جامبىل وبلىسىنىڭ كارتاسىندا جالپاعىنان جاتقان مويىنقۇم اۋدانى قاي كەزدە دە ءوزىنىڭ وندىرىستەگى ورىستەۋىمەن جانە اگرو سالاداعى الشاڭدىعىمەن تانىلعان ولكە. وعان ءبىر عانا دالەل كەڭەستىك كەزەڭدە ءدال وسى اۋىلدان ەكى دۇركىن سوسياليستىك ەڭبەك ەرى جازىلبەك قۋانىشبايەۆتاي نار تۇلعالار شىقتى. ەندى مىنە ەلدى مەكەن وركەنيەت كوشىنەن قالماي رۋحاني جاڭعىرۋعا دا ولشەۋسىز ۇلەس قوسۋدا دەپ جازادى Qamshy.kz اقپارات اگەنتتىگى. 

جالپى مويىنقۇم ولكەسىندەگى ۇلانبەل اۋىلى اۋدان ورتالىعىننان شالعايدا ورنالاسقان ەلدى-مەكەن. تىكەلەي مال شارۋاشىلىعىمەن اينالىساتىن بۇل اۋىلدا مىڭنان اسا حالىق تۇرادى. ىنتىماعى جاراسقان اۋىل تۇرعىندارى قاندايدا ءبىر جاعىمدى ءىس بولسا بىرلەسە اتقارادى. ولار وسىدان تۋرا 70 كۇن بۇرىن اۋىل ورتالىعىنان 50 ورىندىق مەشىت سوعۋدى قولعا العان ەدى. اۋىل ارداگەرلەر كەڭەسىنىڭ ءتوراعاسى، ۇيىمداستىرۋشىلىق قابىلەتى زور، ىلكىمدى ازامات جولشىبەك ەلۋبايەۆتىڭ باسشىلىعىمەن اۋىل جاستارى جازدىڭ اپتاپ ىستىعىنا قاراماستان ەكى ايدان اسا ۋاقىت ۋاقىتپەن ساناسپاي جۇمىس جاسادى. مەشىتتىڭ قۇرىلىس ماتەريالدارىن الۋعا اۋىل تۇرعىندارى عانا ەمەس، وسى اۋىلدا ءتۋىپ-وسىپ، بۇگىندە تاراز، الماتى، شىمكەنت، باسقا دا قالالاردا تۇرىپ جاتقان ازاماتتار وزدەرىنىڭ ۇلەسىن قوستى. ال اۋىل جاستارى قۇرىلىس جۇمىستارىن وزدەرى جۇرگىزىپ، ەلدىڭ العىسىنا بولەندى.

اۋىلدىڭ ورتالىق كوشەسىنە سالىنعان مەشىت ءۇيى ءوزىنىڭ اسەمدىگىمەن ەرەكشە كوز تارتادى. ەرتەمەن الماتى قالاسىنان كەلگەن قوناقتار مەشىت ەدەنىنە اكەلگەن قالى كىلەمدەرىن توسەپ، جارىق شامدارىن (ليۋسترا) ءىلىپ جاتتى.

وتكەن اپتادا اتالعان مەشىتتىڭ اشىلۋ سالتاناتىنا اۋىل حالقى كوپ جينالدى. سىرتتان كەلگەن قوناقتاردا از بولمادى. وندا الدىمەن اۋىلدىق وكرۋگتىڭ اكىمى قانات بەلگىشوۆ ءسوز الىپ، اۋىل حالقىنىڭ ۇيىمشىلدىعى ارقاسىندا سوعىلىپ، پايدالانۋعا بەرىلىپ وتىرعان مەشىتتىڭ اشىلۋىمەن قۇتتىقتادى. سونداي-اق اتالعان مەشىت قۇرىلىسىن جۇرگىزۋگە اتسالىسقان اۋىل جاستارىنا، وعان ۇلەس قوسقان اۋىل ازاماتتارىنا العىس ايتتى. بۇدان كەيىن اۋداندىق ءماسليحاتتىڭ حاتشىسى شاھيكەرىم يسابەكوۆ، اۋداندىق ارداگەرلەر كەڭەسىنىڭ ءتوراعاسى جامبىل قالىبايەۆ، اۋداندىق مەشىتتىڭ يمامى رىسباي ەسپەنبەتوۆ، الماتى قالاسىنان كەلگەن جاقسىكەلدى ۋمەنوۆ، اۋىل تۇرعىندارى تىلەگەن توقسانبايەۆ، امانكۇل بالابەكوۆا، تۇيەباي سەرىكبايەۆ، اۋىل يمامى سەيتەن قارناقبايەۆتار ءسوز سويلەپ، جىلى لەبىزدەرىن ءبىلدىردى. اۋداندىق مەشىتتىڭ يمامى ر.ەسپەنبەتوۆ جاڭا اشىلعان مەشىتكە قۇران كىتابىن سىيلادى. ال ج.ەلۋبايەۆ مەشىتتىڭ سوعىلۋىنا اتسالىسقان ازاماتتارعا العىس ايتىپ، ەندى مەشىتكە كەلۋشىلەردىڭ كوپ بولۋىن تىلەدى.

مەشىتتىڭ اشىلۋىنا ارنالعان لەنتا قيىلعان بەتتە شاشۋ شاشىلدى. اۋىل تۇرعىندارى مەن قوناقتار مەشىت ءىشىن ارالاپ كورىپ، وعان ريزا بولىپ جاتتى.

مەشىتتىڭ اشىلۋىنا بايلانىستى قۇداي تاماق بەرىلىپ، وعان قاتىسقان ازاماتتار وقىلعان قۇرانعا قول جايدى. اۋىل تۇرعىندارى قۇداي تاماقتان سوڭ جۇما نامازىن وقۋ ءۇشىن جاڭا اشىلعان مەشىتكە قاراي بەت الدى.

وسىلايشا ۇلانبەلدىكتەر رۋحاني جاڭعىرىپ عانا قويماي، يماني باعىتتا دا كوپكە ۇلگى بولارلىق تىرلىك جاسادى.