ەلىمىزدە سوڭعى جىلدارى اۋىل شارۋاشىلىعى سالاسىنا ايىرىقشا كوڭىل ءبولىنىپ كەلەدى. سۋارمالى جەرلەردى ءتيىمدى پايدالانۋ، مول ءونىم الۋ ءۇشىن عىلىم مەن تەحنيكا جەتىستىكتەرىن پايدالانۋ ارقىلى ساپالى ءونىم ءوندىرۋ كەرەكتىگى بۇگىنگى كۇننىڭ باستى تالابىنا اينالدى. ول ءۇشىن ارينە وندىرىلەتىن ءونىمنىڭ كولەمى مەن ساپاسىن ارتتىرۋ دا كەرەك بولادى. وسى اگروسالانى قايتا دامىتۋ ماقساتىندا جامبىل وبلىسى مويىنقۇم اۋدانىنا مادەن مۇسايەۆ اكىم بولىپ كەلگەلى كوپ تىرلىكتىڭ بويىنا قايتا قان جۇگىردى دەپ جازادى Qamshy.kz اقپارات اگەنتتىگى. 

ەڭ الدىمەن، ەرتە كۇزدەن كانالداردى تازالاۋدى، تەحنيكالار جەتكىزىپ، جەر جىرتىلىپ جاتقاندا - اق تىڭايتقىش، ساپالى تۇقىم ماسەلەسىن دە شەشىپ، باسقا دا ارام شوپتەرگە قارسى پرەپاراتتار دايىنداپ، ونىمەن قوسا جۇگەرى ءونىمىن وتكىزەتىن ورىندارمەن كەلىسسوزدەر دە الدىن -الا جۇرگىزىلىپ قويعان بولاتىن.

اۋدان اكىمى م.مۇسايەۆ اۋدان اۋماعىنداعى جۇگەرى ەگىپ، ءوسىرىپ جاتقان بينازار، بىرلىك، كەڭەس، قىزىلتال، قىزىلوتاۋ اۋىلدىق وكرۋگتەرىندە بولىپ، جۇگەرى القاپتارىن ارنايى ارالاپ، ونىڭ جاي-كۇيىمەن تانىستى.

الدىمەن ات باسىن بينازار اۋىلدىق وكرۋگىندە جۇگەرى داقىلىن العاشقىلاردىڭ ءبىرى بولىپ ەككەن ديقان قامبار اتايەۆتىڭ 10 گەكتار جۇگەرى القابىندا بولىپ، جۇمىس قارقىنىن كوزبەن كوردى.

بۇدان سوڭ ايدارلى اۋىلىنداعى «اق وتاۋ» شارۋا قوجالىعىنىڭ 50 گەكتار جۇگەرى القابىمەن تانىسىپ، سوبىقتارىن سارالاپ كوردى. سودان سوڭ بىرلىك اۋىلىندا بولىپ اۋداندىق بيۋدجەت ەسەبىنەن جاقىندا عانا ساتىپ الىنعان جۇگەرى وراتىن «حەرسونەس -9» ماركالى 3 كومبايننىڭ جاي-كۇيىمەن تانىستى. بىرلىك اۋىلى ماڭىنداعى ەركەبۇلان دۋبايەۆ باسقاراتىن «قۇرداستار» اگرونىڭ جۇگەرىسى ناشار شىققانىن كورىپ، ونىڭ سەبەپتەرى سۋشىنىڭ جوقتىعىنان بولعانىن ءبىلدى. ال تاراز يننوۆاسيالىق-گۋمانيتارلىق ۋنيۆەرسيتەتىنىڭ 120 گا، «بايباراق» اگرونىڭ 25 گەكتارعا جۋىق جۇگەرىلەرى جايقالىپ، بىتىك شىققان ەكەن. وسى جەردە اۋدان باسشىسى مادەن توقتارباي ۇلى ديقان المابەك ءابدىحالىقوۆتىڭ جۇگەرى القابىندا، جۇگەرىنى سۋعارىپ جۇرگەن بالاسىمەن سويلەسىپ، جاعدايىن ءبىلدى. ولار جۇگەرىنىڭ ءبىرىنشى سۋعارۋىنا 5 ازاماتپەن كەلىسىم جاساسقان ەكەن، ءقازىر سوڭعى سۋىن سالىپ جاتقانىن، جۇگەرىنىڭ ءار گەكتارىنان 7 توننادان جۇگەرى الاتىنى ايتىلدى.

كوكجەلەك اۋىلىنىڭ شىعىس جاعىنداعى 200 گەكتار جۇگەرى القابىندا دا بولدى. جۇگەرىنىڭ شىعىسى بۇل جەردە دە ويدىم-ويدىم بولىپ شىققان ەكەن. ونىڭ سەبەبى سۋشىنىڭ جوقتىعى، ءبىراق كانالداردا سۋ تولى اعىپ جاتىر. ال كۇشامان اۋىلىنداعى 129 گەكتار جەرگە جۇگەرى ەككەن «نۇر تەمىر»، «كۇشامان» كووپەراتيۆتەرىنىڭ جانە تەمىرحان اقبالايەۆتىڭ جۇگەرىلەرى

بۇگىندە بيىك شىعىپ، جايقالىپ تۇر. سونىمەن قاتار اۋىلدىق وكرۋگتە 72 گەكتار جەرگە تارى ەگىلىپتى.

- بيىلعى جىلى تارى داقىلىنىڭ شىعىمى وتە جوعارى. وسىعان قاراعاندا بىلتىرعى جىلدارى گەكتارىنا 30 قاپتان ءونىم الساق، ال بيىل گەكتارىنا 60 قاپ تارىدان الامىز،- دەيدى وكرۋگ اكىمى كەڭەسبەي سارباسوۆ نىق سەنىممەن.

ساپار بارىسىندا اۋدان باسشىسى ديقاندارمەن بىرگە مەحانيزاتور، سۋشىلارمەن دە اڭگىمەلەستى. وندا شىققان ءونىمدى دۇرىس كۇتىپ-باپتاپ، ودان جوعارى ءونىم الۋ جاعى باسا ايتىلدى.