جامبىل وبلىسىندا «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا كوپبالالى وتباسىلارعا قايتارىمسىز گرانت بەرۋ ماسەلەسى قولعا الىنۋدا دەپ جازادى Qamshy.kz اقپارات اگەنتتىگى. 

بۇل گرانت تەك جاڭا بيزنەس يدەيالاردى ىسكە اسىراتىندارعا بەرىلەدى. از قامتىلعان، كوپبالالى وتباسىلار جاڭا كاسىپكەرلىكتى اشۋعا نيەتى بولسا، جوباسىن ۇسىنىپ، ىسكەرلىكتىڭ قىر-سىرىن مەڭگەرەدى. سودان سوڭ 505 مىڭ تەڭگە قايتارىمسىز گرانتتى يەلەنىپ، نيەتتەنگەن كاسىبىن اشىپ، وتباسىلىق بيزنەسىن باستاۋعا مۇمكىندىگى بار.

ەگەر 4 نەمەسە ودان دا كوپ بالالى، از قامتىلعان وتباسى بولسا، ءبىزدىڭ باسقارماعا كەلىپ، ءتيىستى قۇجاتتاردى تاپسىرادى. بۇل گرانت تەك بيزنەس يدەيانى جۇزەگە اسىرۋ ءۇشىن بولعاندىقتان، جوبا ۇسىنۋ مىندەتتى. سودان سوڭ «باستاۋ بيزنەس» جوباسى بويىنشا 1 ايعا دەيىنگى كاسىپكەرلىك نەگىزدەرىن وقىتۋ كۋرسىندا وقىپ، 16759 تەڭگە مولشەرىندە ستيپەنديامەن دە قامتىلادى. بۇعان 3 ايعا دەيىن قىسقا مەرزىمدىك وقۋدى اياقتاعان ازاماتتار جانە قونىس اۋدارۋشىلار، ورالماندار قاتىسا الادى.

وبلىس اۋماعىنداعى قالالىق جانە بارلىق اۋداندىق حالىقتى جۇمىسپەن قامتۋ ورتالىقتارىنىڭ سۇرانىستارىنا سايكەس بيىلعى جىلعا 940 گرانتقا جالپى 474،6 ميلليون تەڭگە ءبولىنىپتى.

وسى گرانتتى الىپ، جاڭا ءىسىن باستاۋعا نيەتتى ازاماتتار حالىقتى جۇمىسپەن قامتۋ ورتالىعىنا كەلىپ، ءوتىنىش جازادى. جەكە باستى كۋالاندىراتىن قۇجات، سالىق كوميتەتىنەن زاڭدى تۇلعانى مەملەكەتتىك تىركەۋ تۋرالى انىقتاما نەمەسە دارا كاسىپكەردى مەملەكەتتىك تىركەۋ تۋرالى حابارلامانىڭ كوشىرمەسىن، ازىرلەگەن بيزنەس-جوسپارىن، «باستاۋ بيزنەس» جوباسىمەن وقۋدان وتكەن سەرتيفيكات نەمەسە قىسقا مەرزىمدىك وقۋ تۋرالى كۋالىگىن، مەكەنجاي نەمەسە اۋىل اكىمدىگىنەن انىقتاما وتكىزەدى. ال ورالماندار ورالمان كۋالىگىن اكەلۋى ءتيىس.

ايتا كەتەيىك، بۇل گرانت تۇتىنۋشىلىق ماقساتتارعا، نەسيە قارىزدارىن وتەۋگە، جىلجىمايتىن تۇرعىن ءۇي ساتىپ الۋعا جانە سالۋعا، جەر ۋچاسكەلەرىن ساتىپ الۋعا، اكسيزدەلەتىن ونىمدەردىڭ وندىرىسىنە، جالداۋ اقىسىنا بەرىلمەيدى.

حالىق ناقىلىندا «اش ادامعا بالىق بەرمە، قارماق بەر» دەگەن ناقىل بار. ياعني، دايىن استى ەمەس، سونى تاباتىن، ەڭبەككە جەتەلەيتىن كاسىپكە باعىتتاۋدى مەڭزەيدى. ءدال سول سەكىلدى بۇل گرانت تا تۇراقتى تابىس تۇسىرەتىن كاسىپ اشىپ، ەڭبەكتەنۋگە جول اشپاق. ەگەر وتباسىلىق جاعدايىڭىز جوعارىدا ايتىلعان تالاپتارعا ساي كەلسە، مۇمكىندىكتى جىبەرىپ الماي، قايتارىمسىز گرانتتى الىپ، ءىس باستاۋعا قامدانىڭىز.