مەملەكەتىمىزدىڭ ۇستانعان باسىم باعىتتارىنىڭ ءبىرى – ۇلت پەن ۇلىستار دوستىعى. بۇل تۇرعىدا ەلباسى نۇرسۇلتان ءابىش ۇلىنىڭ بىرلىك پەن تاتۋلىق باعىتىندا سىڭىرگەن ەڭبەگى وراسان. سونداي-اق ۇلت كوشباسشىسى ەلىمىزدىڭ ەڭ باستى قۇندىلىعى – تەڭدىگى مەن كەڭدىگى ەكەنىن ءاربىر جولداۋىندا ايتىپ كەلدى. وسىعان وراي جامبىل وبلىسى مويىنقۇم اۋدانىندا ۇلىستار ىنتىماعى ۇلىقتالعان باسقوسۋ ءوتتى دەپ جازادى Qamshy.kz اقپارات اگەنتتىگى. 

اۋداندىق ورتالىق كىتاپحانانىڭ «سoworking center»ورتالىعىندا جامبىل وبلىسى قازاقستان حالقى اسسامبلەياسى مەن جامبىل وبلىسى اكىمى اپپاراتى «قوعامدىق كەلىسىم» كوممۋنالدىق مەملەكەتتىك مەكەمەسى باستاماسىمەن «زاماناۋي مەديا مادەنيەت كەڭىستىگىندەگى ەتنيكالىق يميدج» تاقىرىبىندا پىكىرتالاس الاڭى ءوتتى.

پىكىرتالاسقا اۋداندىق مادەنيەت ءۇيى، «رۋحاني جاڭعىرۋ» جوبالىق ءوفيستىڭ وفيس مەنەدجەرلەرى، اۋداندىق كىتاپحانا قىزمەتكەرلەرى جانە جاستارى قاتىستى.

باسقوسۋدىڭ ماقساتى –ءتۇرلى ەتنوستار داستۇرلەرىنىڭ ەرەكشەلىكتەرىن جانە ازاماتتىق قوعامنىڭ نەگىزگى ينستيتۋتتارىنىڭ، اسىرەسە قازاقستان حالقى اسسامبلەياسىنىڭ بىرىكتىرۋشى ميسسياسىنىڭ ماڭىزدىلىعىن تالقىلاۋ.

جامبىل وبلىسى اكىمى اپپاراتى «قوعامدىق كەلىسىم» كوممۋنالدىق مەملەكەتتىك مەكەمەسىنىڭ باس ساراپشىسى البينا تاپايەۆا اشىپ، ءتۇرلى ەتنوستار داستۇرلەرىنىڭ ەرەكشەلىكتەرىن جانە ازاماتتىق قوعامنىڭ نەگىزگى ينستيتۋتتارىنىڭ، اسىرەسە قازاقستان حالقى اسسامبلەياسىنىڭ بىرىكتىرۋشى ميسسياسىنىڭ ماڭىزدىلىعىنا توقتالدى. سودان سوڭ «ەلباسى ن.ءا.نازاربايەۆ باعدارلامالىق ماقالاسىندا: «ۇلتتىق جاڭعىرۋ دەگەن ۇعىمنىڭ ءوزى ۇلتتىق سانانىڭ كەمەلدەنۋىن بىلدىرەدى.ونىڭ ەكى قىرى بار.بىرىنشىدەن، ۇلتتىق سانا-سەزىمنىڭ كوكجيەگىن كەڭەيتۋ.ەكىنشىدەن، ۇلتتىق بولمىستىڭ وزەگىن ساقتاي وتىرىپ، ونىڭ ءبىرقاتار سيپاتتارىن وزگەرتۋ، ۇلتتىق سالت-داستۇرلەرىمىز، ءتىلىمىز بەن مۋزىكامىز، ادەبيەتىمىز، جورالعىلارىمىز، ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس.مەن قازاقستاندىقتاردىڭ ەشقاشان بۇلجىمايتىن ەكى ەرەجەنى ءتۇسىنىپ، بايىبىنا بارعانىن قالايمىن.

ءبىرىنشىسى – ۇلتتىق كود، ۇلتتىق مادەنيەت ساقتالماسا، ەشقانداي جاڭعىرۋ بولمايدى.

ەكىنشىسى – العا باسۋ ءۇشىن ۇلتتىڭ دامۋىنا كەدەرگى بولاتىن وتكەننىڭ كەرتارتپا تۇستارىنان باس تارتۋ كەرەك» - دەي كەلە،قازاقستان ەتنوستارىنىڭ تاريحى، مادەنيەتى، سالت-داستۇرلەرى تۋرالى جالپى ءبىلىم دەڭگەيىن كوتەرۋ كەرەكتىگىن اتاپ ءوتتى. جامبىل وبلىسىنداعى ەتنوستار مادەنيەتىنىڭ الۋان تۇرلىلىگىنە ءتوزىمدى قارىم-قاتىناس داعدىلارىمەن وتانشىلدىق، ازاماتتىق سانا-سەزىمنىڭ جانە قازاقستاندىق بىرەگەيلىكتىڭ وسۋىنە ىقپال ەتۋىمىز كەرەك دەگەن دە ويىن ءبىلدىردى.

سوڭىندا جيىنعا قاتىسۋشىلار ءوزارا پىكىر الماسىپ، ساۋالناما تولتىرىلدى.