جاستار ساياساتىن وڭتايلاندىرۋ باعىتىندا بۇگىندە از جۇمىس جاسالىپ جاتقان جوق. اسىرەسە جاستار جۇمىسسىزدىعى، ولاردىڭ بىلىكتىلىگىن ارتتىرۋ مەن جاس كاسىپكەرلەردى قولداۋعا ءبولىنىپ جاتقان قاراجات تا، قولداۋ دا از ەمەس. دەسە دە، راس بۇگىندە جاستاردىڭ جۇمىسقا ورنالاسۋى ۇلكەن ماسەلە. سەبەبى، تاجىريبەنىڭ بولماۋى، ەڭبەك ءوتىلىنىڭ جوقتىعى دا جۇمىسقا ورنالاسۋعا كەدەرگى كەلتىرەدى. الايدا قازىرگى تاڭدا جاستارعا مەملەكەت تاراپىنان ءتيىستى جاعدايلار جاسالىپ، ولاردىڭ جۇمىسقا ورنالاسۋىنا مۇمكىندىك تۋىپ وتىر دەپ جازادى Qamshy.kz اقپارات اگەنتتىگى. 

جامبىل وبلىسى مويىنقۇم اۋدانى اكىمدىگىنىڭ جۇمىسپەن قامتۋ جانە الەۋمەتتىك باعدارلامالار ءبولىمى مەن حالىقتى جۇمىسپەن قامتۋ ورتالىعىنىڭ ۇيىمداستىرۋىمەن «Nur Otan» پارتياسى اۋداندىق فيليالىنىڭ ءماجىلىس زالىندا قىسقا مەرزىمدىك وقۋ كۋرسىن بىتىرگەن 95 ازاماتقا سەرتيفيكات تاپسىرۋ جانە بوس جۇمىس ورىندارىن ۇسىنۋشى جۇمىس بەرۋشىلەر مەن جۇمىسسىزدار ەسەبىندە تىركەۋدە تۇرعان ازاماتتاردىڭ جۇمىسقا ورنالاسۋىنا قول ۇشىن بەرۋ ماقساتىندا بوس جۇمىس ورىندارىنىڭ جارمەڭكەسى وتكىزىلدى. وعان №8 مويىنقۇم كوللەدجىنىڭ ديرەكتورى ق.بەيىمبەتوۆ، مويىنقۇم اپب جپق اعا ينسپەكتورى، پوليسيا مايورى ت.كۋداسبەكوۆ، اۋداندىق پروباسيا قىزمەتىنىڭ اعا ينسپەكتورى ن.كايپوۆ، جۇمىسپەن قامتۋ ورتالىعىنىڭ ماماندارى قاتىستى. جيىندا №8 مويىنقۇم كوللەدجىنىڭ ديرەكتورى ق.بەيىمبەتوۆ 3 ايلىق قىسقا مەرزىمدىك وقۋ كۋرسىن اياقتاعان ازاماتتارعا ساتتىلىك تىلەپ، سەرتيفيكاتتارىن تاپسىردى. اۋداندىق حالىقتى جۇمىسپەن قامتۋ ورتالىعىنىڭ ماماندارى ماقپال قۇلدىبايەۆا، سەرىك نامەتحان كەلگەن جۇمىسسىز ازاماتتارعا مەملەكەتتىك باعدارلامالار: اتاۋلى الەۋمەتتىك كومەك، جاڭا بيزنەس يدەيالاردى ىسكە اسىرۋ ءۇشىن جاستارعا جانە كوپ بالالى، از قامتىلعان وتباسىلارعا ارنالعان قايتارىمسىز گرانت تۋرالى جانە بۇگىنگى كۇنگە دەيىنگى كەلىپ تۇسكەن بوس جۇمىس ورىندارىمەن تانىستىرىپ ءوتتى. وعان 112 جۇمىسسىز ازامات قاتىستى، ونىڭ ىشىندە 29 ازامات تۇراقتى جۇمىسقا، 14 جۇمىسسىز ازامات قوعامدىق، 15 جۇمىسسىز ازامات جاستار ىس-تاجىريبەسىنە جولداما الدى. سونىڭ ىشىندە، قىسقا مەرزىمدى وقۋدى اياقتاعان 22 ازامات تۇراقتى جۇمىسقا جولداندى.

ارينە، كوش جۇرە تۇزەلەتىنى بەلگىلى. سوندىقتان بۇل شارالارمەن جاستار جۇمىسسىزدىعىن ءبىرجولاتا جۇگەندەي الامىز دەي المايمىز. الايدا تەڭىزگە تۇسكەن ءبىر تامشىداي بولسا دا بۇل ەل ەرتەڭى ءۇشىن جاسالىپ وتىرعان يگى قادام.