جامبىل وبلىسىندا بۇقارالىق سپورتتى دامىتۋعا باسا نازار اۋدارىلۋدا. وسىعان وراي، سالاۋاتتى ءومىر سالتىن ناسيحاتتاۋ ماقساتىندا، بايزاق اۋدانىندا وتكەن جىلى 825 سپورتتىق ءىس-شارا، ال، اعىمداعى جىلدىڭ التى ايىندا بارلىعى 502 سپورتتىق ءىس-شارا وتكىزىلىپ، وعان 41 859 ادام قامتىلعان دەپ جازادى Qamshy.kz اقپارات اگەنتتىگى. 

سالاۋاتتى ءومىر سالتىن ناسيحاتتاۋ باعىتىندا وتكىزىلگەن 502 سپورتتىق ءىس-شارانىڭ 46-سى اۋدان اكىمدىگى دەنە شىنىقتىرۋ جانە سپورت ءبولىمىنىڭ جانە قالعان سپورتتىق ءىس-شارا جالپى ءبىلىم بەرۋ مەكەمەلەرىندە، اۋىلدىق وكرۋگتەردە، نەگىزىنەن جاستار جانە سپورت جونىندەگى ادىسكەر-نۇسقاۋشىلارىمەن، دەنە شىنىقتىرۋ ءپانى مۇعالىمدەرىنىڭ ۇيىمداستىرۋىمەن وتكىزىلگەن. سونىمەن قاتار، سپورت مەكەمەلەرىندە توقسان سايىن ءبىلىم مەكەمەلەرى اراسىندا «اشىق ەسىك كۇندەرىن» وتكىزۋ داستۇرگە اينالعان.

قاڭتار ايىنان ماۋسىم ايىنا دەيىن اۋداندا اۋقىمدى جانە جۇيەلى تۇردە ۇيىمداستىرىلعان سپورتتىق ءىس-شارالار: كىشى فۋتبول، ۆولەيبول، باسكەتبولدان اۋدان اكىمىنىڭ كۋبوگى ءۇشىن ەرەسەكتەر اراسىنداعى اينالما ادىسىمەن اۋدان چەمپيوناتتارى ءوز دەڭگەيىندە وتسە، بۇدان بولەك جاسوسپىرىمدەر اراسىنداعى «سپورت ءىزباسارلارى» اۋداندىق ءتۋرنيرى، اسىق اتۋ، توعىزقۇمالاق، شاحمات، باسكەتبولدان اۋداندىق سپارتاكيادالار ۇيىمداستىرىلدى. سونداي-اق وبلىستىق كەزەڭدەرىمەن جۇيەلى تۇردە اۋلا ويىندارى، قازاق كۇرەسىنەن «قازاقستان بارىسى»، مەملەكەتتىك قىزمەتشىلەردىڭ سپارتاكياداسى اۋداندىق ىرىكتەۋ جارىستارىمەن قاتار «دۇنيەجۇزىلىك دەنساۋلىق كۇنىنەن - سپورت كۇنىنە دەيىن» جەڭىل اتلەتيكالىق جۇگىرۋدەن، جازعى سپورت ماۋسىمىنىڭ اشىلۋىنا ارنالعان «بايزاق سپورتى - 2019» اۋداندىق سپارتاكيادالى وتكىزىلدى.

اۋداندىق بولىمگە باعىنىستى سپورت مەكتەپتەرىندە بارلىعى 17 سپورت ءتۇرى: بوكس، قازاق كۇرەسى، دزيۋ-دو كۇرەسى، گرەك-ريم كۇرەسى، ەركىن كۇرەس، قول كۇرەسى، ۆولەيبول، باسكەتبول، جەڭىل اتلەتيكا، توعىزقۇمالاق، ۇستەل تەننيسى، كوكپار ويىنى، تاەكۆوندو، كاراتە-دو، فۋتبول، اسىق اتۋ جانە اۋىر اتلەتيكا قىزمەت جاسايدى.

سارىكەمەر، ءمادىمار، قىزىل جۇلدىز جانە بۋرىل اۋىلدارىندا ستريت ۆوركاۋت قوندىرعىلارى ورناتىلىپ، سپورت الاڭشالارى سالىنسا، 16 ەلدىمەكەندە وسىعان ۇقساس قاراپايىم كوشە جاتتىعۋلارى الاڭشالارى بار.

2018 جىلدىڭ ءساۋىر ايىنان باستاپ، تۇيمەكەنت اۋىلىندا سپورت باعىتىنداعى اۋلا كلۋبى جۇمىس ىستەيدى. اۋلا كلۋبىندا 8 شتاتتىق بىرلىكپەن 9 جاتتىقتىرۋشى 24 وقۋ توبىمەن جۇمىس جاسايدى. وقۋ توپتارىندا بارلىعى 480 وقۋشى 8 سپورت ءتۇرى (دزيۋ-دو، قول كۇرەسى، نىسانا كوزدەۋ، كوگالداعى حوككەي، فۋتبول، اۋلا ويىندارى، شاحمات، قۇسبەگى) بويىنشا شۇعىلدانۋدا.