تاراز قالاسى – 2 مىڭ جىلدان استام تاريحى بار ەلىمىزدەگى ءوڭ كونە شاھار. وسىنى ەسكەرە وتىرىپ، جامبىل وبلىسىنىڭ اكىمى اسقار مىرزاحمەتوۆ قالانىڭ ساۋلەتتىك ستيلىنە تاريحي ەلەمەنتتەردى ەنگىزىپ، ونىڭ وتكەنى مەن بۇگىنىن سالالاستىرۋدى باستى ماقسات ەتىپ قويعان بولاتىن. اتالعان تاپسىرماعا وراي وبلىس ورتالىعىنداعى بارلىق قۇرىلىس نىساندارىندا كونە قالانىڭ كەلبەتىن قالىپتاستىرۋ بويىنشا جۇمىستار جۇرۋدە دەپ جازادى Qamshy.kz اقپارات اگەنتتىگى.
بۇل ىستە كونە قالا ورنىندا قۇرىلىسى ءجۇرىپ جاتقان «شاحريستان» تاريحي كەشەنى وراسان زور ۇلەس قوسپاقشى. اتاپ ايتقاندا، اتالمىش كەشەندە ولكەتانۋ مۇراجايىنىڭ، «رەترو-فەستيۆال» امفيتەاترىنىڭ، كورمە پاۆيلونىنىڭ، كوركەم سۋرەت گالەرەياسىنىڭ، قول-ونەر شەبەرحانالار ورتالىعىنىڭ، «رۋحانيات» ورتالىعىنىڭ قۇرىلىستارى جۇرگىزىلۋدە. بۇل نىسانداردىڭ بارلىعى شىعىستىق ستيلدە سالىنۋدا.
وسى اۋماقتا جولاۋشىلاردى تاسىمالدايتىن 26 باعىتتاعى قوعامدىق كولىكتەردىڭ وتەتىنىن ەسكەرە وتىرىپ، اتالعان «اربات» ايماعىن اينالىپ ءوتۋ ءۇشىن بايزاق باتىر كوشەسىن تولە بي داڭعىلىنان تاشكەنت كوشەسىنە دەيىن كەڭەيتۋ، ع. بايتاسوۆ كوشەسىن تولە بي داڭعىلىنان كوشەنەي كوشەسىنە دەيىن ورتاشا جوندەۋ جۇمىستارى مەن كوشەنەي كوشەسىنەن اققوزييەۆ كوشەسىنە شىعاتىن جولدىڭ قۇرىلىسى جوسپارلانۋدا.
سونىمەن قاتار، تولە بي داڭعىلىنىڭ بويىمەن سىپاتاي باتىر كوشەسىنەن باستاپ «قاراحان» كەسەنەسىنە دەيىن سكۆەر، جاياۋ جۇرگىنشىلەر ايماعى مەن اللەياسى سالىنادى. «تاراز-ارەنا» سپورت كەشەنىنىڭ ماڭىنداعى «داڭقتى سپورتشىلار» اللەياسى بوي كوتەرسە، «مامىر» ساياباعىن اباتتاندىرىلىپ، «كونە تاراز» كەشەنىنىڭ ماڭىندا بيىكتىگى 40 مەتردەن تۇراتىن «ساعات» ستەللاسى ورناتىلادى.
ال، جاڭا 15ء-شى مولتەك اۋدانىندا 40 گەكتار قۇرايتىن مادەني-اكىمشىلىك ورتالىعىن اباتتاندىرۋ مەن وقۋشىلار سارايى، جەڭىل اتلەتيكا مانەجى جانە گيمناستيكالىق سپورت كەشەنىنىڭ قۇرىلىستارى بيۋدجەت ەسەبىنەن، ال نەكە قيۋ سارايى مەن سالتانات سارايىنىڭ قۇرىلىستارى جەكە ينۆەستورلار ەسەبىنەن باستالۋى جوسپارلانۋدا.
وسى رەتتە، رەتسىز ساۋدا ورىندارىن جويۋ بويىنشا دا جۇمىستار جۇرۋدە. بۇل ماقساتتا «كوشە ساۋداسى – 100 ورىن» جوباسى ىسكە اسىرىلۋدا. قازىرگى كەزدە ءبىر ءتيپتى دۇڭگىرشەكتەردىڭ ەسكيزى بەكىتىلىپ، «تاراز» الەۋمەتتىك كاسىپكەرلىك كورپوراسياسى ارقىلى 70 جەر تەلىمدەرى جەكە كاسىپكەرلەرگە جالعا بەرىلىپ، تاعى 20 تەلىمنىڭ قۇجاتتارى راسىمدەلۋدە. ولار دا جوعارىدا اتالعان ساۋلەت ستيلىنەن اجىرامايدى.
پىكىر قالدىرۋ