"Nur Otan" پارتياسى «حالىققا كومەك» پارتيالىق جوباسى اياسىندا قوعامداعى وزەكتى ماسەلەلەردى دەر كەزىندە ءارى ءتيىمدى شەشۋ ءۇشىن قوعامدىق قابىلداۋ بولمەلەرى «جەدەل ءارى ءبىر جەردە» قاعيداسىمەن جۇمىس ىستەۋ فورماتىنا كوشكەن دەپ جازادى Qamshy.kz اقپارات اگەنتتىگى. 

“Nur Otan” پارتياسى جامبىل وبلىستىق فيليالى قوعامدىق قابىلداۋ بولمەسىنىڭ مەڭگەرۋشىسى ءۇمىتبالا يبرايموۆا پارتيانىڭ بايزاق اۋداندىق فيليالىنداعى قوعامدىق قابىلداۋ بولمەسىندە ازاماتتاردى جەكە قابىلداپ، مۇڭ-مۇقتاجىن تىڭدادى.

قابىلداۋعا ءبىرىنشى بولىپ قىزىل جۇلدىز اۋىلىنىڭ تۇرعىنى گۇلجامال ەسەتوۆا كەلدى. ول ماۋسىم جانە شىلدە ايلارىندا تاعايىندالعان اتاۋلى الەۋمەتتىك كومەكتىڭ، ياعني 129 مىڭ تەڭگەسىن العاندىعىن، الايدا مۇگەدەك بالالارىن ەمدەتۋ ءۇشىن تاراز قالاسىنا كوشىپ كەتكەندىگىن، اتالعان قاراجاتتى قايتارا الماعاندىقتان، كومەك بەرۋىن سۇراندى. اۋدان اكىمدىگىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ سەكتور مەڭگەرۋشىسى داريعا بۋرحانوۆا اتاۋلى الەۋمەتتىك كومەك «مەملەكەتتىك اتاۋلى الەۋمەتتىك كومەك تۋرالى» زاڭعا سايكەس تولەنەتىندىگىن جانە ءوتىنىش يەسى ۇسىنعان دەرەكتەرگە وزگەرىستەر تۋىنداعان جاعدايدا، 10 جۇمىس كۇنى ىشىندە ۋاكىلەتتى ورگانعا حابارلاۋ قاجەتتىگىن ايتتى.ول سونىمەن بىرگە زەردەلەۋ بارىسىندا ءوتىنىش يەسىنىڭ اتالعان مەكەنجايدا تۇرمايتىندىعى انىقتالعانىن، ۋاكىلەتتى ورگاننىڭ شەشىمىمەن تاعايىندالعان كومەكتىڭ سومماسى قايتا قارالىپ، ەكى ايى زاڭسىز دەپ ەسەپتەلىپ، بيۋدجەتكە كەرى قايتارۋ تۋرالى اتالمىش زاڭعا سايكەس ءتۇسىندىردى.بۇل ماسەلەگە قاتىستى وبلىستىق ءماسليحاتتىڭ دەپۋتاتى باقىتجان سەيتكاريموۆ قۇقىقتىق كەڭەس بەردى.

سارىكەمەرلىك 9 بالانىڭ اناسى ساندۋعاش شاحشامبايەۆا «قارەكەت» قورى ارقىلى 2 بولمەلى پاتەر العاندىعىن، بولمەلەر تار بولعاندىقتان، قوسىمشا قۇرىلىس جۇرگىزۋ جايىن كوتەردى. قوستوبەلىك ينديرا ۋتەشوۆا 5 بالانى جالعىز تاربيەلەپ وتىرعاندىعىن، جالدامالى پاتەر تابا الماي جۇرگەندىگىن جەتكىزدى. جاڭاتاس قالاسىندا تىركەلگەندىكتەن، اتاۋلى الەۋمەتتىك كومەككە قولى جەتپەي وتىرعانىن، سونىمەن قاتار، كامەلەت جاسىنا جەتكەن بالاسىنا جەكە كۋالىك الۋىنا ىقپال ەتۋىن سۇراندى. قوستوبە اۋىلدىق وكرۋگى اكىمىنىڭ ورىنباسارى نۇرعالي قوجابەرگەنوۆ كوپبالالى اناعا جالدامالى پاتەر تابۋىنا كومەك بەرەتىندىگىن ايتتى.

قابىلداۋعا كەلگەن ازاماتتاردى مۇقيات تىڭداعان ءۇمىتبالا سەرىك قىزى ولاردىڭ وتىنىشتەرى اياقسىز قالمايتىندىعىن جەتكىزدى.