جاستار - قاي زاماندا، قاي ەلدە بولماسىن اسقاق ارمان مەن ءۇمىت، بيىك ار مەن ءور نامىستىڭ سيمۆولى. ولار قاي كەزدە دە، قاي قوعامدا دا بەلسەندى بۋىن وكىلدەرى. ەلىمىزدەگى جاس بۋىن وكىلدەرى مەملەكەتىمىزدىڭ جاڭا كەلبەتىن قالىپتاستىرادى. ولاردىڭ جاڭا بەلەستەرگە دەگەن ۇمتىلىسى جاڭا يدەيالاردىڭ تۋىنداۋىنا سەبەپشى بولادى. تەك بىزدە عانا ەمەس، الەم جۇرتشىلىعى جاستاردىڭ الىپ كۇش يەسى ەكەندىگىن مويىنداپ، ولارمەن ساناسادى. سوندىقتان ءبىر جىلدىڭ ايتۋلى ءبىر كۇنىن ارنايى جاستار مەرەكەسى ەتىپ، كۇنتىزبەدە بەلگىلەگەن. ياعني، 12 تامىز - حالىقارالىق جاستار كۇنى رەتىندە اتالىپ وتىلەدى.

وسى ماقساتتا جۋىردا جامبىل وبلىسى تۇرار رىسقۇلوۆ اۋداندىق جاستار رەسۋرستىق ورتالىعىنىڭ ماماندارى حالىقارالىق جاستار كۇنىنە جانە «جاستار جىلىنا» وراي، اۋدان ورتالىعىندا «Qulan jastar fest» شاراسىن وتكىزدى.

اۋدان ورتالىعىنداعى اۋقىمدى شارا ۇلتتىق ويىنداردى ۇلىقتاۋدان باستالدى. اۋدان تۇرعىندارى جاس ايىرماشىلىعىنا قاراي توپقا ءبولىنىپ، اسىق اتۋدان سىنعا ءتۇستى. ناتيجەسىندە كىل مىقتىلار انىقتالىپ، ارنايى سىيلىقتارمەن ماراپاتتالدى. ۇلتتىق ويىنداردان كەيىن، كەشتىڭ سالتانانتتى كەزەڭى باستاۋ الىپ، ونى وبلىسقا بەلگىلى شوۋمەن – ادىلەت سانات ۇلى جۇرگىزىپ وتىردى.

شارا بارىسىندا اۋدان اكىمى ەربولات سادىرقۇلوۆ ءسوز سويلەپ، بۇگىنگى جاستارعا ۇلكەن سەنىم ارتىلىپ وتىرعانىن جەتكىزدى.

– جاستار — قاي كەزدە دە، قاي قوعامدا دا بەلسەندى بۋىن وكىلدەرى بولىپ سانالادى. ءويت¬كەنى، ولار مەملەكەتىمىزدىڭ جاڭا كەلبەتىن قالىپتاستىراتىن ازاماتتار. ولار قاي ەلدە بولماسىن اسقاق ارمان مەن ءۇمىتتىڭ، بيىك ار مەن ءور نامىستىڭ سيمۆولى. تەك بىزدە عانا ەمەس، الەم جۇرتشىلىعى جاستاردىڭ الىپ كۇش يەسى ەكەندىگىن مويىنداپ، ولارمەن ساناسادى. سوندىقتان ءبىر جىلدىڭ ايتۋلى ءبىر كۇنىن ارنايى جاستار مەرەكەسى ەتىپ، كۇنتىزبەدە بەلگىلەگەن. بۇگىن — حالىقارالىق جاستار كۇنى. وسى ايتۋلى مەرەكەنى پايدالانا وتىرىپ، جاستار رەسۋرستىق ورتالىعىنىڭ باسشىسى ايبەك سارسەنحانۇلىنا جەكە عيماراتتىڭ كىلتىن تابىستاۋعا رۇقسات ەتىڭىزدەر، — دەپ، تالاي جىلدار بويى شەشىلمەي كەلە جاتقان جاستار ماسەلەسىنىڭ بىرىنە نۇكتە قويدى.

قۇلان جاستارىنا ارنالعان كەرەمەت كەشتە ءان ونەرىنىڭ جۇلدىزدارى دۋمان جان مەن «ادەمى-اي» دۋەتى ءوز ونەرلەرىن كورسەتىپ، جيىلعان جۇرتقا اۋەزدى اۋەندەرىن ارنادى. سونىمەن قاتار، تۇرعىندار اۋدان ماقتانىشتارىنا اينالعان «ادەمى-اۋ» حالىقتىق ءان-بي ءانسامبلىنىڭ دە ونەرىن تاماشالاي الدى. ايتا كەتۋ كەرەك، كەش بارىسىندا جەرگىلىكتى ونەرپازدار دا ساحنا تورىندە ونەر كورسەتىپ، جاستارعا كوتەرىڭكى كوڭىل-كۇي سىيلادى.