جىر الىبىنىڭ ەسىمىمەن اتالاتىن جامبىل وبلىسىنىڭ تۇرعىندارى ءوڭىردىڭ 80 جىلدىق مەرەيتويىن اتاپ وتۋگە قىزۋ دايىندىق جۇرگىزۋدە. بۇل ماقساتتا ايماقتا مادەني-كوپشىلىك ءىس-شارالار كوپتەپ وتكىزىلىپ، ءبىرقاتار نىساندار پايدالانۋعا بەرىلمەك دەپ جازادى Qamshy.kz اقپارات اگەنتتىگى. 

مەرەيتوي اياسىندا اۋليەاتادا ءوڭىردىڭ تاريحى مەن مادەنيەتى، تابيعاتى، ءبىرتۋار پەرزەنتتەرى مەن اقىن-جىرشى، باتىرلارىنىڭ ەسىمدەرىن ۇرپاق جادىندا جاڭعىرتۋ ماقساتىندا «تاراز مۇرالارى» سەرياسىمەن كوپتومدىقتار شىعارۋ جوسپارلانعان. بۇگىنگى كۇنى كىتاپتى شىعارۋ 2 باعىتتا ىسكە اسىرىلىپ، تاريحي-تانىمدىلىق عىلىمي-زەرتتەۋ باعىتى بويىنشا 15 توم، شىعارماشىلىق باعىتى بويىنشا 35 تومدىق ماتەريالدار جيناقتالدى.

سونداي-اق، وبلىستان شىققان ونەر جۇلدىزدارىنىڭ كونسەرتى، «وركەنيەتتەر توعىسىنداعى تاراز» اتتى حالىقارالىق عىلىمي-پراكتيكالىق كونفەرەنسيا وتكىزۋ جوسپارلانىپ وتىر. بۇدان بولەك كوپتەگەن ءىس-شارالار بار. دايىندىق قىزۋ جۇرگىزىلۋدە.

بۇدان بولەك، 80 جىلدىق قارساڭىندا ءبىرقاتار مادەني-الەۋمەتتىك نىسانداردىڭ قۇرىلىسى اياقتالىپ، پايدالانۋعا بەرىلمەكشى. اتاپ ايتقاندا، مەرەيتوي قارساڭىندا «شاحريستان» كەشەنىندە وبلىستىق تاريحي-ولكەتانۋ مۋزەيى، كورمە پاۆيلونى، امفيتەاتر، قولونەر شەبەرلەرىنىڭ گالەرەياسى، «رۋحانيات» ورتالىعىنىڭ جاڭا عيماراتى، كوركەمدىك-بەينەلەۋ ونەرى گالەرەياسىنىڭ اشىلۋى جوسپارلانۋدا.

ال، بۇرىنعى جامبىل جابايەۆتىڭ ەسكەرتكىشى ورنالاسقان جەردە «ساعات» ستەلاسى بوي كوتەرمەك. قازىرگى ۋاقىتتا اتالعان اۋماقتاعى قۇرىلىس جۇمىستارى ءقازىر قارقىن العان. ستەلانىڭ بيىكتىگى 40 مەترگە جەتەدى. ونىڭ ءار قابىرعاسىنا بيىكتىگى 4 مەتر بولاتىن 4 ساعات ورناتىلادى. دەمەك، بۇل نىسان قالانىڭ كەز كەلگەن بۇرىشىنان كوزگە تۇسەدى. ال ستەلاداعى قوڭىراۋ 1 ساعات سايىن بەلگى بەرىپ تۇرادى. سىرتقى ارلەۋ جۇمىستارى تولىعىمەن شىعىستىق ناقىشتا جۇرگىزىلەدى. سوندىقتان مۇندا «سامارقان كىرپىشى» سىندى ەرەكشە قۇرىلىس ماتەريالدارى پايدالانىلماق.

جالپى، اتالعان نىسان تاراز قالاسىنداعى ەڭ كورىكتى ورىنداردىڭ بىرىنە اينالاتىنىن ايتادى. ونى دا جوعارىدا اتاعانىمىزداي وبلىستىڭ 80 جىلدىق مەرەيتويى قارساڭىندا پايدالانۋعا بەرۋ جوسپارلانىپ وتىر.

ەستەرىڭىزگە سالا كەتەيىك، 1939 جىلى قازاندا قازاق كسر-ى ۇكىمەتىنىڭ شەشىمىمەن اۋليەاتا وبلىسىنىڭ اتاۋى جامبىل وبلىسى بولىپ اۋىستىرىلدى. بۇل جامبىل وبلىسىنىڭ قۇرىلعان كۇنى سانالادى.