جاڭا وقۋ جىلىنىڭ باستالۋىنا دا ازداعان ۋاقىت قالدى. وسىعان وراي جامبىل وبلىسىنىڭ ءبىلىم وشاقتارى قىز دايىندىق جۇمىستارىن جۇرگىزۋدە دەپ جازادى Qamshy.kz اقپارات اگەنتتىگى. 

بيىلعى وقۋ جىلىندا 442 مەكتەپ ءبىلىم بەرۋ ىسىنە كىرىسەدى ەكەن. اتالعان وقۋ وردالارى 28 مىڭنان استام بالدىرعاندى 1 سىنىپقا قابىلدايدى دەپ كۇتىلۋدە.

ءقازىردىڭ وزىندە وقۋشىلاردى مەكتەپكە قابىلداۋعا ارنالعان eduschool.kz جۇيەسى ارقىلى 1 سىنىپقا 13 938 ەلەكتروندى ءوتىنىش بەرىلىپ، 13 512 بالا وقۋ وردالارىنا قابىلدانعان.

سونىمەن قاتار جاڭا وقۋ جىلىندا وبلىستا 5 مەكتەپ پايدالانۋعا بەرىلگەلى وتىر. جاڭا ءبىلىم بەرۋ مەكەمەلەرى 1 ءۇشاۋىسىمدى، 1 اپاتتى جاعدايداعى جانە 3 ورىن تاپشىلىعى بار مەكتەپتىڭ ماسەلەسىن تولىقتاي شەشپەك.

ال، وبلىستا تىركەلگەن اپاتتى جاعدايداعى 3 مەكتەپكە وبلىستىق بيۋدجەتتەن قارجى ءبولىنىپ، قۇرىلىسى بيىل باستالادى. 16 مەكتەپتى اعىمداعى جوندەۋدەن وتكىزۋگە 98 ميلليون تەڭگە ءبولىنىپ، جۇمىستار تولىق اياعىنا جەتكەن. 7،3 ميلليارد تەڭگەگە 7 مەكتەپكە كۇردەلى جوندەۋ جۇرگىزىلۋدە. ونىڭ 3-ەۋىندەگى جۇمىستار مارەسىنە جەتىپ ۇلگەردى. كەلەسى 3 مەكتەپتەگى جوندەۋ جۇمىستارى ايدىڭ اياعىنا دەيىن ءتامامدالادى دەپ كۇتىلۋدە. ال، شۋ اۋدانىنداعى م.اۋەزوۆ مەكتەبىنىڭ قۇرىلىسى قاراشاعا دەيىن جالعاسادى. وقۋ پروسەسىنە كەدەرگى كەلتىرمەۋ ءۇشىن وقۋشىلار ءبولىپ وقىتىلماق. بىردە-بىر بالا وقۋدان سىرت قالمايدى.

سونداي-اق، وبلىستا وقۋلىق جەتىسپەۋشىلىگى ماسەلەسىن بولدىرماۋدىڭ جولدارى دا ناقتىلانعان. اتالمىش ماسەلە ءبىلىم جانە عىلىم مينيسترلىگى ەنگىزگەلى وتىرعان ارنايى جۇيە ارقىلى شەشىلمەك. ناقتىسىن ايتقاندا، جاڭا جۇيە بويىنشا وقۋشىلار مەكتەپ باعدارلاماسىندا پايدالاناتىن كەز كەلگەن وقۋلىعىن ق ر ءبىلىم جانە عىلىم مينيسترلىگىنىڭ سايتىنان جۇكتەپ الىپ، پلانشەت نەمەسە تەلەفون سەكىلدى قۇرىلعىلارىنا جازىپ الا الادى. وسىلايشا، وقۋشىلارعا دا، اتا-انالار ءۇشىن دە قاجەتتى كىتاپ ءاردايىم قولجەتىمدى بولماق. «جەڭىل پورتفەل» جوباسى اياسىندا قولعا الىنعان باستاما بىرىنشىدەن، وقۋشىلاردىڭ وقۋلىق تولعان اۋىر سومكەلەرىن تاسۋ ماشاقاتىنان ايىرسا، ەكىنشى تۇرعىدان جوعارىدا ايتقان وقۋلىق جەتىسپەۋشىلىگىن سەزىنبەۋىنە دە جول اشپاق.

جالپى وبلىس وقۋشىلارىن وقۋلىقپەن قامتاماسىز ەتۋگە وبلىس اكىمدىگىنەن 2،7 ميلليارد تەڭگە بولىنگەن. بۇل قاراجاتقا 1 ميلليون 300-دەن استام كىتاپ ساتىپ الىندى. قازىرگى ۋاقىتتا ونىڭ 92 پايىزى وبلىسقا جەتكىزىلىپ ۇلگەردى. ال مەكتەپتەرگە بارلىق وقۋلىقتىڭ 65 پايىزى جونەلتىلدى. بۇل جۇمىستار وقۋ جىلىنىڭ باسىنا دەيىن تولىق اياقتالادى.