ەل ەكونوميكاسىنىڭ نەگىزگى درايۆەرى اگرو سالا ەكەنى بەلگىلى. ونى ەلباسى دا، پرەزيدەنت تە باسا ايتىپ، ءاربىر سوزىندە اۋىل شارۋاشىلىعىن دامىتۋعا باسىمدىق بەرىپ كەلەدى. ال ەگىستەن مول ءونىم الۋ ءۇشىن الاجازداي دالا توسىندە تىرلىك ەتۋ كەرەك بولسا، ءتورت تۇلىكتىڭ باسىن كوبەيتۋ ءۇشىن كۇتىم مەن جەمى دايىندالۋى قاجەت. وسى ورايدا جامبىلدىق قوجالىقتاردىڭ قىسقا قامدانۋى قۋانارلىقتاي دەپ جازادى Qamshy.kz اقپارات اگەنتتىگى. 

ماسەلەن مويىنقۇم اۋدانىندا ءشوپ دايىنداۋ ناۋقانى باستالعالى ءبىر اي كولەمىندە ۋاقىت ءوتىپ، شارۋالار شابىندىق باسىندا ۋاقىتپەن ساناسپاي قىزۋ ەڭبەك ەتۋدە. سولاردىڭ ءبىرى - 2003 جىلى قۇرىلعان «ايقىن» شارۋا قوجالىعىنىڭ شابىندىققا شالعى ءتۇسىرىپ، قىستىق مال ازىعىن جيناۋعا بىلەك سىبانا كىرىسكەندەرىنە ءبىر ايدان اسا ۋاقىت ءوتتى. اق باس جانە انگۋس قارا بۇقالارىن سىرتتان اكەلىپ، اسىلداندىرۋ باعىتىندا سيىردىڭ ەتتى تۇقىمىن وسىرۋمەن اينالىسىپ جاتقان قوجالىق يەلىگىندە بۇگىندە 720 قوي، 313 سيىر، 150-گە تارتا جىلقى مالى بار.

«مال ازىعى – جان ازىعى» ەكەنىن ەتەنە جاقسى بىلەتىن قوجالىق جەتەكشىسى ايدار كەمەلقۇلوۆتىڭ قوجالىعىندا 560 گەكتار شابىندىق جانە 440 گەكتار جايىلىمدىق جەرلەر بار. قوجالىق بۇگىنگى تاڭعا 4 مىڭعا جۋىق وراما (رۋلون) ءشوپ دايىنداپ ۇلگەرگەن. مۇنداعى ءبىر وراما ءشوپ 400-450 كيلوگرامم سالماق تارتادى. قوجالىق قىسقا قاجەتتى مال ازىعىن قىستاۋلارعا تولىقتاي جيناپ، قالعان شوپتەردى اۋدان تۇرعىندارىنا ءبىر وراما ءشوپتى 1800-2000 تەڭگە ارالىعىنداعى باعامەن وتكەرۋدە. ناۋقانعا 8 ادامنان قۇرالعان 5 تراكتور، ءشوپ شاباتىن، جينايتىن، وراماعا تۇسىرەتىن تەحنيكالار تۇگەلدەي جۇمىلدىرىلعان. قوجالىق جەتكشىسىنىڭ ايتۋىنشا، شارۋالار ءبىر كۇندە 100 وراما ءشوپ دايىندايدى. ونىڭ ۇستىنە شابىندىقتاردا ءشوپ بيىل بىتىك شىعىپتى. تەك ءبىر وكىنىشتىسى ناۋقان بارىسىندا ورىن العان ءتىلسىز جاۋ – ءورت ءىستىڭ ىلگەرى جۇرۋىنە ءبىر اپتاداي ۋاقىت ءوز كەدەرگىسىن كەلتىرگەن.

قازىرگى تاڭدا مال ازىعىن اۋدان ورتالىعىنا جانە قىلىشباي اۋىلىنا جيناپ جاتقان قوجالىق جەتەكشىسى، بىلتىر 5،5 مىڭ توننا ءشوپ جيناسا، بيىل سول مەجەنى ءشوپ ناۋقانى اياقالعانشا اسىرا ورىنداماق. ايداردىڭ ءوز جۇمىسشىلارىنا دەگەن اتىمتاي جومارتتىعى دا بار ەكەنىن ايتا كەتكەن ءجون. ول شارۋاسىن شالقىتىپ، جۇمىسىن جانداندىرىپ وتىرعان جۇمىسشىلارىنا مال ازىعى ءشوپتى تەگىن بەرىپ وتىر. ناۋقان كەزىندە جۇمىسشىلاردىڭ ايلىعى دا قوماقتى ەكەنىن ايتادى ول. سونىمەن قاتار قوجالىق جەتەكشىسى ايدار جيەنقۇل ۇلى بيىل ايدارلىلىق «بەكجان» شارۋا قوجالىعىنىڭ جەتەكشىسى نيەتبەك الدابەرگەنوۆپەن بىرلەسە وتىرىپ، 30 گەكتار جەرگە جۇگەرى ەگىپتى. بۇعان دەيىن ارپا-بيدايدى مالعا ايىرباستاپ كەلگەن قوجالىق جەتەكشىسى بيىل ەندى وزدەرى ەككەن جۇگەرى ونىمدەرىن مال ازىعىنا اينالدىرماق.

اۋدان بويىنشا بيىل 23 228 گەكتار شابىندىق جەردەن 111 600 توننا قىستىق مال ازىعىن جيناۋ كەرەك بولسا، بۇگىنگى تاڭعا 84200 توننا ءشوپ دايىنداپ ۇلگەرگەن مويىنقۇمدىق شارۋالار الداعى قىس ماۋسىمىنا تياناقتى دايىندالۋدا.