىق اقىنداردىڭ «اۆانگارد» شىعارماشىلىق كەشى ءوتتى. ەركىن ءارى ەرەكشە فورماتتا وتكەن پوەزيا دۋمانى جيىلعانداردىڭ كوڭىلىنەن شىقتى دەپ جازادى Qamshy.kz اقپارات اگەنتتىگى. 

ءمولدىر ولەڭدى جۇرەك كوزىنەن وتكىزگەن جاستار كوفەحانادا باس قوستى. اس ءىشىپ، اياق بوساتۋ ءۇشىن ەمەس، جىر وقىپ، جان سەرگىتۋ ءۇشىن جينالدى. ەركىن فورماتتاعى باسقوسۋدى وتكىزۋگە ەشقانداي باسقارما دا، باسقا اعا دا مۇرىندىق بولعان جوق. جۇرەك ءدۇرسىلى ولەڭ دەپ سوققان، ولەڭگە اڭسارى اۋعان جاستار وزدەرى ۇيىمداستىردى. ارايلى جاقسىلىق دەگەن شىناشاقتاي قىز بەن فايزۋللا ءتولتاي دەگەن جاس تالانتتىڭ جانىنا زامانداستارى، اعا-ىنىلەرى جيىلىپ، ساۋساقتىڭ بىرىكسە جۇدىرىق بولاتىنىن كورسەتتى. «Global Coffee» دەپ اتالاتىن كوفەحاناعا حالىقارالىق «الاش» ادەبي سىيلىعىنىڭ لاۋرەاتى، جازۋشى نەسىپبەك ءداۋتاي، وبلىس اكىمى باسپا ءسوز قىزمەتىنىڭ جەتەكشىسى نۇرادين راقاي باستاعان وزگە دە ازاماتتار كەلدى. جەرگىلىكتى باسىلىمداردا جۇرگەن جۋرناليستەر مەن پوەزياعا جانى ادال جانداردىڭ ءبارى دە باسقوسۋعا ارنايى ات باسىن بۇردى. كوفەحانانىڭ ءىشى دە ادەبي اتموسفەراعا نەگىزدەلىپتى. كونە كىتاپتار، ءتۇرلى بۇيىمدار ادەبيەت الەمىنە جەتەلەي تۇسەدى.

ادەبي كەشتىڭ كىرىسپەسىندە ءسوز سويلەگەن جازۋشى نەسىپبەك ءداۋتاي جاستاردىڭ بۇل قادامىنا قۇت تىلەپ، تالانتتى اقىندار شوعىرلانعان ءبىزدىڭ وڭىردە مۇنداي كەشتى وتكىزىپ وتىرعان ازاماتتارعا ريزاشىلىعىن جەتكىزدى. بۇدان سوڭ وبلىس اكىمى باسپا ءسوز قىزمەتىنىڭ جەتەكشىسى نۇرادين راقاي ءسوز الىپ، سوزدەن ىسكە كوشكەن اقىنداردىڭ بۇل قادامى كوڭىل قۋانتاتىنىن تىلىنە تيەك ەتتى.

ەسەنعالي راۋشانوۆتىڭ «بولماڭىز، تەگى، ءشۇبالى» اتتى ولەڭىندە «اقىندار ايحاي جىر وقىپ، ارۋ قىز كەلىپ گۇل قاداپ...» دەگەن جولدار بار. بۇل كۇنى سول كورىنىس كوز الدىمىزعا كەلگەندەي بولدى. تارازداعى تارتىمدى كەشكە ارۋ الماتىدان حالىقارالىق «شابىت» فەستيۆالىنىڭ جەڭىمپازى، تالانتتى اقىن باتىرحان سارسەنحان ارنايى كەلىپ، شاشىن سىلكىپ تۇرىپ جىرىن وقىدى. جاس اقىندار نۇرجان ءقادىرالى، نۇربولات جولداسبەك، ارايلى جاقسىلىق، ءالىمجان شوڭگەرباي، فايزۋللا ءتولتاي، نۇربولات ساتىمقۇل، دانيار ءالىمقۇل باستاعان وزگە دە قىز-جىگىتتەر جاڭا ولەڭدەرىمەن جۇرەكتەردەن جول تاپتى. «جارايسىڭدار!» دەستىك. ارىپتەسىمىز، وبلىستىق «اق جول» گازەتى باس رەداكتورىنىڭ ورىنباسارىنىڭ مىندەتىن اتقارۋشى اسحات رايقۇل بەلگىلى اقىن، مەملەكەتتىك «دارىن» جاستار سىيلىعىنىڭ لاۋرەاتى ەرلان ءجۇنىستىڭ ولەڭىن وقىپ بەردى. قازاقستان جازۋشىلار وداعى وبلىستىق فيليالىنىڭ ديرەكتورى حاميت ەسامان دا ەستى جىرلارىمەن ءبولىستى. وبلىستىق «اراي» جاستار گازەتىنىڭ ءتىلشىسى مۇراتحان ءالىمحان باستاعان وزگە دە جاستار گيتارامەن جانە دومبىرامەن ءان شىرقاپ، ادەبي كەشتى مادەنيلەندىرە ءتۇستى.

ادەبي اتموسفەرا ورىن العان كەشكە وبلىسىمىزعا ەسىمى بەلگىلى جاستاردىڭ ءبىرازى جينالدى. پۋشكين «پوەزيا – اپەندەلەۋ بولۋى كەرەك»،-دەپتى. ولاي بولۋى دا زاڭدىلىق شىعار. الايدا ءبىز جاستاردىڭ بويىنان اپەندىلىكتەن گورى زياتكەرلىكتى بايقاي تۇستىك. جينالعان جاستاردىڭ كەيبىرىنىڭ جانارىنان جاسىرىن رومانتيكانى اڭعاردىق. پوەزيانىڭ قۇدىرەتى سول – ايسبەرگكە اينالعان جۇرەكتەردى جىبىتەتىندىگى. اسىرەسە، جاستاردىڭ جانارى ەشتەڭەنى جاسىرا المايدى عوي. جۇرەكتەردىڭ دۇرسىلىندە سەزىمنىڭ ءلۇپىلى قىلاڭ بەرەتىنى سودان دا بولار... بۇل ارينە، ولەڭسۇيەر قاۋىمقا قاتىستى. ايتپەسە اقىندارىڭىز ولەڭىمەن اۋرە بولىپ ءجۇردى بۇل كۇنى.

جاستاردىڭ اعالاردى اعالاماي، بايلاردى جاعالاماي وتكىزگەن بۇل باسقوسۋى كوپشىلىكتىڭ كوڭىلىنەن شىققانىنا ءشۇبامىز جوق. شىعىستىڭ شايىرلارى تامسانا جىرلاعان تارازدا وسىنداي باسقوسۋلاردىڭ ءوتىپ تۇرعانى ءلازىم. جانارىندا جالىن اتقان جاستار جاڭاشىل ىسپەن تالايلارعا ۇلگى كورسەتتى. ەندى باسقارماداعىلار مەن باسقا جاقتاعىلار ويلانسا، قۇپ. ىزدەنىستىڭ ىزىنە تۇسسە، قيىن ەشتەڭە جوق ەكەنىن قۇلاقتارى كەرەڭ، كوزدەرى سوقىر بولماسا، كورىپ وتىر عوي.